تۇركيا جەر سىلكىنگەن وڭىرلەردەگى قۇلاعان قۇرىلىستارعا بايلانىستى تەكسەرۋ كولەمىن كەڭەيتىپ، قازىرگە دەيىن 184 ادامدى تۇتقىنداعان

2023.02.27 16:03   كەلۋ قاينارى : حالىق تورابى

　　سۋرەتتە: 2 – ايدىڭ 21 – كۇنى، قىزمەتكەرلەر تۇركيانىڭ قاتاي ولكەسىندە ءىرى تيپتەگى ماشينالارمەن قيراندىلاردى تازالاۋدا. شينحۋا اگەنتتىگى (مۇستافا كايا فوتوسى)

　　شينحۋا اگەنتتىگىنىڭ 2 – ايدىڭ 26 – كۇنى بەيجيڭنەن بەرگەن حابارى. تۇركيانىڭ ءادىليا مينيسترى بەكىر بوزداگتىڭ 2 – ايدىڭ 25 – كۇنى ايتۋىنشا، جەر سىلكىنىسىندە كوپتەگەن قۇرىلىستاردىڭ قۇلاۋىنا بايلانىستى تەكسەرۋ جۇرگىزۋ كولەمى كەڭەيتىلگەن، قازىرگە دەيىن قىلمىس كۇماندىلارىنان 184 ادام تۇتقىندالعان.

　　بوزداگتىڭ تۇركيانىڭ شىعىس وڭتۇستىگىندەگى ديارباكىر قالاسىندا وتكىزىلگەن اقپار جاريالاۋ ماجىلىسىندە ايتۋىنشا، پروكۋراتۋرا مەن ساقشى جاق قۇرىلىستاردىڭ قۇلاۋى دەلوسىنا بايلانىستى 600 دەن استام ادامدى تەكسەرگەن، كوتەرەگە الۋشى ساۋداگەرلەردى قامتىعان 184 ادامدى تۇتقىنداعان.

　　تۇركيانىڭ وڭتۇستىگىندەگى سيرياعا جاقىن شەكارا رايونىندا 2 – ايدىڭ 6 – كۇنى كۇشتى جەر سىلكىنىسى تۋىلعان، قازىرگە دەيىن تۇركيا مەن سيريا ەكى ەلدە جەر سىلكىنىسى سەبەبىنەن قازا بولعانداردىڭ سانى 50 مىڭ ادامنان اسقان. تۇركيا جاقتىڭ ساندى مالىمەتىنە قاراعاندا، جەر سىلكىنىسىندە 160 مىڭنان استام قۇرىلىس قۇلاعان نەمەسە اۋىر دارەجەدە بۇلىنگەن، مۇندا 520 مىڭ اۋىز الەۋمەتتىك جاتاق قامتىلعان.

　　ا ق ش بىرلەسكەن اگەنتتىگىنىڭ وسىنىڭ الدىندا قۇرىلىس ماماندارىنىڭ كوزقاراسىنان سيتات كەلتىرىپ حابارلاۋىنشا، وسى جولى تۇركيا مەن سيريادا تۋىلعان جەر سىلكىنىسىنىڭ كەسىرى زور بولعانىمەن، تۇركياداعى ادام ءولىم – ءجىتىمنىڭ اۋىر بولۋىنىڭ ءبىر ءبولىم سەبەبى قۇرىلىستاردىڭ ساپاسىنىڭ تولىمسىز بولۋىنا بايلانىستى دەپ قاراۋعا بولادى. حابارعا قاراعاندا، تۇركيادا قۇرىلىس جۇرگىزۋ بارىسىندا بەلگىلەمەگە ۇيلەسپەيتىن جاعدايلار ۇنەمى كەزدەسەدى.

　　تۇركيانىڭ ءادىليا مينيسترلىگى جەر – جەردەگى اپاتقا ۇشىراعان ولكەلەردە جەر سىلكىنىسىنە قاتىستى قىلمىستاردى تەكسەرۋ مەكەمەسىن قۇرىپ، قاتىستى جاعدايلاردى تەكسەرگەن. تۇركيا زۇڭتۇڭى رەجەپ تايىپ ەردوعان قۇرىلىستاردى قايتا سالۋ جۇمىسىن ءبىر جىل ىشىندە ورىنداپ بولۋ جانە اپاتتان كەيىنگى قايتا گۇلدەندىرۋ قىزمەتىندە جاۋاپكەرشىلىكتى قۋزاستىرۋ ءتۇزىمىن اتقارۋ جونىندە ۋادە بەرگەن. (ليۋ شي)

　　كەلۋ قاينارى: حالىق تورابى