شينجياڭعا قاتىنايتىن 3 – جوعارى قارقىندى تاس جولدا اۆتوموبيل قاتىنادى

جابايى حايۋاناتتار وتەتىن ارناۋلى جول قالدىرىلدى

2022.09.01 15:09   كەلۋ قاينارى : حالىق تورابى

　　8 – ايدىڭ 30 – كۇنى، شينجياڭ بايىنعولىن موڭعۇل اۆتونوميالى وبلىسى چارقىلىق اۋدانىنداعى جەتىمبۇلاق – چارقىلىق جوعارى قارقىندى تاس جولىندا اۆتوموبيل رەسمي قاتىنادى. جەتىمبۇلاق – چارقىلىق جوعارى قارقىندى تاس جولىنىڭ باستالعان جەرى شينجياڭ مەن چيڭحايدىڭ شەكارالاسقان جەرىندەگى جەتىمبۇلاق قالاشىعى، اياقتالاتىن جەرى چارقىلىق اۋدانىنىڭ اۋدان قالاشىعى، جالپى ۇزىندىعى 294 كيلومەتر، قازىر بار G218 تاس جول جەلىسىمەن تۇتاساتىن بولىپ، ول G30 تاس جول جەلىسى ليانيۇنگاڭ – قورعاس جوعارى قارقىندى تاس جولى مەن تاس جول جەلىسى G7 بەيجيڭ – شينجياڭ جوعارى قارقىندى تاس جولىنان كەيىنگى شينجياڭعا قاتىنايتىن 3 – جوعارى قارقىندى تاس جول ءدالىزى سانالادى.

　　اۆتوموبيل قاتىناعان سوڭ، جەتىمبۇلاق قالاشىعىنان چارقىلىق اۋدانىنا اۆتوموبيلمەن بارۋعا كەتەتىن ۋاقىت بۇرىنعى 6 ساعاتتان 3 ساعاتقا قىسقارادى، بۇل بۇقارانىڭ ءجۇرىس – تۇرىسىنا قولايلى بولىپ قالماستان، جەرگىلىكتى ورىننىڭ ەرەكشەلىككە يە اۋىل شارۋاشىلىعى ونىمدەرىن ساۋدالاۋىنا ءتيىمدى بولىپ، جەرگىلىكتى ورىننىڭ ەكونوميكاسى مەن قوعامىنىڭ دامۋىنا ومىرشەڭدىك كۇش سيلايتىن بولادى.

　　جەتىمبۇلاق – چارقىلىق جوعارى قارقىندى تاس جولى التىنتاۋ، لوبنۇر سىندى ەكى «ەلسىز مەكەننەن» وتەدى، قۇرىلىس جەلىسىندە بايلىق قاينارى تاپشى، تابيعي ورتاسى ناشار، قاتىناسقا توتەنشە قولايسىز. قۇرىلىس سالۋشىلار تەڭىز دەڭگەيىنەن بيىك جەردەگى قاقاعان سۋىق، جەر بەدەرىنىڭ گەولوگيالىق شارت – جاعدايىنىڭ كۇردەلى بولۋى سىندى كوپتەگەن قيىن ماسەلەلەردى جەڭىپ، قۇرىلىستى اسىلگى جوسپارداعىدان 8 اي بۇرىن اياقتاتقان.

　　تاس جولدى جوبالاۋ مەن قۇرىلىس جۇرگىزۋ بارىسىندا «ورتانى قورعاۋدى باستى ورىنعا قويۋ» پرينسيبىن ۇستانىپ، ءداستۇرلى جول تاعانىنىڭ ورنىنا كوبىنەسە كوپىر، تۋنەل قولدانىلعان، التىنتاۋ قاتارلى مەملەكەت دارەجەلى جاراتىلىستىق قورىق رايونىنان وتكەن كەزدە، ءىرى تيپتەگى كوپىر، وتۋگە ارنالعان قۇبىر قاتارلى تاسقىن سۋىن ىعىستىرۋ مەن جابايى حايۋاناتتارعا ارنالعان دالىزدەر ورنالاستىرىلىپ، تاس جولدىڭ جابايى حايۋاناتتار مەن وسىمدىكتەردىڭ جەتىلۋىنە، تىرشىلىك ەتۋىنە قاجەتتى ورتاعا بولعان ىقپالدى بارىنشا ازايتقان.

　　جەتىمبۇلاق – چارقىلىق جوعارى قارقىندى تاس جولى — مەملەكەتتىڭ جوعارى قارقىندى تاس جول تورى جوسپارىنداعى شينجياڭ مەن باسقا ولكە، قالالاردى بايلانىستىراتىن 3 – قاتىناس ءدالىزى، شينجياڭدا «ءبىر بەلدەۋ، ءبىر جول» وزەكتى رايونىن قالىپتاستىرۋدا، شينجياڭنىڭ وڭىرلىك جول تورابىنىڭ قۇرىلىمىن كەمەلدەندىرۋدە، شينجياڭنىڭ دامۋىن ىلگەرىلەتۋدە، وتە – موتە، وڭتۇستىك شينجياڭ ءوڭىرىنىڭ ەكونوميكاسىن، قوعامىن دامىتۋدا جانە حالىق تۇرمىسىن جاقسارتۋدا توتەنشە ماڭىزدى رول اتقارادى. (باس ستانسيا ءتىلشىسى شين رىن، ارمان، چارقىلىق تەلەۆيزياسى)

　　كەلۋ قاينارى: حالىق تورابى