شي جينپيڭ ەگيپەت زۇڭتۇڭى سيسيمەن جۇڭگو مەن ەگيپەتتىڭ ديپلوماتيالىق قاتىناس ورناتقاندىعىنىڭ 70 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 5 - ايدىڭ 30 - كۇنى بەيجيڭنەن بەرگەن حابارى. 5 - ايدىڭ 30 - كۇنى مەملەكەت ءتوراعاسى شي جينپيڭ ەگيپەت زۇڭتۇڭى سيسيمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قاتىناس ورناتقاندىعىنىڭ 70 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: ەگيپەت جاڭا جۇڭگومەن ەڭ ەرتە ديپلوماتيالىق قاتىناس ورناتقان اراب جانە افريكا مەملەكەتى. ديپلوماتيالىق قاتىناس ورناتقان 70 جىلدان بەرى، حالىقارالىق جانە وڭىرلىك جاعداي مەيلى قالاي وزگەرسە دە، ەكى ەل باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، ءوزارا سەنىم ارتىپ، ءبىر - بىرىنە قارايلاسىپ كەلدى، جۇڭگو − ەگيپەت قاتىناسى وركەندەپ كەلە جاتقان ەلدەردىڭ تاتۋ - ءتاتتى ءوتۋىنىڭ، ىنتىماقتاسىپ ىستەستىك جاساۋىنىڭ ۇلگىسىنە جانە جۇڭگو − اراب ەلدەرى، جۇڭگو − افريكا ەلدەرى توپتىق سەلبەستىگىنىڭ ۇلگىسىنە اينالىپ، جاڭا ءداۋىر تاعدىرلاس ورتاق تۇلعا قۇرۋعا بەت الۋ نىساناسىنا قاراي ارشىندى قاداممەن العا باسۋدا. جۇڭگو مەن ەگيپەت ەكى ەل دۇنيە جۇزىندەگى وركەنيەتتى بايىرعى ەلدەر جانە جەر شارىنىڭ وڭتۇستىگىنىڭ ماڭىزدى مۇشەسى رەتىندە، تاريحتان اقىل - پاراسات جانە كۇش - قۋات الىپ، بەيبىتشىلىككە تالپىنۋ، دامۋدى كوزدەۋ، سەلبەستىكتى جەبەۋ، ادىلەتتىلىكتى اسقاقتاتۋ سىندى ءداۋىر بورىشىن ارقالاپ، ادامزاتتىڭ تاعدىرلاس ورتاق تۇلعاسىن قۇرۋعا قۋاتتى قوزعاۋشى كۇشىن ۇستەۋى كەرەك.

شي جينپيڭ بىلاي دەپ باسا دارىپتەدى: مەن جۇڭگو − ەگيپەت قاتىناسىنىڭ دامۋىنا وسكەلەڭ ءمان بەرەمىن، سيسي زۇڭتۇڭمەن بىرگە قۇلشىنىپ، ديپلوماتيالىق قاتىناس ورناتىلعاندىعىنىڭ 70 جىلدىعىن تىڭ باستاما ەتىپ، ءداستۇرلى دوستىقتى جالعاستىرىپ، ءار سالاداعى اۋىس - كۇيىستى، سەلبەستىكتى كۇشەيتىپ، جۇڭگو − ەگيپەت قاتىناسىنىڭ اناعۇرلىم ستراتەگيالىق جەتەكشىلىك قۋاتقا، دامۋ بىرىككەن كۇشىنە، حالىقارالىق ىقپالعا يە بولۋىن ىلگەرىلەتىپ، ەكى ەل حالقىن اناعۇرلىم جاقسى يگىلىككە كەنەلدىرىپ، حالىقارانىڭ جانە ءوڭىردىڭ بەيبىتشىلىگى مەن دامۋىنا اناعۇرلىم زور ۇلەس قوسۋدى قالايمىن.

سيسي مىنالاردى ءبىلدىردى: ەگيپەت پەن جۇڭگو ەكى ەل ءارقايسى تاريحي مەزگىلدە يىق سۇيەسە بىرگە تۇردى. 70 جىلدان بەرى ەكى ەل باسشىلارىنىڭ ورتاق جەتەكشىلىگىندە، ەگيپەت − جۇڭگو قاتىناسى ۇزدىكسىز دامىدى. مەن ەگيپەت − جۇڭگو قاتىناسىندا قول جەتكەن ماڭىزدى تابىستاردى القايمىن، ءتوراعا شي جينپيڭمەن بىرگە ەكى جاقتى قاتىناستى ىلگەرىلەتۋدە اناعۇرلىم مول سۇبەلى تابىستارعا قول جەتكىزۋدى ۇزدىكسىز جەبەپ، الەمدىك سىن - سايىستارعا اناعۇرلىم ورنىقتى، اناعۇرلىم پارمەندى توتەپ بەرە الاتىن كوپ ۇيەكتى دۇنيە ءجۇزىن بىرگە قۇرىپ، ءار ەلدىڭ جاپپاي دامۋ جەتىستىكتەرىن بولىسۋىنە، بەيبىتشىلىك پەن حاۋىپسىزدىكتى بىرگە جۇزەگە اسىرۋىنا مۇمكىندىك جاساۋدى ءۇمىت ەتەمىن.

سول كۇنى مەملەكەتتىك كەڭەستىڭ زۇڭليى لي چياڭ ەگيپەت زۇڭليى مادبۋريمەن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: جۇڭگو جاق ەگيپەت جاقپەن بىرگە قۇلشىنىپ، ەكى ەلدىڭ مەملەكەت باسشىلارىنىڭ ماڭىزدى ورتاق تانىمدارىن جاپپاي تياناقتاندىرىپ، ”ءبىر بەلدەۋ، ءبىر جولدى“ جوعارى ساپالى بىرگە قۇرۋدى ىلگەرىلەتۋدى جەدەلدەتىپ، ءار سالاداعى اۋىس - كۇيىستى، سەلبەستىكتى جيىلەتىپ، جۇڭگو مەن ەگيپەتتىڭ جاپپاي ستراتەگيالىق سەرىكتەستىك قاتىناسىنىڭ ۇزدىكسىز دامۋىن ىلگەرىلەتىپ، ەكى ەل حالقىن اناعۇرلىم ويداعىداي يگىلىككە كەنەلدىرۋدى قالايدى.

مادبۋري مىنالاردى ءبىلدىردى: 70 جىلدان بەرى ەگيپەت − جۇڭگو قاتىناسى باياندى دامۋعا قول جەتكىزدى، ەكى جاقتى سەلبەستىك بۇرىن بولماعان جەتىستىكتەرگە قول جەتكىزدى. ەگيپەت جاق جۇڭگو جاقپەن سەلبەستىكتى ۇزدىكسىز كۇشەيتىپ، ەكونوميكا، عىلىم - تەحنولوگيا سياقتى سالالاردا اناعۇرلىم كوپ تابىسقا جەتىپ، دوس ەكى ەلدى جانە ەكى ەل حالقىن يگىلىككە كەنەلدىرۋدى ءۇمىت ەتەدى.