ستۋدەنتتىڭ جوعالتقان ازاماتتىق كۋالىگىن باسقالار پايدالانعان

جۇمىسشىلار گازەتىنىڭ ءتىلشىسى ۋاڭ شياۋيىڭ، ەرىكتى ءتىلشىسى چىن چيۋيان حابارلايدى. ءبىر ستۋدەنت ابايسىزدا ازاماتتىق كۋالىگىن جوعالتىپ الادى، كەيىن ءوزىنىڭ ەكى سەرىكتەستىكتىڭ زاڭدىق ۋاكىلى بولىپ تىركەلگەنىن بايقايدى. سوت مەكەمەسى ۇكىم شىعارىپ، A سەرىكتەستىك، B سەرىكتەستىك جانە لي X سىندى ءۇش ايىپكەرگە ۇكىم كۇشكە يە بولعاننان كەيىن ءبىر اي ىشىندە تالاپكەر جاڭ X تىڭ ازاماتتىق كۋالىگىمەن ونەركاسىپ – ساۋدا تاراۋلارىنا تىركەۋگە الدىرعان ينفورماتسيالاردى كۇشىنەن قالدىرۋدى نەمەسە وزگەرتىپ تىركەتۋدى بۇيىرادى.

ۇعىسۋعا قاراعاندا، جاڭ فاميليالى 2017 – جىلى 1 – ايدىڭ 5 – كۇنى ازاماتتىق كۋالىگىن جوعالتىپ الادى. 2025 – جىلى ول ءوزىنىڭ A ،B ەكى سەرىكتەستىكتىڭ جارناگەرى ءارى زاڭدىق ۋاكىلى، ءارى ءبىر جەكەشە ونەركاسىپ – ساۋدا دۇكەنىنىڭ تيجاراتشىسى بولىپ تىركەلگەنىن، اتالعان جەكەشە ونەركاسىپ – ساۋدا دۇكەنىنىڭ يەسى لي X ەكەنىن بايقايدى.

جاڭ X مەكتەپتە وقىپ جاتقان ستۋدەنت بولاتىن، ۇزاق ۋاقىتتان بەرى مەكتەپتە بولعان، ەشقانداي قاتىستى قۇجاتقا قول قويماعان. ازاماتتىق كۋالىگىن باسقالاردىڭ پايدالانۋى ونىڭ جەكەلىك ينفورماتسياسىنىڭ حاۋىپسىزدىگىنە اۋىر قاتەر ءتوندىرىپ قويماستان، ونىڭ ۇيرەنۋى مەن تۇرمىسىنا جانە بولاشاقتاعى كاسىپتىك دامۋىنا كوپتەگەن كومەسكى قاتەر توندىرگەن. سوندىقتان، جاڭ X سوت مەكەمەسىنە ارىز – شاعىم جولداپ، A سەرىكتەستىك، B سەرىكتەستىك جانە لي X سىندى ءۇش ايىپكەردەن ونەركاسىپ – ساۋدا تاراۋلارىندا تىركەلگەن وزىنە قاتىستى ينفورماتسيالاردى كۇشىنەن قالدىرۋدى نەمەسە وزگەرتىپ تىركەتۋدى تالاپ ەتەدى.

سوت مەكەمەسى تەكسەرۋ ارقىلى بىلاي دەپ قاراعان: تالاپكەر جاڭ X ازاماتتىق كۋالىگىن جوعالتقان سوڭ، ءۇش ايىپكەر ازاماتتىق كۋالىك يەسى قاتىناسپاعان، ۇقىق بەرمەگەن جاعدايدا، ءوز بەتىنشە جاڭ X تىڭ ازاماتتىق كۋالىگىنىڭ ينفورماتسيالارىن ساۋدالىق ىستەردى تىركەۋگە الدىرۋعا پايدالانعان. ءۇش ايىپكەردىڭ ارەكەتى تالاپكەر جاڭ X تىڭ اتى – ءجون ۇقىعىنا قول سۇعۋ سانالاتىنى ايقىن، ساۋدالىق ىستەردى تىركەۋگە الدىرۋدا شىنايى ازاماتتىق كۋالىك ينفورماتسياسىن قولدانۋ قاجەت، ءۇش ايىپكەردىڭ باسقالاردىڭ ازاماتتىق كۋالىگىن پايدالانۋى ساۋدالىق ىستەردى تىركەۋگە الدىرۋدىڭ زاڭدىلىعى مەن شىنايىلىعى پرينسيبىنە قايشى كەلگەن.

سوتشى مىنانى ەسكەرتەدى: ازاماتتىق كۋالىكتى ويداعىداي ساقتاۋ كەرەك، ونى جوعالتىپ العان جاعدايدا دەر كەزىندە تىزىمدەتۋ ءارى تولىقتاپ ءبىتىرۋ كەرەك. ەگەر ازاماتتىق كۋالىگىڭىزدىڭ ينفورماتسيالارىن باسقالار پايدالانىپ جۇرگەنىن بايقاساڭىز، زاڭ قارۋىنان پايدالانىپ، ءوزىڭىزدىڭ زاڭدى ۇقىق – مۇددەڭىزدى قورعاڭىز.

كەلۋ قاينارى: حالىق تورابى