بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

قازاق كۇرەسىنەن 6 – كەزەكتى الەم چەمپيوناتى ورتەكەستە وتكىزىلدى

2016.09.26 15:15   كەلۋ قاينارى : حالىق تورابى



  حالىق تورابى، 24 – قىركۇيەك، موڭعۇلكۇرە. (نۇرعيسا قۇرمانجان ۇلى) قازاق حالقىنىڭ ءداستۇرلى سپورت تۇرلەرىنىڭ ءبىرى بولعان قازاق كۇرەسى بۇل كۇندەرى ازيالىق، الەمدىك دەڭگەيدە تانىلا باستاعان كۇرەس ءتۇرىنىڭ ءبىرى، ءداستۇرىمىزدىڭ جالعاسى بولىپ اتادان ميراس قالعان قازاق كۇرەسىنەن 6 – كەزەكتى الەم چەمپيوناتىنىڭ جالاۋى 22 – قىركۇيەكتەن 24 – قىركۇيەككە دەيىن مەيماندوس ەل، ءجاننات جەر ــ موڭعۇلكۇرە اۋدانىنداعى سپورت سارايىندا جەلبىرەدى. بۇل رەتكى قازاق كۇرەسىنەن الەم چەمپيوناتىنا جۇڭگو، رەسەي، قازاقستان، ارمەنيا، گرەتسيا، وڭتۇستىك افريكا قاتارلى 22 مەملەكەتتىڭ 23 ۋاكىلدەر ۇيىرمەسى قاتىناستى، ەل مەرەيىن اسىرار حالىقارالىق چەمپيوناتتا شينجياڭ بالۋاندار قۇراماسى مەن موڭعۇلكۇرە بالۋاندار قۇراماسى ەلىمىز اتىنان ورەلى ونەر كورسەتتى. بايراقتى باسەكەنى حالىقارالىق كۇرەس قاۋىمداستىعى، دۇنيە جۇزىلىك قازاق كۇرەسى قاۋىمداستىعى، ىلە قازاق كۇرەسى قوعامدىق بىرلەستىگى قاتارلى قۇزىرلى ورىندار ۇيىمداستىرىپ، ىلە قازاق اۆتونوميالى وبلىستىق مادەنيەت، دەنە تاربيە، راديو، كينو – تەلەۆيزيا مەكەمەسى مەن موڭعۇلكۇرە اۋداندىق حالىق ۇكىمەتى سالتاناتپەن وتكىزدى.

  بەرىسى ازياداعى كورشىلەس ەلدەردەن، ارىسى ەۆروپا مەن افريكادان بىلەكتى بالۋاندار قاتىناسقان الەمدىك دەڭگەيدەگى چەمپيوناتتا 60 كيلوگرام، 70 كيلوگرام، 80 كيلوگرام، 90 كيلوگرام، 90 كيلوگرامنان جوعارى سالماق بويىنشا جانە تۇيە بالۋان (80 كيلوگرامدىق سالماقتان جوعارى بالۋاندار ەرىكتى تىزىمدەلۋ ارقىلى قاتىناسادى) سالماعى بويىنشا كەزدەسۋ وتكىزىلدى، ءالى جەتكەنى الىپ ۇرىپ، قارىمى قارايلاستارى قاعيدا بويىنشا ۇپاي سانىمەن سارالانعان بالۋاندار باسەكەنىڭ ەكىنشى كۇنىندە بوز كىلەمدە ەڭ سوڭعى جەڭىس ءۇشىن بەلدەستى. 60 كيلوگرامدىق سالماقتا قازاقستان بالۋانى قۇسمان قىرعىزبايەۆ ءبىرىنشى، قىرعىزستان بالۋانى سانجار وسماناليەۆ ەكىنشى، ءۇندىستان بالۋانى گۇلاب الي موحسين مەن جۇڭگو بالۋانى نۇرتاي نۇرمۇحامەت ۇلى ءۇشىنشى ورىندى يەلەدى؛ 70 كيلوگرامدىق سالماقتا قازاقستان بالۋانى قۇمار قىرعىزبايەۆ ءبىرىنشى، جۇڭگو بالۋانى جالىنبەك مادەنيەت ۇلى ەكىنشى، قىرعىزستان بالۋانى ميرلان ەراليەۆ پەن وزبەكستان بالۋانى باحروم ينوياتوۆ ءۇشىنشى بولدى؛ 80 كيلوگرامدىق سالماقتا قازاقستان بالۋانى داۋلەت پاحىريدەنوۆ ءبىرىنشى، ەستونيا بالۋانى گەورگي لادوكين ەكىنشى، گرۋزيا بالۋانى زۆياد بازانداراشۆيل مەن ارمەنيا بالۋانى داۆيد ساركسياي ءۇشىنشى ورىنعا جايعاستى؛ 90 كيلوگرامدىق سالماقتا قازاقستان بالۋانى ايبول ايتبەك ۇلى ءبىرىنشى، وزبەكستان بالۋانى شۇكىرجان ارسلانوۆ ەكىنشى، ەستونيا بالۋانى الەكساندر مارمەلجۇك پەن جۇڭگو بالۋانى سەرىك جايداربەك ۇلى ءۇشىنشى ورىنعا يە بولدى؛ 90 كيلوگرامنان جوعارى سالماقتا قازاقستان بالۋانى ايبەك نۇعىماروۆ ءبىرىنشى، گرۋزيا بالۋانى لەۆاني ماتيلاشۆيلي ەكىنشى، رەسەي بالۋانى ماكسيم شيريايەۆ پەن بەلورۋس بالۋانى الياكساندر ۆاحاۆياك ءۇشىنشى ورىندى يەلەندى، تۇيە بالۋان دارەجەسى بويىنشا باسەكەدە گرۋزيالىق گۋرام تۋشيشۆيلي تۇيە بالۋان اتاعىنا يە بولسا، بەلورۋسسيا بالۋانى الياكساندر ۆاحاۆياك ەكىنشى ورىنعا، قازاقستان بالۋانى مۇحيت تۇرسىنوۆ پەن رەسەي بالۋانى ماكسيم شيريايەۆ ءۇشىنشى ورىنعا يە بولدى. جارىس اسا تارتىستى وتكىزىلدى، تۇيە بالۋان اتاعىنا يە بولعان گۋرام تۋشيۆيليدىڭ قازاق كۇرەسى تەحنيكاسى جيىلعان جۇرتتى ءتانتى ەتىپ، قازاق كۇرەسىنىڭ حالىقارالىق دەڭگەيگە كوتەرىلە باستاعانىنىڭ ءبىر بەلگىسىندەي كورىندى. بوز كىلەمدە جۇڭگو، قازاقستان، موڭعۇليا، وزبەكستان قاتارلى ەلدەردىڭ حالىقارالىق دەڭگەيدەگى تورەشىلەرى تورەلىك ەتتى.

