ءدارى - دارمەكتەردى باقىلاۋ - باسقارۋ مەكەمەسى چاڭچۇن چاڭشىڭ سەرىكتەستىگىن اكىمشىلىك جاقتان جازالاۋ شارالارىن جاريالادى: اقشالاي ايىپ سالۋ جانە ءمۇسادىرالاۋ سوماسى 9 ميلليارد 100 ميلليون يۋان بولدى

2018.10.17 13:50   كەلۋ قاينارى : حالىق تورابى

　　مەملەكەتتىك ازىق – تۇلىك جانە ءدارى – دارمەكتەردى باقىلاۋ – باسقارۋ مەكەمەسى تورابىنان قيىپ الىنعان سۋرەت.


　　حالىق تورابى، 16 – قازان، بەيجيڭ (فىڭ لي) مەملەكەتتىك ءدارى – دارمەكتەردى باقىلاۋ – باسقارۋ مەكەمەسى مەن جيلين ولكەلىك ازىق – تۇلىك جانە ءدارى – دارمەكتەردى باقىلاۋ – باسقارۋ مەكەمەسى چاڭچۇن چاڭشىڭ بيوتەحنولوگيالىق شەكتى جاۋاپكەرشىلىك سەرىكتەستىگىنىڭ (تومەندە «چاڭچۇن چاڭشىڭ سەرىكتەستىگى» دەپ اتالادى) قۇتىرىق ۆاكسيناسىن زاڭ – تۇزىمگە قايشى تۇردە ءوندىرۋى ماسەلەسىنە زاڭ بويىنشا قاتاڭ تەكسەرۋ جۇرگىزىپ، اكىمشىلىك جاقتان جازالادى.


　　اكىمشىلىك جاقتان جازالاۋ ۇيعارىمىنا قاراعاندا، چاڭچۇن چاڭشىڭ سەرىكتەستىگىندە مىناداي سەگىز ءتۇرلى زاڭعا قايشى فاكت ساقتالعان: بىرىنشىدەن، تۇرلىشە توپتاعى وڭدەلمەگەن سۇيىقتىقتى ارالاستىرىپ قايتا جاساپ، ارالاستىرىلعاننان كەيىنگى وڭدەلمەگەن سۇيىقتىققا ءونىم ءنومىرىن قايتادان جاساعان؛ ەكىنشىدەن، دەلوعا قاتىستى ءىشىنارا توپتاعى ونىمدەردىڭ ءونىم ءنومىرى مەن ءىس جۇزىندىك وندىرىلگەن ۋاقىتىن وزگەرتكەن؛ ۇشىنشىدەن، دەلوعا قاتىستى ءىشىنارا ونىمدەردى ۋاقىتى وتكەن وڭدەلمەگەن سۇيىقتىقتان جاساعان؛ تورتىنشىدەن، وڭدەلگەن ونىمدەردىڭ قۋاتىن بەلگىلەنگەن تاسىلدەر بويىنشا ولشەمەگەن؛ بەسىنشىدەن، ءدارى – دارمەك وندىرۋگە پايدالاناتىن سىرتقا تەپكىش اپپاراتتى وزگەرتكەنىن بەلگىلەمە بويىنشا ەستەلىككە الدىرماعان؛ التىنشىدان، ءوندىرىستىڭ ناقتى ەستەلىكتەرىن جويىپ جىبەرگەن، توپتىق ءوندىرۋدىڭ جالعان ەستەلىگىن ويدان قيىستىرعان؛ جەتىنشىدەن، جالعان ماتەريال تاپسىرۋ ارقىلى بيولوگيالىق ونىمدەردى توپتىق تاراتۋدىڭ تولىمدىلىق كۋالىگىن الدامشىلىقپەن قولعا كەلتىرگەن؛ سەگىزىنشىدەن، زاڭعا قايشى فاكتىلەردى بۇركەمەلەۋ ءۇشىن اپپاراتتىق تاباقشا سىندى دالەل - سپاتتاردى جويىپ جىبەرگەن.


　　كەلۋ قاينارى: حالىق تورابى