ءتىلسىم ەكەن بۇل مەكەن، تاۋ مەن تاسى گۇل ەكەن

   ماقالاسىن جازىپ، سۋرەتتەرىن تۇسىرگەن باقىتبەك ءجۇمادىل ۇلى

2019.04.08 14:21   كەلۋ قاينارى : حالىق تورابى

　　كۇلىمدەپ تاعى ءبىر كوكتەم كەلىپ، ىلە اڭعارىنىڭ گۇل ماۋسىمى باستالىسىمەن كۇنەس اۋدانىندا 4 - ايدىڭ 3 - كۇنىنەن باستاپ ايدىڭ سوڭىنا دەيىن جالعاساتىن «جۇڭگو نارات ورىك گۇلى ساياحات مەرەكەسى» دابىرالى باستالدى. وسى مەرەكەنىڭ دابىرىمەن توڭىرەكتىڭ ءتورت بۇرىشىنان سابىلعان ساياحاتشىلار مەن فوتو سۋرەت اۋەسكەرلەرى كۇنەس اۋدانىنىڭ تۇرگەن اۋىلىنداعى ورىكتى سايعا بارىپ، جالپى كولەمى 35 مىڭ مۋدان اساتىن جابايى ورىك شوعىرلى وسكەن كورىنىس وڭىرىنىڭ توتىداي تۇرلەنىپ، قۇلپىرا گۇل اشقان كەلبەتىن تاماشالاپ، ورىكتى سايداعى العاشقى كوكتەمنىڭ گۇل شىرايىن فوتوعا ءتۇسىرىپ، تاڭداۋلى تۋىندى جاراتۋعا قامداندى.


　　تۇرگەن اۋىلىنىڭ ورىكتى ساي تابيعي كورىنىس رايونى كۇنەس اۋدانى قالاشىعىنان 32 كيلومەتر قاشىقتاعى شىعىس سولتۇستىك تاۋ بوكتەرىندە. بۇل جەردىڭ تاۋ - تاسى ءار جىلى كوكتەمدە القىزىل ورىك گۇلىنە ورانىپ، ءتىلسىم تابيعاتتىڭ ءتىل جەتكىسىز كوركەم كورىنىسىن قالىپتاستىرادى.


　　كۇنەس اۋدانى نارات كورىنىس رايونىنىڭ ساياحاتتاعى ايگىلى ماركاسىنىڭ داڭقىن اسىرۋ ءۇشىن جاقىنعى جىلداردان بەرى ماۋسىمدىق ساياحات ءتۇرىن بەلگىلەپ، ەرتە كوكتەمدە ورىك گۇلى مەرەكەسىن وتكىزىپ كەلەدى. بيىلعى مەرەكەدە نارات ساياحات باسقارۋ ورنى ساياحاتشىلارعا ءان - ءبي نومىرلەرىن قويىپ بەرۋمەن قاتار، تىك ۇشاقپەن ورىكتى سايدى تاماشالاۋ ءتۇرىن ىسكە قوستى. اۋىل - قىستاق تۇرعىندارى مەرەكە ورايىنان پايدالانىپ، قولونەر بۇيىمدارىن ساۋدالاپ، ۇلتتىق ءدامدى تاعامدار جاساپ ساتىپ، ساياحاتشىلارعا ات مايلاپ كىرىس تاپتى.


　　فوتوگرافتار ءۇشىن بۇدان دا ماڭىزدىسى، اتاعى الەمگە تارالىپ، جاقىنعى بىرنەشە جىلدا بۇكىل ەل كولەمىندەگى كوپتەگەن ورەلى فوتو سۋرەت باسەكەسىندە جۇلدە الىپ وتىرعان ورىكتى سايدىڭ كوكتەمگى كورىنىستەرىنەن باسقالار بايقاي قويماعان جاڭا تۇرعىسىن تاۋىپ، كەلىستى كوركەم تۋىندى جاراتۋدىڭ قامى بولعانى انىق. الايدا ورىكتى ساي باياعى سول ءبىر وڭىر بولعانىمەن، بايقاعانعا كوركەم تۇرعى بارشىلىق ەكەنى بارشاعا بەلگىلى. الايدا، تاماشا تۋىندىلار جاراتۋداعى شەشۋشى ءتۇيىن تاعى سول مەزگىل، اۋا رايى جانە وزگەشە تۇرعىنى تابۋ ەكەنى ءسوزسىز. مەيلى قالاي ايتساقتا ورىكتى سايداعى كوركەمدىك ءار كىمگە ءار باسقا سەزىلەدى. بىراق ءبارىمىز ءوز تۇرعىمىزدى ورتاعا سالىپ، ورتاق باعالاپ، تاجىريبە الماستىرساق، اناعۇرلىپ كوپ كوركەم تۋىندىلار جارىققا شىعارى حاق دەگەن ويمەن، اراعا ەكى جىل سالىپ ازەر ورايى كەلىپ، جۋىقتا ورىكتى سايعا بارىپ تۇسىرگەن جاڭا تۋىندىلارىمدى كاسىپتەستەرگە كوز ايىم بولۋعا ۇسنىپ وتىرمىن.


　　كەلۋ قاينارى: حالىق تورابى