2025.01.21 19:00 كەلۋ قاينارى : حالىق تورابى
شينحۋا اگەنتتىگى، 1 - ايدىڭ 20 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ 1 - ايدىڭ 20 - كۇنى تۇستەن كەيىن ماماندار، كاسىپورىنشىلار جانە وقۋ - اعارتۋ، عىلىم - تەحنيكا، مادەنيەت، دەنساۋلىق ساقتاۋ، دەنە تاربيە سياقتى سالالارداعى ۋاكىلدەردىڭ اڭگىمە ءماجىلىسىن باسقارىپ اشىپ، «ۇكىمەت قىزمەتىنەن بايانداما (پىكىر الۋ نۇسقاسى)» جونىندەگى ۇسىنىس - پىكىرلەردى تىڭدادى.
اڭگىمە ماجىلىسىندە جاڭ حۇي، رىن شاۋبو، ليۋ جۇن، لياڭ ۋىنفىڭ، ۋەي حۇڭشيڭ، چىن شۋەدۇڭ، چىن حۇڭيان، دۋ بين، زوۋ جيڭيۋان قاتارلىلار ىلگەرىندى - كەيىندى ءسوز سويلەدى. كوپشىلىك بىلاي دەپ قارادى: بىلتىر سىرتقى قىسىم كۇشەيگەن، ىشكى قيىنشىلىق كوبەيگەن كۇردەلى دە اۋىر جاعداي الدىندا ەلىمىز ماكرولىق تىزگىندەۋ تەبىنىن ارتتىرىپ، جاڭالىق اشۋ سيپاتتى ساياساتتىق شارالاردى ۇزدىكسىز العا قويىپ، ەكونوميكا ءبىرشاما تەز ارتىپ، ءتۇرلى ىستەردە تىڭ ىلگەرىلەۋشىلىككە قول جەتكىزىپ، بازار مەجەسى مەن قوعامدىق سەنىمدى ءونىمدى سەرپىلتتى، ناتيجە وڭاي - وسپاق قولعا كەلگەن جوق. كوپشىلىك تاعى ءوز سالالارىمەن بىرلەستىرىپ، قازىرگى دامۋ بارىسىنداعى ماسەلەلەردى شەشۋ، بيىلعى ۇكىمەت قىزمەتىن ويداعىداي ىستەۋ جونىندە ۇسىنىس - پىكىر بەردى.
كوپشىلىكتىڭ ءسوزىن مۇقيات تىڭداعاننان كەيىن لي چياڭ بىلاي دەپ اتاپ كورسەتتى: وتكەن ءبىر جىلدا شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل ەل جوعارىدان تومەنگە دەيىن ۇدەرە العا تارتىپ، قامال الىپ، قيىنشىلىقتاردى جەڭدى، ەكونوميكالىق اينالىم جالپى جاقتان ورنىقتى بولىپ، ورنىقتىلىق بارىسىندا ىلگەرىلەدى، تۇتاس جىلداعى دامۋدىڭ باستى نىسانا - مىندەتتەرى ءساتتى ورىندالىپ، جوعارى ساپالى دامۋ تىڭعىلىقتى ىلگەرىلەپ، ورنىقتىلىقتىڭ نەگىزى اناعۇرلىم بەكەمدەلىپ، ىلگەرىلەۋدىڭ قوزعاۋشى قۋاتى ۇزدىكسىز كۇشەيدى. سونىمەن بىرگە، مىنانى دا كورە ءبىلۋىمىز كەرەك: ەلىمىزدىڭ دامۋى ءالى دە كوپتەگەن قيىنشىلىق پەن سىندارعا ءدوپ كەلىپ وتىر، اسىرەسە، تۇراقسىز، ورنىقسىز فاكتورلار جوعارىلادى، جاعدايدى دۇرىس يگەرىپ، حاۋىپ - قاتەردى ورايعا اينالدىرۋعا شەبەر بولۋ كەرەك. ەلىمىز ءتۇزىم، بازار، كاسىپ سالاسى، دارىندى سياقتى جالپىلىق باسىمدىققا يە، ەكونوميكانىڭ ۇزاق ۋاقىت جاقسارۋ نەگىزگى بەتالىسى وزگەرگەن جوق ءارى وزگەرمەيدى، تەك ءوز ءىسىمىزدى تاباندىلىقپەن ويداعىداي ىستەسەك بولعانى، ەلىمىز ەكونوميكاسىنىڭ ورنىقتى، اقاۋسىز دامۋىن، ءسوز جوق، جەبەي الامىز.
