حالىق اقشاسىمەن ناق اقشا تۇرىندە اقى الۋ – اقى تولەۋگە ساياتىن جاڭا بەلگىلەمە! 2 – ايدىڭ 1 – كۇنىنەن باستاپ اتقارىلادى

كوڭىل بولىڭىزدەر! 2026 – جىلى 2 – ايدىڭ 1 – كۇنىنەن باستاپ، حالىق اقشاسىمەن ناق اقشا تۇرىندە اقى الۋ – اقى تولەۋگە ساياتىن جاڭا بەلگىلەمە رەسمي اتقارىلادى، ناق اقشانى الۋدان باس تارتۋعا جولىقساڭىز، ۇقىعىڭىزدى قورعاۋىڭىزعا بولادى.

جۋىردا جۇڭگو حالىق بانكەسى مەملەكەتتىك دامۋ – رەفورما كوميتەتىمەن، فينانستى باقىلاۋ – باسقارۋ باس مەڭگەرمەسىمەن بىرگە «حالىق اقشاسىمەن ناق اقشا تۇرىندە اقى الۋ – اقى تولەۋ جانە قىزمەت وتەۋ جونىندەگى بەلگىلەمەنى» دايىنداعان. «بەلگىلەمە» تۇرگە ءبولىپ باسقارۋ جانە جالپى بەتتىك قولدانۋ پرينسيبى نەگىزىندە، ناق اقشامەن اقى تولەۋدى قامتاماسىزداندىرۋدا قويىلاتىن نەگىزگى تالاپتاردى ورتاعا قويعان. باستىسى، مىناداي بىرنەشە مازمۇندى قامتيدى:

بىرىنشىدەن، اقى الاتىن ادام ورنالاستىرىپ، بەتپە – بەت قىزمەت وتەۋ، سونداي – اق، ينتەرنەت ارقىلى تاپسىرىس بەرۋ، ساۋدالاسۋ، ينتەرنەتتەن تىس قىزمەت وتەۋ نەمەسە زاتتى تاپسىرۋ سىندى بەتپە – بەت اقى الۋعا شارت – جاعداي بار جاعدايدا، ناق اقشا تولەۋگە قولداۋ كورسەتۋ، ۇيلەسىمدى مولشەردە ۇساق اقشا دايىنداپ قويۋ كەرەك.

ەكىنشىدەن، قىزمەتكەر ورنالاستىرىلماعان، ماشينا – اسپاپتار قاتارلى اۆتوماتتى قىزمەت وتەۋ فورماسى قولدانىلعان بولسا، سونداي – اق، ”ءبىر كارتۋچكامەن بارلىق ەسەپتى جابۋ“ فورماسى قولدانىلعان ءبىرتۇتاس باسقارىلاتىن ونەركاسىپ رايونى، زاۆود رايونى، كورىنىس رايونى، مەكتەپ قاتارلى ورىنداردا تيجارات نەگىزگى تۇلعالارى كورنەۋ ورىنعا اقى تولەۋ تاسىلدەرىن، ناق اقشا اۋىستىرىپ الۋ ءتاسىلىن جانە قىزمەت وتەۋ بايلانىس ءنومىرىن ەسكەرتىپ قويۋى كەرەك.

ۇشىنشىدەن، بارلىق ساۋدا، اقى تولەۋ، قىزمەت وتەۋ تۇگەلدەي ينتەرنەت ارقىلى بىتىرىلەتىن جاعدايدا، اقى الاتىن ورىن، تيجارات نەگىزگى تۇلعاسى اقى تولەۋ ءتاسىلىن الدىن الا اشىق جاريالاۋى، جۇرتشىلىقتىڭ ءبىلۋ ۇقىعى مەن تاڭداۋ ۇقىعىنا تولىق قۇرمەت ەتۋى كەرەك.

تورتىنشىدەن، اقى الاتىن ورىن مەن تيجارات نەگىزگى تۇلعاسى اقى الۋدى باسقا ورىندارعا مىندەتتەگەن جاعدايدا، مىندەتتەۋشى جاق كەلىسىمشارت، ۇقتىرۋ، مالىمدەمە قاتارلى جازباشا فورمالار ارقىلى مىندەتتى قابىلداۋشى جاقتان ناق اقشا الۋدان باس تارتپاۋدى تالاپ ەتۋى كەرەك.

بەسىنشىدەن، اقى الاتىن ورىن اكىمشىلىك ىستەردى سيفرلاندىرۋدى جالپىلاستىرعان جاعدايدا، تيجارات نەگىزگى تۇلعاسى ساۋدا فورماسىندا جاڭالىق اشقان كەزدە، جۇرتشىلىقتىڭ ناق اقشانى قولدانۋ قاجەتى مەن توساتتان تۋىنداۋى مۇمكىن جاعدايلاردى تولىق ويلاستىرۋى، ناق اقشامەن اقى تولەۋشىلەردى قاقپايلاماۋى نەمەسە الالاماۋى كەرەك.

كەلۋ قاينارى: حالىق تورابى