شي جينپيڭ جين جىڭىنمەن كەڭەس وتكىزدى

سول جەر ۋاقىتى 6 - ايدىڭ 8 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ پيڭراڭداعى جينشيۋشان يىڭبيڭ قوناق سارايىندا چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

سول جەر ۋاقىتى 6 - ايدىڭ 8 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ پيڭراڭداعى جينشيۋشان يىڭبيڭ قوناق سارايىندا چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 6 - ايدىڭ 8 - كۇنى، پيڭراڭ (ءتىلشى دۋ شاڭزى). سول جەر ۋاقىتى 6 - ايدىڭ 8 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ پيڭراڭداعى جينشيۋشان يىڭبيڭ قوناق سارايىندا چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنمەن كەڭەس وتكىزدى.

شي جينپيڭ بىلاي دەپ اتاپ كورسەتتى: 7 جىلدان كەيىن تاعى دا كورىكتى پيڭراڭعا ساپارلاي كەلگەنىمە توتەنشە قۋانىشتامىن ءارى وزگەشە جاقىندىقتى سەزىنىپ وتىرمىن. مەن باس شۋجي جولداسپەن بىرگە وسى رەتكى ساپاردى وراي ەتىپ، جاڭا داۋىردەگى جۇڭگو - چاۋشيان قاتىناسىن جوعارى دەڭگەيدە جوبالاۋدى جانە ستراتەگيالىق جەتەكشىلىكتى كۇشەيتىپ، جۇڭگو - چاۋشيان قاتىناسىنىڭ داۋىرمەن جارىسا العا باسۋىن، اناعۇرلىم زور دامۋعا قول جەتكىزۋىن ىلگەرىلەتىپ، ەكى ەلدى جانە ەكى ەل حالقىن اناعۇرلىم ويداعىداي باقىتقا كەنەلتىپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگى، ورنىقتىلىعى جانە دامىپ، گۇلدەنۋى ءۇشىن بەلسەندى ۇلەس قوسۋدى قالايمىن.

شي جينپيڭ بىلاي دەپ باسا دارىپتەدى: جۇڭگو مەن چاۋشياننىڭ ءار ەكەۋى دە _ كوممۋنيستىك پارتيا باسشىلىعىنداعى سوتسياليستىك مەملەكەت. جۇڭگو مەن چاۋشياننىڭ ءداستۇرلى دوستىعى ەكى جاقتىڭ ورتاق مۇرات - سەنىمى مەن كۇرەس نىساناسىنا تامىر تارتقان، تەرەڭ تاريحي قورى، مىعىم ساياسي نەگىزى، بەرىك سۇيىسپەنشىلىك دانەكەرى بار، ۇرپاقتان - ۇرپاققا جالعاسقان دوستىق، تاعدىرلاستىق، ءبىر - بىرىنە قارايلاسۋ باستان - اياق جۇڭگو - چاۋشيان قاتىناسىنىڭ ايقىن ەرەكشەلىگى بولىپ كەلەدى. حالىقارالىق جاعداي قالاي وزگەرسە دە، جۇڭگونىڭ پارتياسى مەن ۇكىمەتىنىڭ جۇڭگو مەن چاۋشياننىڭ ءداستۇرلى دوستىعىنا ايرىقشا ءمان بەرەتىن بەرىك مايدانى وزگەرمەيدى، باس شۋجي جين جىڭىن جولداستىڭ چاۋشياننىڭ سوتسياليزم ىستەرىنە باسشىلىق ەتۋىن باتىل قولداۋى وزگەرمەيدى، جۇڭگو مەن چاۋشياننىڭ ورتاق مۇددەسى مەن تاماشا ستراتەگيالىق ورتاسىن قورعاۋ بەرىك بەكىمى وزگەرمەيدى.

شي جينپيڭ بىلاي دەپ اتاپ كورسەتتى: دۇنيە جۇزىندە 100 جىلدا بولماعان وزگەرىس جەدەل قۇبىلعان جاعدايدا، ەكى جاق بيىكتە تۇرىپ، الىسقا كوز جىبەرىپ، بۇرىنعىعا مۇراگەر بولىپ، كەيىنگىگە جول اشىپ، ەكى پارتيا، ەكى ەل قاتىناسىنىڭ دامۋ بارىسىنان اقىل - پاراسات قابىلداپ، ادامزات تاريحىنىڭ دامۋ اۋقىمىندا ورايدى يگەرىپ، جۇڭگو مەن چاۋشياننىڭ ءداستۇرلى دوستىعىنا جاڭا داۋىرلىك ءمان جانە پارمەندى قوزعاۋشى كۇش ۇستەپ، ەكى ەلدىڭ سوتسياليزم ىستەرىندە جانە ءوڭىردىڭ بەيبىتشىلىگى مەن دامۋىندا اناعۇرلىم كوركەم بولاشاق جاراتۋى كەرەك.