لي چياڭ بىلاي دەپ باسا دارىپتەدى: پارتيا ورتالىق كوميتەتىنىڭ شەشىمدەرىن، ورنالاستىرۋلارىن جاپپاي تياناقتاندىرىپ، جوعارى ساپالى دامۋدى ىلگەرىلەتۋدە تىڭ ناتيجەگە قول جەتكىزۋ كەرەك. اناعۇرلىم بەلسەندى قازىنا ساياساتىن جانە لايىقتى كەڭ اقشا ساياساتىن اتقارىپ، قازىنا ساياساتىندا ىرىقتىلىقپەن الدىعا كۇش سالىپ، ءىس جۇزىندىك شىعىستى تەز ارادا قالىپتاستىرۋ، اقشا ساياساتىندا اينالىمنىڭ جەتكىلىكتى بولۋىن ساقتاپ، قارجىنىڭ ناقتى ەكونوميكاعا تولىق ويىسۋىن ىلگەرىلەتىپ، ساياساتتاعى سايكەسۋ، سەلبەسۋگە ءمان بەرىپ، سىن - سايىسقا توتەپ بەرۋگە، دامۋدى ىلگەرىلەتۋگە پارمەندى ساياساتتىق قولداۋ كورسەتۋ كەرەك. سونىمەن بىرگە، ەل ءىشى - سىرتى جاعدايىنىڭ وزگەرىسىنە قاداعالاي نازار اۋدارىپ، ساياسات - شارالاردى دەر كەزىندە رەتتەپ، ساياساتتىق قۇرال - جابدىق ساندىعىن تولىقتاۋ جانە كەمەلدەندىرۋ كەرەك. رەفورمانى ونان ارى تەرەڭدەتىپ، ەسىكتى ايقارا اشۋدى ارقاۋ ەتىپ، ەل ىشىندەگى زور اينالىمدى كەڭەيتىپ، كۇشەيتىپ، توسىلۋ تۇيىندەرىن اشىپ، ماڭداي الدى شارۋاشىلىق - ساۋدا ورتاسىن قالىپتاستىرىپ، ءتۇرلى شارۋاشىلىق تۇلعالارىنىڭ ومىرشەڭدىك كۇشىن قاۋلاتىپ، دەربەس ەسىك اشۋدى، ءبىر جاقتى ەسىك اشۋدى ءتارتىپتى كەڭەيتۋ كەرەك. عىلىم - تەحنيكادا جاڭالىق اشۋ ارقىلى جاڭا، كونە قوزعاۋشى كۇشتەردىڭ اۋىسۋىن ىلگەرىلەتىپ، كۇشتى شوعىرلاندىرا وتىرىپ شەشۋشى، وزەكتى تەحنيكالاردان جانە الدىڭعى لەكتىك تەحنيكالاردان قامال الىپ، عىلىم - تەحنيكا جەتىستىكتەرىن كاسىپ سالالاندىرۋدى جەدەل ىلگەرىلەتىپ، ەكونوميكانىڭ اناعۇرلىم كوپ جاڭا ارتۋ تۇيىندەرىن قۇلشىنا جەتىلدىرۋ كەرەك. حالىق تۇرمىسىن اناعۇرلىم زور تەبىنمەن قامتاماسىز ەتىپ جانە جاقسارتىپ، تۇرعىنداردىڭ كىرىسىن ارتتىرىپ، اۋىرتپالىعىن جەڭىلدەتىپ، تۇرمىس ساپاسىن جوعارىلاتۋ كەرەك.
لي چياڭ كوپشىلىكتىڭ ءوز سالاسىندا قۇلشىنا تىڭعىلىقتى ىستەپ، ناتيجە شىعارىپ، يگىلىك جاراتۋىن، سونىمەن بىرگە، قوعام جاعدايى مەن حالىق تىلەگىن بەلسەنە اڭىس ەتىپ، اناعۇرلىم كوپ ساياساتتىق ۇسىنىستار قويىپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە اقىل - پاراساتى مەن كۇش - قۋاتىن ارناۋىن ءۇمىت ەتتى.
ۋ جىڭلۇڭ اڭگىمە ماجىلىسىنە قاتىناستى.
«ۇكىمەت قىزمەتىنەن بايانداماعا (پىكىر الۋ نۇسقاسى)» جەر - جەردەن، تاراۋلاردان جارىسپالى پىكىر الىندى.
كەلۋ قاينارى: حالىق تورابى