ساۋدا مينيسترلىگى: جاپونيا جاقتى جۇڭگونىڭ قاتىستى ناقتى تۇلعالارىن ەكسپورتتى باسقارۋ – تەجەۋ شاراسى اتقارىلاتىن ەڭ سوڭعى الارماندار تىزىمدىگىنەن تەز ارادا شىعارۋعا قۋزايمىز

10 – ايدىڭ 30 – كۇنى، ساۋدا مينيسترلىگىنىڭ مينيسترى ۋاڭ ۋىنتاۋ كورەيانىڭ چيڭجوۋ قالاسىندا جاپونيانىڭ ەكونوميكا جانە كاسىپ سالاسىنا جاۋاپتى ءۋازىرى ريوسەي اكازاۋامەن كەزدەستى، ەكى جاق جۇڭگو مەن جاپونيانىڭ ەكونوميكا – ساۋدا قارىم – قاتىناسى قاتارلى ماسەلەلەر تۋرالى پىكىر الماستىردى.

ۋاڭ ۋىنتاۋ مىنانى ءبىلدىردى: قازىر سىڭار جاقتىلىق، قورعانىمپازدىق حالىقارالىق ەكونوميكا – ساۋدا تارتىبىنە سوققى بولىپ تيۋدە، ەكى جاق ءبىر – بىرىمەن سايكەسە ارەكەتتەنىپ، ەكسپورتتى باسقارۋ – تەجەۋ كەڭەسى قاتارلى مەحانيزمدەردى ويداعىداي پايدالانىپ، كاسىپ سالاسى تىزبەگى مەن قامداۋ تىزبەگىنىڭ ورنىقتىلىعى مەن ىركىلىسسىزدىگىن بىرگە قورعاۋى كەرەك. جۇڭگو جاق جاپونيا جاقتى جۇڭگو جاقتىڭ قاتىستى ناقتى تۇلعالارىن ەكسپورتتى باسقارۋ – تەجەۋ شارالارى اتقارىلاتىن ەڭ سوڭعى الارماندار تىزىمدىگىنەن شىعارىپ تاستاۋعا قۋزايدى. ەكى جاقتىڭ دۇنيە جۇزىلىك ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىن بىرگە قورعاپ، وڭىرلىك ەكونوميكالىق سەلبەستىك ءۇردىسىن ىلگەرىلەتىپ، دۇنيە ءجۇزى ەكونوميكاسىنا اناعۇرلىم كوپ ورنىقتىلىق سيلاۋىن ءۇمىت ەتەدى.

ريوسەي اكازاۋا مىنانى ءبىلدىردى: جاپونيا جاق جۇڭگومەن بولعان ەكونوميكا – ساۋدا قارىم – قاتىناسىن دامىتۋعا ءمان بەرەدى، جۇڭگو جاقپەن بىرگە ناتيجەلى، ورنىقتى قارىم – قاتىناستى قالىپتاستىرىپ، ساياسات جونىندەگى كەڭەسۋدى بەلسەندى ورىستەتىپ، ءوزارا تۇسىنىستىكتى تەرەڭدەتىپ، ناقتى سالالارداعى سەلبەستىكتى كەڭەيتىپ، ەرەجەلەردى نەگىز ەتكەن حالىقارالىق ەكونوميكالىق ءتارتىپتى بىرگە قورعاۋدى قالايدى.

كەلۋ قاينارى: حالىق تورابى