موڭعۇلكۇرەدە اۋدارىسپاقتان ازيا چەمپيوناتى وتكىزىلدى

2016.07.18 15:29   كەلۋ قاينارى : حالىق تورابى

　　حالىق تورابى 18 - شىلدە، بەيجيڭ. (ءتىلشى: مانەپ ەربول ۇلى) قويناۋىن تۇلپارلاردىڭ تۇياعى دۇبىرلەتكەن تۇلپار مەكەنى – موڭعۇلكۇرەدە 2016 –جىلعى جۇڭگو شينجياڭ ىلە تۇلپارى حالىقارالىق ساياحات مەرەكەسىنىڭ جالعاسى بولىپ، 14 – شىلدە كۇنى اۋدارىسپاقتان ازيا چەمپيوناتى وتكىزىلدى.

　　بۇل رەتكى ازيا چەمپيوناتى قيمىلىن ورتا ازيا ءداستۇرلى ۇلتتىق سپورت تۇرلەرى قاۋىمداستىعى، ىلە قازاق اۆتونوميالى وبلىستىق ءداستۇرلى ۇلتتىق تۇرلەر قاۋىمداستىعى، ىلە قازاق اۆتونوميالى وبلىستىق مادەنيەت - دەنە تاربيە - راديو - كينو - تەلەۆيزيا مەكەمەسى باس بولىپ ۇيىمداستىرىپ، موڭعۇلكۇرە اۋداندىق حالىق ۇكىمەتى، موڭعۇلكۇرە اۋداندىق مادەنيەت - دەنە تاربيە - راديو - كينو - تەلەۆيزيا مەكەمەسى ۇستىنە الىپ وتكىزدى.

　　جارىسقا ەلىمىزدىڭ سپورتشىلارىنان سىرت، قازاقستان، موڭعۇليا، رەسەي، قىرعىزستان، تۇركيا، تاجىكستان، ازەربايجان قاتارلى مەملەكەتتەردەن ارنايى شاقىرىلعان سپورتشىلار قاتىناستى. جارىس 60 كيلوگرام سالماق، 70 كيلوگرام سالماق، 80 كيلوگرام سالماق، 90 كيلوگرام جانە 90 كيلوگرام سالماقتان جوعارىلار بويىنشا وتكىزىلدى. سونىمەن بىرگە سالماق دارەجەسىندەگى جارىس اياقتالعان سوڭ سپورتشىلار ناق مايداندا تىزىمدەلۋ فورماسى ارقىلى ابسوليۋتتىق چەمپيونعا تالاستى. جارىس ەرەجەسى جايلى ازىراق توقتالساق، جارىس 15 مەترلىك سىزىق ىشىنەن شىقپاۋ شارت استىندا بەس مينۋت ۋاقىت ىشىندە قارسىلاسىن ات ۇستىنەن قۇلاتۋ ارقىلى تازا جەڭىستىك الۋ نەمەسە ولشەمدى بەس مينۋت ىشىندە باسىمدىلىق تانىتىپ ۇپاي كوپ جيناعاندارعا جەڭىستىك بەرۋ فورماسى ارقىلى جۇرگىزىلەدى. مۇندا الاڭدا باس تورەشىدەن سىرت شەتتە 15 مەترلىك سىزىق سىرتىندا ەكى تورەشى سپورتشىلاردىڭ ءىس - ارەكەتىن قاداعايدى. سپورتشىلاردىڭ ەردىڭ قاسىنا ۇستاۋ، اتتىڭ جالىنان ۇستاۋ، ەرگە شىنتاعىن تىرەۋ قاتارلى ارەكەتتەرى ەرەجەگە قايشىلىق جاساۋ ارەكەتى ەسەپتەلىنەدى.

　　ءبىر كۇندىك باسەكە ارقىلى بىرەۋلەر بويىنداعى قارا كۇشىمەن قارسىلاسىن ٵپ - ساتتە اتتان جۇلىپ الىپ، «كۇش اتاسىن تانىماس» دەگەندەي ورلىك بايقاتسا، بىرەۋلەر ءساتى كەلگەن ورايدان پايدالانىپ، قارسىلاسىن ابايسىزدا قاپى قالتىردى. وسلايشا ءبىر كۇندىك ۋاقىتپەن وتكىزىلگەن اۋدارىسپاقتان ازيا چەمپيوناتى دا سوڭعى مارەسىنە جەتتى. 60 كيلوگرام سالماقتان 3 – دارەجەلى سيلىققا يە بولعان جەكسەنبەك تۇردىبەكوۆ (قىرعىزستان) ، 2 – دارەجەلى سيلىققا يە بولعان حاميت مەرەيجان (قازاقستان)، 1 – دارەجەلى سيلىققا يە بولعان مۇقات قۋانىش ۇلى (جۇڭگو)، 70 كيلوگرام سالماقتان 3 – دارەجەلى سيلىققا يە بولعان قالىبەك قىزىرمالحۇل ۇلى (قىزعىزستان) 2 – دارەجەلى سيلىققا يە بولعان بايعۇل ەرنازار ۇلى (موڭعۇليا)، 1 – دارەجەلى سيلىققا يە بولعان جاپشەۆ ەرمەك (قازاقستان) 80 - كيلوگرامنان 3 – دارەجەلى سيلىقتى العان رۋسىلان قاراقۇلوۆ (قىزعىزستان)، 2 - دارەجەلى سيلىقتى العان ەمباي تەمىربەك ۇلى (جۇڭگو)، 1 - دارەجەلى سيلىقتى العان تۇيمەبەك جۇماعاليەۆ (قازاقستان)، 90 كيلوگرامدىق سالماقتان 3 - دارەجەلى سيلىقتى العان سىلامجان نۇرتاي (رەسەي)، 2 - دارەجەلى سيلىقتى العان قادىر ازامات (تاجىكستان)،1 - دارەجەلى سيلىقتى العان سىرىم ءىزباسار (قازاقستان)، 90 كيلوگرامنان جوعارى سالماق بويىنشا 3 - دارەجەلى سيلىققا يە بولعان الپامىس قاناتبەك (قىزعىزستان)، 2 - دارەجەلى سيلىققا يە بولعان دانيار سمايلوۆ (موڭعۇليا)، 1 - - دارەجەلى سيلىققا يە بولعان ءبىرجان قوساليەۆ (قازاقستان). سالماقتار بويىنشا وتكىزىلگەن جارىستان سوڭ، سوڭىندا ابسوليۋتتىق (سالماق شەكتەمەسى جوق) ءتۇر بويىنشا قازاقستان ەلىنەن كەلگەن سىرىم ءىزباسار قانشا سالماق، قانشا كەزدەسۋ بولسادا ارىپتەستەرىن ءبىر - بىردەن مويىنداتۋ ارقىلى ابسوليۋتتىق چەمپيون اتاعىن الىپ، التىن بەلبەۋدى تاعىندى.

　　تومەندە وسى رەتكى جارىستاعى كوزايىم ساتتەر. (ەرەكشە ەسكەرتە كەتەر جايت، وسى جولعى ساياحات مەرەكەسى جايلى تۇسىرىلگەن كەسكىندى حابارلار الدا تورابىمىزدا جالعاستى بەرىلەدى).

　　كەلۋ قاينارى: حالىق تورابى