شي جينپيڭ بو – اۋ ازيالىق فورۋمى 2018 – جىلعى ءماجىلىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى

2018.04.10 15:56   كەلۋ قاينارى : حالىق تورابى

　　شينحۋا اگەنتتىگى، 10- ءساۋىر، حاينان بو – اۋ (ليۋ حۋا، جوۋ حۇيمين، ليۋ حۇڭشيا) بو – اۋ ازيالىق فورۋمىنىڭ 2018 – جىلعى ءماجىلىسى 10 – ءساۋىر تۇستەن بۇرىن حاينان ولكەسىنىڭ بو – اۋ قالاشىعىندا اشىلدى. مەملەكەت ءتوراعاسى شي جينپيڭ اشىلۋ سالتىنا قاتىناستى ءارى «ەسىك اشۋ ارقىلى بىرگە كوركەيىپ، جاڭالىق جاراتۋ ارقىلى بولاشاققا بەتالايىق» اتتى ارقاۋ ءسوز سويلەپ، ءار ەلدىڭ زامانا اعىسىنا ۇيلەسىپ، ەسىك اشۋ مەن تەڭ يگىلىكتەنۋگە تاباندى بولىپ ، باتىلدىقپەن رەفورما جاساپ جانە جاڭالىق جاراتىپ، ادامزاتتىڭ تاعدىرلاس ورتاق تۇلعاسىن قۇرۋ سىندى نىساناعا قاراي ۇزدىكسىز ىلگەرىلەۋى قاجەت ەكەنىن باسا دارىپتەدى؛ جۇڭگونىڭ رەفورما جاساپ، ەسىك اشۋعا تاباندى بولۋدان تانباي، ەسىك اشۋدى كەڭەيتۋ جاعىنداعى كەلەلى شارالاردى ۇزدىكسىز ورتاعا قوياتىنىن، ازياداعى جانە الەمدەگى ەلدەرمەن بىرگە، ازيا مەن الەمنىڭ تاماشا بولاشاعىن بىرگە قۇرىپ شىعاتىنىن ءبىلدىردى.


　　ءساۋىر ايىنداعى بو – اۋدا اۋا رايى جايلى، تابيعات تۇرلەنگەن. بو – اۋ ازيالىق فورۋمى حالىقارالىق ءماجىلىس ورتالىعىنىڭ نەگىزگى ءماجىلىس الاڭىندا ءار ەلدەن كەلگەن قوناقتار ءبىر اراعا باس قوستى. تۇستەن بۇرىن ساعات 9 اينالاسىندا، شي جينپيڭ مەن حانىمى پىڭ لييۋان اۆستريا پرەزيدەنتى ۆان – دەر – ۆەللەن، فيليپپين پرەزيدەنتى دۋتەرت، موڭعۇليا پرەمەر – مينيسترى حۋرەلسۋح، گوللانديا باس ءۋازىرى رۋت، پاكيستان پرەمەر – مينيسترى ابباسي، سينگاپۋر پرەمەر – مينيسترى لي شيانلۇڭ، ب م ۇ باس حاتشىسى گۋتەرەس، حالىقارالىق ۆاليۋتا قورى ۇيىمىنىڭ باس ديرەكتورى لاگارد قاتارلى شەتەلدىك باسشىلارىمەن جانە ولاردىڭ جۇبايلارىمەن بىرگە ءماجىلىس زالىنا كەلگەندە، ماجىلىسكە قاتىناسقاندار ورىندارىنان تۇرىپ، قىزۋ قارسى الدى.


　　ىقىلاستى شاپالاق ءۇنى ىشىندە، شي جينپيڭ مىنبەگە كوتەرىلىپ، ارقاۋ ءسوز سويلەدى. شي جينپيڭ مىنالاردى اتاپ كورسەتتى: بو – اۋ ازيالىق فورۋمى قۇرىلعاننان بەرى، ازيادا ورتاق تانىمدى شوعىرلاندىرۋعا، ءارقايسى جاقتاردىڭ سەلبەستىگىن ىلگەرىلەتۋگە، ەكونوميكانىڭ جاھاندانۋىن ىلگەرىلەتۋگە، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە بەلسەندى ۇلەس قوستى. بۇل جولعى جىلدىق ءماجىلىستىڭ تاقىرىبى «ەسىكتى اشىق ۇستاعان جاسامپاز ازيا، گۇلدەنىپ – كوركەيگەن الەم» بولىپ، بۇل تاقىرىپ ءداۋىر اعىمىنا ۇيلەسەدى، ءارقايسى جاقتاردىڭ ۇمىتىنە ۇيلەسەدى.


　　كەلۋ قاينارى: حالىق تورابى