مەملەكەتتىك 14 - كەزەكتى حالىق قۇرىلتايىنىڭ 1 - ءماجىلىسى بەيجيڭدە اشىلدى
شي جينپيڭ، لي جانشۋ، ۋاڭ ياڭ، لي چياڭ، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي، ۋاڭ چيشان قاتارلىلار ءتوراعالار مىنبەسىنەن ورىن الدى، لي كىچياڭ ۇكىمەت قىزمەتىنەن بايانداما جاسادى، جاۋ لىجي ءماجىلىستى باسقاردى، زاڭ شىعارۋ زاڭىنا وزگەرىس ەنگىزۋ جوباسى جونىندەگى تۇسىنىك سياقتىلاردى تىڭدادى
2023.03.06 16:01 كەلۋ قاينارى : حالىق تورابى
 |
مەملەكەتتىك 14 - كەزەكتى حالىق قۇرىلتايىنىڭ 1 - ءماجىلىسى 3 - ايدىڭ 5 - كۇنى بەيجيڭدەگى حالىق سارايىندا اشىلدى. پارتيا مەن مەملەكەت باسشىلارىنان شي جينپيڭ، لي كىچياڭ، لي جانشۋ، ۋاڭ ياڭ، لي چياڭ، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي، ۋاڭ چيشان قاتارلىلار ماجىلىسكە قاتىناستى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
|
شينحۋا اگەنتتىگى، 3 - ايدىڭ 5 – كۇنى، بەيجيڭ. مەملەكەتتىك 14 - كەزەكتى حالىق قۇرىلتايىنىڭ 1 - ءماجىلىسى 3 - ايدىڭ 5 - كۇنى تۇستەن بۇرىن بەيجيڭدەگى حالىق سارايىندا اشىلدى. جاڭا كەزەكتى مەملەكەتتىك حالىق قۇرىلتايىنىڭ 3 مىڭعا جۋىق ۋاكىلى حالىقتىڭ ماڭىزدى تاپسىرماسىن ارقالاپ سالتاناتتى جينالىسقا قاتىناسىپ، نەگىزگى زاڭ مەن زاڭداردا بەرىلگەن قاسيەتتى قىزمەت مىندەتتەرىن مۇقيات وتەدى.
بەيجيڭدە العاشقى كوكتەمنىڭ جىلى لەبى ەسىپ، بارلىق جەردەن تىرشىلىك تىنىسى قاۋلادى. حالىق سارايىنىڭ ۇلكەن زالى ايبىندى، قىزۋ مەرەيگە شومدى، ءتوراعالار مىنبەسىندەگى شىمىلدىقتىڭ ءدال ورتاسىنداعى مەملەكەت گەربى نارت قىزىل تۋمەن جايناي ءتۇستى.
ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى جاۋ لىجي ءماجىلىستى باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى لي گانجيە، لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋەي، ۋ ۋەيحۋا ءتوراعالار مىنبەسىندەگى اتقارۋشى ءتوراعالار ورنىنا جايعاستى.
شي جينپيڭ، لي كىچياڭ، لي جانشۋ، ۋاڭ ياڭ، لي چياڭ، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي، ۋاڭ چيشان قاتارلىلار ءتوراعالار مىنبەسىنەن ورىن الدى.
مەملەكەتتىك 14 - كەزەكتى حالىق قۇرىلتايىنىڭ 1 - ماجىلىسىنە قاتىناسۋعا ءتيىستى ۋاكىل 2977 ادام. 3 - ايدىڭ 5 - كۇنگى ءتۇستىڭ الدىنداعى جيىنعا 2948 ۋاكىل قاتىناستى، 29 ۋاكىل قاتىناسا المادى، قاتىناسقان ۋاكىل سانى زاڭدا بەلگىلەنگەن ادام سانىنا ۇيلەسەدى.
تۇستەن بۇرىن ساعات 9 دا جاۋ لىجي جۇڭحۋا حالىق رەسپۋبليكاسى مەملەكەتتىك 14 - كەزەكتى حالىق قۇرىلتايى 1 - ءماجىلىسىنىڭ اشىلعانىن جاريالادى. زالداعى بارلىق ادام ورىندارىنان تۇرىپ، اسكەري وركەستردىڭ سۇيەمەلدەۋىمەن مەملەكەت گيمنىن اسقاقتاتا شىرقادى.
