مەملەكەتتىك كوشى – قوندى باسقارۋ مەكەمەسىنىڭ مالىمدەمەشىسى، ساياسات جانە زاڭ –ەرەجە بەلگىلەۋ مەڭگەرمەسىنىڭ باستىعى چىن جيە قاتىستى جاعدايلاردى تانىستىرۋدا. (مەملەكەتتىك كوشى – قوندى باسقارۋ مەكەمەسى بەرگەن سۋرەت)
شينحۋا اگەنتتىگىنىڭ ءتىلشىسى رىن چينچيننىڭ 4 – ايدىڭ 27 – كۇنى بەيجيڭنەن بەرگەن حابارى. مەملەكەتتىك كوشى – قوندى باسقارۋ مەكەمەسىنىڭ مالىمدەمەشىسى، ساياسات جانە زاڭ - ەرەجە بەلگىلەۋ مەڭگەرمەسىنىڭ باستىعى چىن جيەنىڭ 4 – ايدىڭ 27 – كۇنى ايتۋىنشا، قازىر دۇنيە ءجۇزى بويىنشا جاڭا تيپتى ايدارشا ۆيرۋس وكپە قابىنۋ ىندەتى جاپپاي تارالۋ كەزەڭىندە تۇر، ىرگەلەس ەلدەر مەن رايونداردا ىندەتتىڭ كۇرت تارالۋى بەتالىسى بايقالدى، ەل ىشىندە ىندەت كوپ جەردە شاشىراڭقى تارالۋدا، مەملەكەتتىك كوشى – قوندى باسقارۋ قۇرىلىمى الدا شەكارادان كىرىپ – شىعۋدى تىڭعىلىقتى دا قاتاڭ باسقارۋ ساياساتىن جالعاستىرادى.
چىن جيەنىڭ تانىستىرۋىنشا، ىندەتتەن ساقتانۋ – تىزگىندەۋدى ۇدايىلاندىرعاننان بەرى، ىشكى ولكەلەردەگى تۇرعىنداردىڭ شەكارادان شىعۋى تومەن دەڭگەيدە ورنىقتى كۇيدە بولدى، كورنەكتى تولقۋ بايقالعان جوق. ءبىرىنشى توقساندا ەلىمىز بويىنشا شەكارالىق تەكسەرۋ ورگاندارى شەكاردان كىرىپ – شىعۋشىلاردى 30 ميلليون 94 مىڭ ادام (رەت) تەكسەرگەن، مۇندا جۇڭگو ازاماتتارىنان 14 ميلليون 622 ادام (رەت) شەكارادان شىققان، الدىڭعى توقسانداعىمەن سالىستىرعاندا %1.2 ازايعان، بىلتىرعى وسى مەزگىلدەگىمەن سالىستىرعاندا %5.9 ازايعان.
ىندەتتىڭ «شەكارا سىرتىنان كىرۋىنەن» ساقتانۋ جاعىندا، مەملەكەتتىك كوشى – قوندى باسقارۋ قۇرىلىمدارى شەكارا اتتاپ جوتكەلۋ ارەكەتىن قاتاڭ تەجەپ، شەكارالىق ءبىرىنشى شەپتە ەڭ جوعارى دارەجەلى ساقتانۋ – تىزگىندەۋ كۇيىن ساقتاپ، ىندەتكە ساياتىن ادامداردىڭ شەكارادان زاڭسىز كىرىپ – شىعۋ جولدارى ارقىلى ەلىمىزگە كەلۋىنەن قاتاڭ ساقتاندى. قۇرلىق، تەڭىز، اۋە وتكەلدەرىندەگى كوشى – قوندى باسقارۋ قۇرىلىمدارى رايونعا، اعىمعا ءبولىپ، الدىن الا تاپسىرىس قابىلداۋ، الدىن الا تەكسەرۋ فورماسىن قولدانىپ، كەدەننەن ءوتۋدىڭ قالىپتى دا ءتارتىپتى بولۋىنا كەپىلدىك ەتتى ءارى ىندەتكە توتەپ بەرۋگە قاجەتتى زاتتار مەن حالىق تۇرمىسىنا قاجەتتى زاتتار تيەلگەن جۇك كەمەلەرىنە باعىتتاي وتىرىپ، شەكارالىق تەكسەرۋدەن جەدەل وتكىزۋ ءدالىزىن اشىپ، حالىقارالىق جۇك تاسىمالى كەمەلەرىن ەلەكترونداندىرىلعان تاسىلمەن كەدەننەن وتكىزۋگە كەپىلدىك ەتىپ، وتكەلدەردىڭ حاۋىپسىز دە ىركىلىسسىز بولۋىنا كۇش سالا كەپىلدىك ەتتى.
كەلۋ قاينارى: حالىق تورابى