وڭتۇستىك اۆياتسيا سەرىكتەستىگى 4 – ايدىڭ 22 – كۇنىنەن باستاپ ءۇرىمجى مەن موڭعۇلكۇرە ارالىعىندا قاتىنايتىن اۋە جەلىسىن اشۋدى جوسپارلاپ وتىر، بۇل شينجياڭداعى تۇڭعىش ۇستىرتتىك اۋەجايدىڭ رەسمي ىسكە قوسىلاتىنىنان دەرەك بەرەدى، موڭعۇلكۇرەگە ۇشاق قاتىنامايتىن تاريح تا اياقتالادى.
شينجياڭداعى نىشاندىق سيپاتقا يە تاۋلى وڭىردەگى ۇستىرتتىك اۋەجاي سانالاتىن موڭعۇلكۇرە تۇلپار اۋەجايى — «14 – بەسجىلدىق» مەزگىلىندە بۇكىل شينجياڭ بويىنشا تۇڭعىش رەت ىسكە قوسىلاتىن حالىقتىق تاسىمال اۋەجايى. ۇعىسۋعا قاراعاندا، بۇل رەت جاڭادان اشىلاتىن ءۇرىمجى – موڭعۇلكۇرە اراسىندا قاتىنايتىن اۋە جەلىسىندەگى تۇڭعىش كەزەكشى ۇشاق 4 – ايدىڭ 22 – كۇنى ساعات 9:15 مينۋت وتكەندە ۇرىمجىدەن ۇشادى. وڭتۇستىك اۆياتسيا سەرىكتەستىگى شينجياڭ بولىمشە سەرىكتەستىگىنىڭ ىسكە قوسۋعا جەتەكشىلىك ەتۋ ءبولىمىنىڭ باستىعى ۋاڭ نيڭ بىلاي دەپ تانىستىردى: «موڭعۇلكۇرە اۋەجايى شينجياڭداعى تۇڭعىش ۇستىرتتىك اۋەجاي، ىسكە قوسۋ شارت – جاعدايى ءبىرشاما وزگەشە، جازدا نايزاعايلى جاڭبىر، بۇرشاق جاۋادى، جاۋىن – شاشىن مول بولادى، جاڭبىرلى ماۋسىمنىڭ ۋاقىتى 100 كۇنگە جەتەدى. جاڭبىر كوبىنەسە بەيجيڭ ۋاقىتى بويىنشا ساعات 14:00 تەن كەيىن جاۋاتىندىقتان، جاز بەن كۇز ماۋسىمىنداعى كەزەكشى ۇشاقتاردىڭ ۋاقىتىن مۇمكىندىگىنشە 9:15 — 10:55 ارالىعىنا ورنالاستىرىپ، جولاۋشىلاردىڭ ءجۇرىس – تۇرىسىنىڭ ىركىلىسسىز بولۋىنا كەپىلدىك ەتۋدى جوسپارلاپ وتىرمىز». اۋە جەلىسى ىسكە قوسىلعان العاشقى مەزگىلدە، وڭتۇستىك اۆياتسيا سەرىكتەستىگى اپتاسىنا ءۇش رەت، ياعني، سارسەنبى، جۇما، جەكسەنبى كۇندەرى كەزەكشى ۇشاق ورنالاستىرۋدى جوسپارلاعان، سوڭىنان بازاردىڭ قاجەتىنە ساي كۇنىنە ءبىر كەزەككە دەيىن ورنالاستىرادى.
اۋە جەلىسى اشىلاردان بۇرىن، ءۇرىمجى قالاسىنان موڭعۇلكۇرەگە بارۋ ءۇشىن تەك قۇرلىق جولى قاتىناس قۇرالىمەن، ياكي، الدىمەن ۇشاق ارقىلى قۇلجاعا بارىپ، ونان سوڭ اۆتوموبيلمەن موڭعۇلكۇرەگە جەتۋگە بولاتىن، ەڭ از دەگەندە 4 ساعات ۋاقىت كەتەتىن، وڭتۇستىك اۆياتسيا سەرىكتەستىگىنىڭ ءۇرىمجى – موڭعۇلكۇرە اراسىندا قاتىنايتىن اۋە جەلىسى اشىلعان سوڭ، تەك 1.5 ساعاتتا ۇرىمجىدەن موڭعۇلكۇرەگە جەتىپ بارۋعا بولادى. (باس ستانسيا ءتىلشىسى لي ۋەيداي، گۋاڭدۇڭ ولكەلىك قاتىناس – تاسىمال مەڭگەرمەسىنەن لي شۇييا)
كەلۋ قاينارى: حالىق تورابى