  ەستەرىڭىزگە سالا كەتسەك، قازاق كۇرەسىنەن وسىمەن 6 رەت الەم چەمپيوناتى، 4 رەت ەۆروپا چەمپيوناتى، 3 رەت الەم كۋبوگى، 11 رەت ازيا بىرىنشىلىگى، ءبىر رەت افريكا چەمپيوناتى ۇيىمداستىرىلعان، سونىمەن قاتار، قازاق كۇرەسىن حالىقارالىق دەڭگەيدەگى جارىستارداعى باسەكە ءتۇرى ەتىپ قوسۋعا ازاماتتار ايتۋلى ەڭبەك ەتۋدە، العا قويعان تۇپكىلىكتى ماقسات ــ قازاق كۇرەسىن گرەك – ريم كۇرەسى، دزيۋدو قاتارلى وليمپيادا ويىندارىنىڭ قاتارىنا قوسىپ، قازاق كۇرەسىنىڭ بۇك ۇپاي، جامباس ۇپاي قاتارلى اتاۋلارىن حالىقارالىق ارەنانىڭ تورىنە شىعارۋ، قازاق كۇرەسىن دۇنيە ءجۇزى تانيتىن كۇرەس تۇرلەرى قاتارىنا ەنگىزۋ بولىپ وتىر. قازاق كۇرەسىنەن كەلەسى كەزەكتى الەم چەمپيوناتى قازاقستاننىڭ استانا قالاسىندا وتكىزىلەدى.

  بۇل رەتكى قازاق كۇرەسىنە التى الاشتان ارى اسىپ، ازيا ەلدەرىن ايتپاعاندا، وركەنيەتى وزىق ەۆروپا مەن قيىرداعى افريكادان كەلگەن مەيمانداردىڭ كۇتىمىن جاساپ، قازاق كۇرەسىنەن الەم چەمپيوناتىن ويداعىداي وتكىزۋگە موڭعۇلكۇرە اۋدانى ەسەلى ەڭبەك ەتتى. ىلە قازاق اۆتونوميالى وبلىسىنىڭ باتىس وڭتۇستىگىندەگى موڭعۇلكۇرە اۋدانى قاتپارى قالىڭ قارا تاۋلاردىڭ اراسىنا ورنالاسقان بيىكتەگى ويپاتتى ءوڭىر. كليماتى جانعا جايلى بۇل اۋداندا قازاق، حانزۋ، ۇيعۇر قاتارلى 21 ۇلت جاسايدى، اۋىل شارۋاشىلىعى مەن مال شارۋاشىلىعىن تىعىز ۇشتاستىرعان اۋدان حالقى ساياحات شارۋاشىلىعىن دا ءونىمدى جولعا قويىپ، اۋداننىڭ جانعا جايلى ورتاسىنان پايدالانىپ، شارۋاشىلىقتارىن شالقىتىپ كەلەدى.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 【10】 【11】 【12】 【13】 【14】 【15】 
【16】 【17】 【18】 【19】 
جاۋاپتى رەداكتورى : مانەپ ەربول ۇلى

 سۋرەت