شي جينپيڭ جۇڭگو - چاۋشيان قاتىناسىن دامىتۋ جونىندە 4 ءتۇرلى پىكىردى العا قويدى.

ءبىرىنشى، جوعارى جىكتەگىلەردىڭ بارىس - كەلىسىن جەتەكشى ەتۋگە تاباندى بولىپ، ساياسي ءوزارا سەنىمدىلىكتىڭ نەگىزىن بەكەمدەۋ. ەڭ جوعارى باسشىنىڭ ستراتەگيالىق جەتەكشىلىگى _ جۇڭگو - چاۋشيان قاتىناسىنىڭ ەڭ زور ابزالدىعى. مەن باس شۋجي جولداسپەن تىعىز ستراتەگيالىق قاتىناستى ساقتاپ، جۇڭگو - چاۋشيان قاتىناسىنىڭ ۇزدىكسىز تىڭ دەڭگەيگە كوتەرىلۋىنە جەتەكشىلىك ەتۋدى قالايمىن. بيىل _ «جۇڭگو - چاۋشيان دوستىق سەلبەستىك ءوزارا كومەكتەسۋ شارتىنا» قول قويىلعاندىعىنىڭ 65 جىلدىعى، ەكى جاق ەسكە ءتۇسىرۋ قيمىلىن سالتاناتتى وتكىزۋى كەرەك. ەكى پارتيا قاتىناسى جۇڭگو - چاۋشيان قاتىناسىنىڭ دامۋىندا ماڭىزدى جەتەكشىلىك رول اتقارادى، ەكى پارتيانىڭ ءار دارەجەلى، ءار سالاداعى دوستىق بارىس - كەلىسىن ونان ارى كەڭەيتىپ جانە جانداندىرىپ، پارتيانى، مەملەكەتتى باسقارۋ تاجىريبەلەرىن اۋىستىرۋدى، ءوزارا ۇلگى الۋدى تەرەڭدەتۋ كەرەك. ەكى جاق ديپلوماتيا، زاڭ اتقارۋ، ارميا سياقتى جاقتارداعى اۋىس - كۇيىستى كۇشەيتىپ، باس شۋجي جولداس ەكەۋىمىز كەلىسكەن ماڭىزدى ورتاق تانىمدى ويداعىداي تياناقتاندىرىپ، جۇڭگو - چاۋشيان قاتىناسىنىڭ دامۋىنا اقىل - پاراسات جانە كۇش - قۋات توپتاۋى كەرەك.

ەكىنشى، حالىقتى باقىتقا كەنەلتۋدى نىسانا ەتۋگە تاباندى بولىپ، ناقتى سەلبەستىك دەڭگەيىن جوعارىلاتۋ. جۇڭگو جاق چاۋشيان جاقپەن دامۋ ستراتەگياسىن ۇشتاستىرۋدى كۇشەيتىپ، ەكونوميكا - ساۋدا، اۋىل شارۋاشىلىعى، قۇرىلىس، عىلىم - تەحنيكا، ەمدەۋ، دەنساۋلىق ساقتاۋ سياقتى سالالارداعى ناقتى سەلبەستىكتى كەڭەيتىپ، ەكى ەل حالقىنا ءتىپتى دە زور باقىت جاراتۋدى قالايدى. ەكى جاق شەكارا وتكەلدەرىنىڭ جالپى بەتتىك قالپىنا كەلۋىن، حالىقتىق اۆياتسيا كەزەكشى ۇشاقتارىنىڭ جانە حالىقارالىق جولاۋشى پويەزدەرىنىڭ قاتىناۋىن وراي ەتىپ، ادامداردىڭ بارىس - كەلىس كولەمىن كەڭەيتۋى، قوس باعىتتا اتتانۋدى جۇزەگە اسىرۋى كەرەك.