ءماجىلىستىڭ كەڭەستىك ءتارتىبى بويىنشا، مەملەكەتتىك كەڭەستىڭ زۇڭليى لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى. بايانداما 2 بولىمنەن قۇرالعان: 1. وتكەن ءبىر جىلداعى جانە 5 جىلداعى قىزمەتتەرگە شولۋ؛ 2. بيىلعى ۇكىمەت قىزمەتى تۋرالى ۇسىنىستار.
لي كىچياڭ باياندامادا بىلاي دەپ اتاپ كورسەتتى: 2022 – جىل پارتيا مەن مەملەكەت تاريحىنداعى توتەنشە ماڭىزدى ءبىر جىل بولدى. پارتيانىڭ 20 - قۇرىلتايى جەڭىسپەن اشىلىپ، جاپپاي سوتسياليستىك وسىزاماندانعان مەملەكەت قۇرۋدىڭ ۇلى جوباسى جاسالدى. قيىن – قىستاۋ حالىقارالىق ورتا مەن ەل ىشىندەگى جاپالى دا اۋىر رەفورما، دامۋ، ورنىقتىلىق مىندەتى الدىندا، شي جينپيڭ جولداستى ۇيىتقى ەتكەن پارتيا ورتالىق كوميتەتى بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، قيىندىقتاردان تايسالماي العا ۇمتىلىپ، ىندەتتەن ساقتانۋ - تىزگىندەۋ، ەكونوميكانى ورنىقتىرۋ، حاۋىپسىز دامۋ تالابىن جاپپاي تياناقتاندىرىپ، ماكرولىق تىزگىندەۋ تەبىنىن ارتتىرىپ، ەكونوميكانىڭ ورنىقتى اينالىمىن، دامۋ ساپاسىنىڭ ورنىقتى جوعارىلاۋىن، قوعامدىق جالپى جاعدايدىڭ ورنىقتىلىعىن ساقتادى، ەلىمىزدىڭ دامۋى وڭاي - وسپاق قولعا كەلمەگەن تىڭ تابىستارعا قول جەتكىزدى.
لي كىچياڭ باياندامادا بىلاي دەپ اتاپ كورسەتتى: وتكەن 5 جىل وتە ەرەكشە، توتەنشە وزگەشە بولدى. شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ءبىز دۇنيە ءجۇزىنىڭ وزگەرىسى جەدەل قۇبىلۋ، جاڭا تيپتى ايدارشا ۆيرۋس وكپە قابىنۋ ىندەتىنىڭ سوققىسى، ەل ءىشى ەكونوميكاسى قۇلدىراۋ سياقتى كوپ ءتۇرلى سىننان ءوتىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزىپ، ۋاعىندا جاپپاي دوڭگەلەك داۋلەتتى قوعام قۇرىپ شىعىپ، ءبىرىنشى 100 جىلدىق كۇرەس نىساناسىن جۇزەگە اسىرىپ، ەكىنشى 100 جىلدىق كۇرەس نىساناسىنا جورىق جاساۋدىڭ جاڭا ساپارىن باستادىق.
