از ۇلتتاردىڭ ءداستۇرلى سپورت جارىس تۇرلەرىنىڭ جارقىن تۇيىندەرى مول

2022.09.13 17:01   كەلۋ قاينارى : شينجياڭ گازەتى

　　9 - ايدىڭ 10 - كۇنى ارتيستەر از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسىنىڭ اشىلۋ سالتىنىڭ قويىلىمدارىنا دايىندالۋدا. از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسى 9 - ايدىڭ 13 - كۇنىنەن 16 - كۇنىنە دەيىن بۇراتالا موڭعۇل اۆتونوميالى وبلىسىندا وتكىزىلەدى. قازىر از ۇلت ءداستۇرلى سپورت جارىسىنىڭ ءار ءتۇرلى دايىندىق قىزمەتتەرى ازىرلەنىپ بولدى.

　　□ سۋرەتتى انار بۇلت \ شينجياڭ گازەتىنىڭ ءتىلشىسى حان لياڭ تۇسىرگەن

　　انار بۇلت \ شينجياڭ گازەتىنىڭ ءتىلشىسى ءابيبا 9 - ايدىڭ 11 - كۇنى بۇراتالادان حابارلايدى. ”سۇيىسپەنشىلىگىن بىلدىرەتىن“ قىزقۋار، قۇرالايدى كوزگە اتقان ساداق اتۋ جارىسى، ”سەتەرىن“ جەتەلەپ الاڭعا الىپ شىققان تۇيە بايگەسى، ”دوداعا“ تۇسكەن كوكپار جارىسى، اعاشاياقپەن زىمىراۋ... وسى قىزىعى مول جانە قىزىعا كورەتىن جارىس تۇرلەرى از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسىندا وتكىزىلەدى.

　　9 - ايدىڭ 10 - كۇنى، ءتىلشىنىڭ وسى كەزەكتى از ۇلتتاردىڭ ءداستۇرلى سپورت جارىسىن ۇيىمداستىرۋ كوميسسياسىنان ۇعىسۋىنشا، جارىستا جالپى 26 ءتۇر ورنالاستىرىلعان، مۇندا 16 جارىس ءتۇرى، 10 ويىن كورسەتۋ ءتۇرى بار ەكەن. اۆتونوميالى رايوندىق دەنە تاربيە مەكەمەسىنىڭ بۇرىنعى 2 - دارەجەلى شارلاۋشىسى يۇي شىڭۋيدىڭ تانىستىرۋىنشا، وسى كەزەكتى از ۇلتتاردىڭ ءداستۇرلى سپورت جارىسىنىڭ باسىم كوپ تۇرلەرى بۇرىنعى كەزەكتەگى جارىس تۇرلەرىن جالعاستىرعان، جاڭادان قوسىلعان حىچيۋ، جىنجۋچيۋ سياقتى تۇرلەر مەملەكەتتىك از ۇلتتاردىڭ ءداستۇرلى سپورت جارىسىندا جاڭادان قوسىلعان تۇرلەر.

　　”حىچيۋ سياقتى جارىس تۇرلەرىنىڭ تيانشان الابىندا كەڭ كولەمدە جالپىلاستىرىلۋىنا بايلانىستى، رايونىمىز ءبىر توپ ۇزدىك شەبەرلەردى جەتىلدىردى“، - دەدى يۇي شىڭۋي، - وسى جاڭا جارىس تۇرلەرىن قوسۋداعى ماقسات مەملەكەتتىك از ۇلتتاردىڭ ءداستۇرلى سپورت جارىسىمەن جان - جاقتى ۇشتاسىپ، جالپى حالىقتىق دەنە شىنىقتىرۋدى جالپىلاستىرۋمەن قاتار، شينجياڭداعى ءار ۇلت بۇقاراسىنىڭ شينجياڭ سىرتىنداعى ولكە، رايون، قالاداعى بۇقارامەن اناعۇرلىم ارالاسۋىن، ىشتەسۋىن، توعىسۋىن جەبەۋ بولىپ تابىلادى.

　　وسى كەزەكتى از ۇلتتاردىڭ ءداستۇرلى سپورت جارىس تۇرلەرىنىڭ اراسىندا داۋاز، سارعايدي، توعىزقۇمالاق سياقتى كوپتەگەن بەيزاتتىق دەنە تاربيە تۇرلەرى بار. ”از ۇلتتاردىڭ ءداستۇرلى سپورت جارىسى تەك از ۇلت شەبەرلەرىنىڭ باسەكەگە تۇسەتىن ساحناسى عانا ەمەس، سونداي - اق كوپتەگەن بەيزاتتىق مادەني مۇرالاردى كورسەتەتىن تۇعىر. وسى بەيزاتتىق دەنە تاربيە تۇرلەرىن باسەكەلەسۋ ءتاسىلى ارقىلى كورسەتۋ ولاردىڭ ءتىپتى دە ”تىرىلۋىنە“، ءتىپتى دە ”جاندانۋىنا“ دەم بەرىپ، اناعۇرلىم مول جاستاردى وزىنە باۋراي الادى“، - دەدى يۇي شىڭۋي.

　　جۋىق جىلداردان بەرى اۆتونوميالى رايوننىڭ قاتىستى تاراۋلارى دەن قويا تەكسەرۋ - زەرتتەۋ جۇرگىزۋ ارقىلى از ۇلتتاردىڭ ءداستۇرلى سپورت جارىسىنىڭ بۇقارالىق سيپاتى مەن زاڭدىلىعىن يگەرىپ، اۆتونوميالى رايوندىق از ۇلتتاردىڭ ءداستۇرلى سپورت جارىسىنىڭ جارىس تۇرلەرىنىڭ، ويىن كورسەتۋ تۇرلەرىنىڭ تاعايىندالۋىن ۇزدىكسىز كەمەلدەندىرىپ، جارىس ەرەجەسىن، ءتارتىبىن كەمەلدەندىرىپ، جارىستىڭ ارناعا ءتۇسۋىن، تۇزىمدەنۋىن ىلگەرىلەتتى.

　　”وسى جارىس تۇرلەرىنىڭ ءبارى ومىردەن شىققان، ءار ۇلت بۇقاراسىنىڭ جان الەمىن توتەنشە بايىتادى جانە نارلەندىرەدى“. يۇي شىڭۋي بىلاي دەدى: وسى كەزەكتى از ۇلتتاردىڭ ءداستۇرلى سپورت جارىسىنىڭ نەگىزگى تاقىرىبى ىنتىماق، العا باسۋ، جاراسىمدىلىق، ەكپىندەي ىلگەرىلەۋ. ءار ۇلت ساڭلاقتارىنىڭ جارىس الاڭىندا ايانباي سايىسىپ، جارىس الاڭىنان تۇسكەن سوڭ ءبىر نيەتپەن ىنتىماقتاسىپ، شينجياڭداعى ءار ۇلت حالقىنىڭ اسقاق جىگەرمەن العا تارتاتىن رۋحاني بەت - بەينەسىن جانە پارتياعا دەگەن العىس سەزىمىن ايگىلەۋىن ءۇمىت ەتەمىز.