دەلوعا قاتىستى قاراجات سوماسى 118 ميلليون يۋانعا جۋىقتاعان! 6 ادامنىڭ ۇستىنەن ۇكىم شىعارىلعان 

جۋىردا باعالى حايۋاناتتاردان جاسالعان بۇيىمدارعا قاتىستى قاراجات سوماسى حالىق اقشاسى بويىنشا 118 ميلليونعا جۋىق كەلەتىن مەملەكەت اتتاعان ەرەكشە ءىرى اتكەزشىلىك ىستەۋ دەلوسىنا بايلانىستى شينجياڭ ءوندىرىس – قۇرىلىس بيڭتۋانى قورعاس تىڭ يگەرۋ رايوندىق حالىق سوتى ءبىرىنشى رەتكى تەرگەۋ بارىسىنداعى ۇكىمدى جاريالادى. ايىپكەر لان X پەن بو X قاتارلى التى ادام باعالى حايۋاناتتاردان جاسالعان بۇيىمدارعا قاتىستى اتكەزشىلىك ىستەۋ قىلمىسى، باعالى، تۇقىمى قۇرۋعا اينالعان جابايى حايۋاناتتاردى زيانداۋ قىلمىسى بويىنشا جەكە – جەكە توعىز جىلدان التى جىلعا دەيىنگى ارالىقتاعى مەرزىمدى قاماق جازاسىنا ۇكىم ەتىلدى ءارى ولارعا اقشالاي ايىپ سالىندى.

سوت مەكەمەسىنىڭ تەرگەۋىنە، تەكسەرۋىنە قاراعاندا، 2023 – جىلى 7 – ايدان باستاپ، ايىپكەر لان X زاڭسىز تۇردە مول پايداعا كەنەلۋ ماقساتىمەن شەتەلدىك ار X (قاشىپ جۇرگەن) قاتارلىلارمەن استاسىپ، قازاقستان رەسپۋبليكاسىنان جۇڭگو شەكاراسىنىڭ ىشىنە قاراي اقبوكەننىڭ ءمۇيىزىن اتكەزشىلىك ەتۋ سىندى قىلمىستىق تىزبەكتى جوسپارلاعان. اتالعان توپتاعىلاردىڭ جۇمىس ءبولىسى ايقىن: ار X شەكارا سىرتىندا زات قاينارىن تابادى ءارى اباي X تى مەملەكەت شەكاراسىنان وتۋگە جۇمسايدى، نەمەسە يە X، ياڭ X تەردى جۇڭگو – قازاقستان سەلبەستىك رايونى ىشىندە سومكاعا سالىپ ءوتۋ ءتاسىلىن پايدالانۋعا ورنالاستىرۋ ارقىلى اقبوكەننىڭ ءمۇيىزىن اتكەزشىلىكپەن شەكارادان كىرگىزەدى. وسىدان سوڭ، بو X اراداعى دەلدال رەتىندە شەكارا ىشىندە زاتتى قابىلدايدى، وتكەرمەلەيدى، ەڭ سوڭىندا لان X پەن ونىڭ سىبايلاسى يۋان X انحۇي ولكەسىندەگى ءمالىم قالاعا جەتكىزىپ، الۋشىلارعا ساتىپ بەرەدى.

دەلو انىقتالعان كەزگە دەيىن، اتالعان توپ اقبوكەننىڭ مۇيىزىنەن جيىنى 1474 ءمۇيىزدى اتكەزشىلىكپەن اكەلگەن. ساراپتاۋعا قاراعاندا، دەلوعا قاتىستى حايۋاناتتاردان جاسالعان بۇيىمداردىڭ بارلىعى 1 – دارەجەلى جابايى حايۋاناتتىڭ (اقبوكەننىڭ) ءمۇيىزى ەكەن، اتالعان حايۋانات «تۇقىمى قۇرۋعا اينالعان جابايى حايۋاناتتار مەن وسىمدىكتەرگە قاتىستى حالىقارالىق ساۋدا شارتىنداعى» (CITES) قوسىمشا ماتەريال II مازمۇنىنا قوسىلعان، سونىمەن بىرگە، ەلىمىزدىڭ «مەملەكەتتىك ءتۇيىندى قورعالاتىن جابايى حايۋاناتتار تىزىمدىگىندە» (2021 – جىلعى نۇسقا) 1 – دارەجەلى قورعالاتىن حايۋاناتتار قاتارىنا ەنگىزىلگەن، ءارقانداي فورمادا زاڭسىز ساۋدالاۋعا قاتاڭ تيىم سالىنادى.

قورعاس تىڭ يگەرۋ رايوندىق حالىق سوتى ايىپكەرلەردىڭ بىرگە قىلمىس وتكىزۋ بارىسىنداعى ورنى مەن رولىنا قاراي وتىرىپ، زاڭ بويىنشا ۇكىم شىعارعان. باس قىلمىسكەر لان X باعالى حايۋاناتتاردان جاسالعان بۇيىمداردى اتكەزشىلىكپەن اكەلۋ قىلمىسى بويىنشا 9 جىلدىق مەرزىمدى قاماق جازاسىنا ۇكىم ەتىلگەن ءارى وعان حالىق اقشاسى بوىنشا 60 مىڭ يۋان اقشالاي ايىپ سالىنعان، باسقا بەس ىلەسۋشى قىلمىسكەر دە جەكە – جەكە جازالانعان. دەلوعا قاتىستى ۇستاپ قالىنعان بارلىق اقبوكەن ءمۇيىزى تۇگەلدەي زاڭ بويىنشا ءمۇسادىرالانعان، قاتىستى تاراۋلار زاڭ بويىنشا ءبىر جاقتى ەتەدى.

قازىر بۇل دەلودا جاريالانعان ۇكىم كۇشكە يە بولعان.

كەلۋ قاينارى: حالىق تورابى