ءۇشىنشى، دوستىقتى جالعاستىرۋدى قوزعاۋشى كۇش ەتۋگە تاباندى بولىپ، حالىق تىلەگىن توعىستىرۋ دانەكەرىن نىعايتۋ. جۇڭگو مەن چاۋشيان ىستىق قانمەن سومداعان ءداستۇرلى دوستىق _ ەكى ەل حالقىنىڭ ورتاق قاستەرلى بايلىعى. جۇڭگو جاق چاۋشيان جاقپەن بىرگە چاۋشيانداعى ەرىكتىلەر ارمياسى قۇرباندارىن ەسكە ءتۇسىرۋ قۇرىلعىلارىن بىرگە ويداعىداي قورعاپ، ويداعىداي باسقارىپ، ەرەكشەلىككە يە توڭكەرىستىك ءداستۇر تاربيەسىن، جاستار مەن ورەندەردىڭ يدەيالىق تاربيەسىن ورىستەتىپ، ەكى ەلدىڭ توڭكەرىستىك گەنىن جانە ءداستۇرلى دوستىعىن ويداعىداي جالعاستىرۋدى قالايدى. جۇڭگو جاق چاۋشيان جاقپەن وزدەرىنىڭ ابزال بايلىقتارىنان ويداعىداي پايدالانىپ، وقۋ - اعارتۋ، ادەبيەت - كوركەمونەر، ساياحات، دەنە تاربيە، مەديا، جاستار ىستەرى، جەرگىلىكتى ورىندار، دوس قالالار سياقتى جاقتارداعى اۋىس - كۇيىستى، سەلبەستىكتى كۇشەيتىپ، جۇڭگو مەن چاۋشياننىڭ ءداستۇرلى دوستىعىن جۇرت جۇرەگىنە اناعۇرلىم تەرەڭ ۇيالاتۋدى قالايدى.

ءتورتىنشى، تەڭدىك جانە ادىلدىك ۇستانىمىنا تاباندى بولىپ، ستراتەگيالىق سەلبەستىكتىڭ مازمۇنىن بايىتۋ. ادامزاتتىڭ قايدا بارۋى سىندى كەلەلى تاقىرىپ الدىندا، مەن ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن 4 ۇلكەن دۇنيە جۇزىلىك باستامانى العا قويدىم، دۇنيە جۇزىلىك باسقارۋدىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتىپ، چاۋشياندى قامتىعان حالىقارالىق قوعامنىڭ جالپى بەتتىك قولداۋىنا جانە بەلسەنە ءۇن قوسۋىنا يە بولۋدى ءۇمىت ەتەمىن. ازيا _ جۇڭگو، چاۋشيان قاتارلى وڭىردەگى ەلدەردىڭ تابان تىرەر تياناعى. جۇڭگو مەن چاۋشيان ستراتەگيالىق سايكەسۋدى جانە سەلبەسۋدى كۇشەيتىپ، وزدەرىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعاپ، ءوڭىردىڭ بەيبىتشىلىگى مەن دامۋىن بىرگە قورعاۋى كەرەك.

جين جىڭىن مىنالاردى ءبىلدىردى: باس شۋجي شي جينپيڭ جولداس اراعا 7 جىل سالىپ چاۋشيانعا تاعى دا ساپارلاي كەلدى، چاۋشيان حالقىنىڭ ەڭ قۇرمەتتى سيلى قوناعى، ءبىز ەڭ سالتاناتتى، ەڭ قىزۋ مەرەيلى قارسى الاتىندىعىمىزدى بىلدىرەمىز. باس شۋجي شي جينپيڭنىڭ بيىلعى تۇڭعىش ساپارىندا پيڭراڭعا كەلۋى چاۋشيان مەن جۇڭگونىڭ قاتىناسىنا ايرىقشا ءمان بەرەتىندىگىن جانە دوستىق سۇيىسپەنشىلىگىن ايگىلەيدى، بۇل چاۋشيانعا زور شابىت بولدى. وسى رەتكى ساپار ۇزاق سىننان وتكەن، باستان - اياق دەربەس جانە ادىلەتتى تاريحتىڭ دۇرىس جاعىندا تۇرعان چاۋشيان - جۇڭگو قاتىناسىنىڭ قانشاما بەرىك ەكەندىگىن تاعى ءبىر رەت ايقىن كورسەتتى. چاۋشيان مەن جۇڭگونىڭ ەرەكشەلىگى ءبىزدىڭ ءبىر - بىرىمىزگە كورشى ەل بولۋىمىزدا عانا ەمەس، ونان دا ماڭىزدىسى، ەكى جاقتىڭ تەرەڭ ءداستۇرلى دوستىعى مەن ورتاق مۇرات - سەنىمگە يە بولعاندىعىندا، سونداي - اق ءبىر - ءبىرىمىزدى قاستەرلەگەندىگىمىزدە جانە ۇرپاقتان - ۇرپاققا جالعاستىرعاندىعىمىزدا.

