باسقالاردى مەملەكەت شەكاراسىنان جاسىرىن وتۋگە ۇيىمداستىرعان ەكى قىلمىس كۇماندىسى ەلگە قايتارىلدى 

شينحۋا اگەنتتىگىنىڭ 6 - ايدىڭ 15 - كۇنى بەيجيڭنەن بەرگەن حابارى. مەملەكەتتىك كوشى - قوندى باسقارۋ مەڭگەرمەسىنىڭ 6 - ايدىڭ 15 - كۇنى حابارلاۋىنشا، جۋىردا ەلىمىزدىڭ زاڭ اتقارۋ تاراۋلارىنىڭ سايكەستىرە وتىرىپ ىلگەرىلەتۋىندە، ۇزاق ۋاقىت بويى شەكارا سىرتىندا تابان تىرەپ، باسقالاردى مەملەكەت شەكاراسىنان جاسىرىن وتۋگە ۇيىمداستىرعان قىلمىس كۇماندىلارى جاڭ X پەن يۇڭ Xجين ۇستالىپ، ەلىمىزگە قايتارىلدى.

2023 - جىلى 7 - ايدا جياڭسۋ ولكەسى شۇيجوۋ قالالىق قوعام حاۋىپسىزدىگى مەكەمەسىنىڭ شەكارا اتتاپ كىرىپ - شىعۋدى باسقارۋ تاراۋلارى قىزمەت بارىسىندا جاڭ X پەن يۇڭ Xجين اتاماندىعىنداعى قىلمىستىق توپتىڭ ۇزاق ۋاقىت بويى شەكارا سىرتىندا جاسىرىنىپ، باسقالاردى مەملەكەت شەكاراسىنان جاسىرىن وتۋگە ۇيىمداستىرۋ سىندى قىلمىستىق ارەكەتپەن شۇعىلدانعاندىعىن بايقايدى. تەكسەرۋگە قاراعاندا، 2022 - جىلدان بەرى جاڭ X پەن يۇڭ Xجين شەكارا سىرتىندا تۇرىپ مەڭگەرۋ جانە جەتەكشىلىك ەتۋ ارقىلى كوپتەگەن جۇڭگو ازاماتتارىن مەملەكەت شەكاراسىنان جاسىرىن ءوتىپ، شەكارا سىرتىندا زاڭسىز قيمىلدارمەن شۇعىلدانۋعا ۇيىمداستىرعان. مەملەكەتتىك كوشى – قوندى باسقارۋ مەڭگەرمەسى بۇل دەلونى بەلگى قويىپ قۋزاۋ سالاتىن دەلولار قاتارىنا قوسقان ءارى ەكى جاقتىڭ زاڭ اتقارۋ جاعىنداعى سەلبەستىك ارناسى ارقىلى قىلمىسكەردى ۇستاۋ قىزمەتىن بەلسەندىلىكپەن ورىستەتكەن. قوعام حاۋىپسىزدىگى مينيسترلىگىنىڭ، مەملەكەتتىك كوشى - قوندى باسقارۋ مەڭگەرمەسىنىڭ جانە ەلىمىزدىڭ شەتەلدەگى ەلشىلىگىنىڭ بەلسەندى سايكەستىرە وتىرىپ ىلگەرىلەتۋىندە، جۋىردا جاڭ X مەن يۇڭ Xجين ءساتتى ۇستالىپ، دەر كەزىندە ەلىمىز جاققا تاپسىرىلدى، قازىر دەلو ىشكەرىلەي تەكسەرىلۋدە.

مەملەكەتتىك كوشى - قوندى باسقارۋ مەڭگەرمەسىنىڭ قاتىستى جاۋاپتىسى بىلاي دەدى: جۋىردا كوپتەگەن مەملەكەتتەردىڭ زاڭ اتقارۋ تاراۋلارى ۇزاق ۋاقىت بويى شەكارا سىرتىندا قاشىپ ءجۇرىپ، باسقالاردى شەكارادان جاسىرىن وتۋگە ۇيىمداستىرعان قىلمىسكەرلەردى ەلىمىزگە ىلگەرىندى – كەيىندى وتكىزىپ بەردى نەمەسە قايتاردى، بۇل ەلىمىزدىڭ شەكارا اتتاعان زاڭسىز قىلمىستارعا سوققى بەرۋ قىزمەتىنىڭ پارمەندىلىگى مەن ونىمدىلىگىن تولىق ايگىلەدى. مەملەكەتتىك كوشى - قوندى باسقارۋ مەڭگەرمەسى قاتىستى تاراۋلارمەن بىرگە حالىقارالىق ساقشى ىستەرى جانە زاڭ اتقارۋ جاعىنداعى سەلبەستىكتى ىشكەرىلەي ورىستەتىپ، مۇلدە جول بەرمەۋ پوزيتسياسىمەن شەكارا اتتاعان زاڭعا قايشى قىلمىستىق توپتارعا قاتاڭ سوققى بەرىپ، قىلمىستىق تورىن ىشكەرىلەي انىقتاپ، مۇددەلىك تىزبەگىن ءۇزىپ، زاڭعا قايشى قىلمىستىق ارەكەتتەردى سوڭىنا دەيىن تەكسەرىپ، استە ىرقىنا جىبەرمەي، شەكارا اتتاپ كىرىپ - شىعۋدى باسقارۋدىڭ قالىپتى ءتارتىبىن باتىل قورعايدى.

كەلۋ قاينارى: حالىق تورابى