بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

مەملەكەتتىك فۋتبول كومانداسى قازاقستان كومانداسىنان ءبىر دوپ پارقىمەن جەڭىلدى

جەڭىلىستەن جەتەرسىزدىكتەرىمىزدى بايقادىق، شابۋىلداعى شاراسىزدىقتى جەڭۋ كەرەك

2016.06.08 13:15   كەلۋ قاينارى : حالىق تورابى



  سۋرەتتە: ازات نۇرعاليەۆ دوپ ەنگىزگەنىن قۇتتىقتاۋدا.

  جۇڭگو مەملەكەتتىك ەرلەر فۋتبول كومانداسى 7 – ماۋسىم كۇنى لياۋنيڭ ولكەسىنىڭ داليان قالاسىنداعى سپورت الاڭىندا وتكىزىلگەن جولداستىق كەزدەسۋدە 0 : 1 ۇپايمەن قازاقستان كومانداسىنان جەڭىلدى، مەملەكەتتىك كوماندانىڭ باپكەرلىگى مىندەتىن ەكىنشى رەت ارقالاپ وتىرعان گاۋ حۇڭبو وسى رەت كومانداعا جەتەكشىلىك ەتكەننەن بەرگى العاشقى جەڭىلىسكە ۇشىرادى. مەملەكەتتىك كوماندانىڭ شوعىرلى جولداستىق كەزدەسۋ وتكىزۋ بارىسىندا قازاقستانمەن وتكىزگەن بۇل رەتكى جولداستىق كەزدەسۋى الەم چەمپيوناتىنا سارالاۋ جارىسىنىڭ 12 مىقتىنى سارالاۋ جارىسى الدىنداعى ەڭ سوڭعى كەزدەسۋى. جەڭىلىسكە ۇشىراعان بولسا دا، بۇل رەتكى جاتتىعۋدىڭ ءمانى جوعارى بولدى. ساتسىزدىك مەملەكەت كومانداسىنىڭ ءوز ورەسىن دۇرىس شامالاپ، ءىس جۇزىندىك جاعدايدى دۇرىس باعالاپ، الداعى اناعۇرلىم قاتاڭ سىناقتارعا بايسالدى تۇردە دايىندىق كورۋىنە مۇمكىندىك جاسايدى.

  جاڭا قۇرامنىڭ ناتيجەسى ويداعىداي بولمادى

  4 كۇننىڭ الدىندا مەملەكەتتىك كوماندا حىبەي ولكەسىنىڭ چينحۋاڭداۋ قالاسىندا الەمدىك رەيتىنگتە وزىنەن جوعارى ورىندا تۇرعان ترينيداد جانە توباگو كومانداسىن وڭاي جەڭگەن بولاتىن. ول جارىسپەن سالىستىرعاندا، قازاقستان حالىقارالىق رەيتىنگتە 100 – ورىننان كەيىن تۇراتىن بولسا دا، جۇڭگو كومانداسىنا اكەلگەن سىناعى تولىق قۇراممەن كەلمەگەن ترينيداد جانە توباگو كومانداسىنان كۇشتى بولدى.

  جولداستىق كەزدەسۋگە قازاقستان كومانداسىن تاڭداۋدىڭ ماقساتى ايقىن: جۇڭگو كومانداسى وسى ورايدان پايدالانىپ، 12 مىقتىنى سارالاۋ جارىسىنداعى فۋتبول ستيلى قازاقستانعا جۋىقتاۋ كەلەتىن وزبەكستانمەن بولاتىن جارىسقا دايىندىق كورمەكشى بولعان. گاۋ حۇڭبو الاڭعا شىعاتىن فۋتبولشىلار قۇرامىنا ءبىرشاما زور وزگەرىس ەنگىزدى، نەگىزگى ويىنشىلار قۇرامىندا جاڭ لينفان، فىڭ شياۋتيڭ جانە جاۋ ميڭجيان قاتالى 3 قورعاۋشى عانا الدىڭعى رەتكى جولداستىق كەزدەسۋدە نەگىزگى ويىنشى رەتىندە الاڭعا شىعارىلعان، سونىمەن قاتار، كوماندانىڭ فورماتسياسىنا دا باتىل وزگەرىستەر ەنگىزىلىپ، شابۋىلعا قاتىناساتىن ويىنشىلار كوبەيتىلگەن.

  ءبىراق، شابۋىلعا شارق ۇرعان مەملەكەتتىك كوماندا جارىستىڭ العاشقى جارتىسىندا ۇستەمدىككە يە بولا المادى، 45 مينۋتتا تەك 3 رەت قانا قاقپاعا سوققى باعىتتادى. قايتا، تولىق قۇراممەن كەلگەن ارىپتەس كوماندا ىسىلعان سايكەسىمدىلىگىن كورسەتتى، ونىڭ ۇستىنە ولاردىڭ تەز دە شيراق، ۇعىنىقتى دا ءونىمدى شابۋىلى الاڭ يەلەرىن ابدىراتتى، قاقپاعا باعىتتاعان سوققى سانى مەن ساپاسى جاعىنان جۇڭگو كومانداسىنان وزىق بولدى. قازاقستان كومانداسىنىڭ شابۋىلى جارىستىڭ سوڭعى جارتىسىندا ناتيجەسىن كورسەتىپ، قوسىمشا قۇرام بويىنشا الاڭعا شىققان 13 – ءنومىرلى نۇرعاليەۆ بيىك كوتەرىلگەن دوپتى باسپەن ءسۇزىپ، جۇڭگو كومانداسىنىڭ قاقپاسىنا توعىتتى.

  0 : 1 ۇپايلىق ەسەپ جارىس اياقتاعانشا وزگەرمەدى. كەزدەسۋدەن سوڭ گاۋ حۇڭبو بىلاي دەدى: بۇل رەتكى جارىستا ءبىز 12 مىقتىنى سارالاۋ جارىسىنداعى ارىپتەسىمىزگە جانە ءوز الاڭىمىز بەن ارىپتەسىمىزدىڭ الاڭىنا قاراتا جاڭا تاكتيكا قولداندىق، كەزدەسۋدىڭ ناتيجەسى ءبىزدى ۇمىتسىزدەندىردى، بۇل باپكەرلەر قۇرامىنىڭ ماسەلەسى. جيناقتاپ ايتقاندا، تاكتيكا، قۇرام، جاتتىعۋ قاتارلى جاقتاردا باپكەرلەر قۇرامىنىڭ قورىتىندىلايتىن جانە تولعاناتىن تۇستارى كوپ، - دەدى.

  كەلۋ قاينارى: حالىق تورابى

【1】 【2】 【3】 【4】 【5】 【6】 
جاۋاپتى رەداكتورى : نۇرعيسا قۇرمانجان ۇلى

 سۋرەت