جين جىڭىن مىنالاردى ءبىلدىردى: بىلتىر 9 - ايدا باس شۋجي شي جينپيڭمەن بەيجيڭدە كەزدەسكەننەن كەيىن، ەكى ەل قاتىناسى ءار سالادا تەبىندى دامىپ، ەكى ەل حالقىنا ناقتى ىرىس - قۇت اكەلدى. باس شۋجي شي جينپيڭ جولداستىڭ جاڭا داۋىردەگى چاۋشيان - جۇڭگو قاتىناسىن دامىتۋ جونىندە العا قويعان ماڭىزدى پىكىرىنە شىن جۇرەكتەن العىس ايتامىن، چاۋشيان جاقتىڭ ءارقايسى تاراۋلارى جۇڭگو جاقتاعى جولداستارمەن بىرگە بار كۇشپەن جالپى بەتتىك تياناقتاندىرىپ، ەكى جاقتىڭ ەكونوميكا - ساۋدا، نەگىزدىك قۇرىلعى، عىلىم - تەحنيكا، وقۋ - اعارتۋ، گۋمانيتارلىق سياقتى كەڭ سالاداعى اۋىس - كۇيىسى مەن سەلبەستىگىنىڭ تىڭ دامۋعا قول جەتكىزۋىن ىلگەرىلەتەدى، پارتيالار اراسىنداعى ارنا ارقىلى تاجىريبە اۋىستىرۋدى، ءوزارا ۇلگى الۋدى كۇشەيتىپ، چاۋشيان جاقتىڭ سوتسياليستىك قۇرىلىس ىستەرىنىڭ دامۋىنا قاستەرلى دەمەۋ بەرىپ، چاۋشيان حالقىنىڭ جۇڭگو حالقىمەن بىرگە وسىزاماندانۋ جولىنا قادام تاستاۋىنا كومەكتەسەدى.

جين جىڭىن مىنالاردى ءبىلدىردى: چاۋشيان جاق باس شۋجي شي جينپيڭ جولداستىڭ باسشىلىعىندا جۇڭگونىڭ دۇنيە ءجۇزىن تاڭ قالدىرعان دامۋ جەتىستىكتەرىنە قول جەتكىزىپ، حالىقارالىق ورنىنىڭ بارىنشا جوعارىلاعانىن قۋانىشپەن كورىپ وتىر. باس شۋجي شي جينپيڭ العا قويعان ادامزاتتىڭ تاعدىرلاس ورتاق تۇلعاسى ۇستانىمى مەن 4 ۇلكەن دۇنيە جۇزىلىك باستاما دۇنيە ءجۇزىنىڭ بەيبىتشىلىگى مەن دامۋىن جەبەۋدە تەرەڭ مانگە يە، سونداي - اق، دۇنيە ءجۇزى حالقىنىڭ قولداۋى مەن القاۋىنا يە بولدى. تاياۋ جىلداردان بەرى حالىقارالىق قوعام بۇرىن بولىپ كورمەگەن وراسان زور وزگەرىستەردى باستان كەشىرۋدە، چاۋشيان جاق باستان - اياق ءبىر جۇڭگو پرينسيبىنە تاباندى بولادى، جۇڭگونىڭ وزەكتى مۇددەسىن قورعاۋ ساياساتى مەن مايدانىن باتىل قولدايدى. جاڭا داۋىردەگى چاۋشيان - جۇڭگو دوستىعىن بەكەمدەۋ جانە دامىتۋ _ حالىقتىڭ تالعامى، ءداۋىردىڭ قاجەتى، چاۋشيان جاقتىڭ باستان - اياق وزگەرمەيتىن ستراتەگيالىق تالعامى جانە بۇلجىماس ستراتەگيالىق ەركى. ءبىز بۇرىنعىداي چاۋشيان - جۇڭگو قاتىناسىن دامىتۋدى مەملەكەتتىڭ ەڭ ماڭىزدى ءبىرىنشى ستراتەگيالىق ءىسى ەتىپ، چاۋشيان - جۇڭگو قاتىناسىن مەملەكەتتەر ارا قاتىناستىڭ ۇلگىسى ەتىپ قۇرىپ شىعۋ ءۇشىن بار كۇشىمىزدى سالىپ، ءوڭىردىڭ جانە دۇنيە ءجۇزىنىڭ بەيبىتشىلىگىنە، گۇلدەنۋىنە بىرگە ۇلەس قوسامىز.

ساي چي، ۋاڭ ي قاتارلىلار كەڭەستە بىرگە بولدى.

كەلۋ قاينارى: حالىق تورابى