لي كىچياڭ باياندامادا بىلاي دەپ اتاپ كورسەتتى: 5 جىلدان بەرى ءبىز شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ شەشىمدەرىن، ورنالاستىرۋلارىن ىشكەرىلەي دايەكتىلەندىرىپ، ماكرولىق تىزگىندەۋدە جاڭالىق اشىپ، ەكونوميكالىق اينالىمنىڭ ۇيلەسىمدى ارالىقتا بولۋىن ساقتادىق؛ كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزىپ، كەدەيلىكتەن ارىلتۋدان قامال الۋدىڭ جەتىستىكتەرىن بەكەمدەپ جانە كەڭەيتىپ، نازاردى ءتۇيىندى سالالار مەن شەشۋشى بۋىندارعا شوعىرلاندىرىپ، رەفورمانى تەرەڭدەتىپ، بازاردىڭ ومىرشەڭدىك كۇشى مەن قوعامنىڭ جاسامپازدىق قۋاتىن بارىنشا ارتتىردىق؛ جاڭالىق اشۋ ارقىلى دامۋعا دەم بەرۋ ستراتەگياسىن ىشكەرىلەي اتقارىپ، كاسىپ قۇرىلىمىن ساپالىلاندىرۋدى، دەڭگەيىن جوعارىلاتۋدى ىلگەرىلەتتىك؛ ىشكى ۇتىمدى سۇرانىستى كەڭەيتىپ، وڭىرلەردىڭ سايكەستى دامۋىن جانە جاڭاشا قالا - قالاشىقتاندىرۋدى ىلگەرىلەتتىك؛ مەملەكەتتىڭ استىق حاۋىپسىزدىگىن قامتاماسىز ەتىپ، اۋىل - قىستاقتى گۇلدەندىرۋ ستراتەگياسىن بار كۇشپەن اتقاردىق؛ سىرتقا ەسىك اشۋدى باتىل كەڭەيتىپ، ءوزارا پايدا جەتكىزىپ، تەڭ يگىلىككە كەنەلەتىن حالىقارالىق ەكونوميكا - ساۋدا سەلبەستىگىن تەرەڭدەتتىك؛ ەكولوگيالىق ورتانى قورعاۋدى كۇشەيتىپ، جاسىل، تومەن كومىرتەكتى دامۋدى جەبەدىك؛ حالىق تۇرمىسىن شىنايى قامتاماسىزداندىرىپ جانە جاقسارتىپ، قوعامدىق ىستەردىڭ دامۋىن جەدەلدەتتىك؛ ۇكىمەتتىڭ مىندەتىن زاڭ بويىنشا اتقارۋى مەن باسقارۋدا جاڭالىق جاراتۋىن ىلگەرىلەتىپ، قوعامدىق جالپى جاعدايدىڭ ورنىقتىلىعىن ساقتادىق.
لي كىچياڭ باياندامادا بىلاي دەپ اتاپ كورسەتتى: سوڭعى جىلدارى ەلىمىزدىڭ دامۋىندا قول جەتكەن تابىستار − شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىنىڭ ناتيجەسى، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ عىلمي جەتەكشىلىگىنىڭ ناتيجەسى، بۇكىل پارتيانىڭ، بۇكىل ارميانىڭ، بۇكىل ەلدەگى ءار ۇلت حالقىنىڭ ىنتىماقتاسا كۇرەس جۇرگىزۋىنىڭ ناتيجەسى.
لي كىچياڭ باياندامادا بىلاي دەپ اتاپ كورسەتتى: ءبىز ەلىمىزدىڭ وركەندەپ كەلە جاتقان ءىرى ەل ەكەنىن، ءالى دە سوتسياليزمنىڭ العاشقى ساتىسىندا تۇرعانىن، دامۋدىڭ بىركەلكى، تولىق بولماۋى ماسەلەسى ءالى دە كورنەكتى ەكەنىن سەرگەكتىكپەن تانىپ جەتتىك. ماسەلەلەرگە، سىن - سايىسقا بەتپە - بەت كەلىپ، ۇكىمەت قىزمەتىن بار ىنتا - پەيىلىمىزبەن جاقسارتىپ، حالىقتىڭ ءۇمىتىن اقتاۋىمىز كەرەك.
لي كىچياڭ باياندامادا بىلاي دەپ اتاپ كورسەتتى: بيىل − پارتيا 20 - قۇرىلتايىنىڭ رۋحىن جاپپاي دايەكتىلەندىرۋدىڭ باستاما جىلى. دامۋدىڭ باستى مەجەلى نىسانالارى مىنالار: ىشكى ءوندىرىستىڭ جالپى قۇنىن %5 اينالاسىندا ارتتىرۋ؛ قالا - قالاشىقتا 12 ميلليون اينالاسىنداعى ادامدى تىڭنان جۇمىستاندىرۋ، قالا - قالاشىقتا تەكسەرىلگەن جۇمىسسىزدىق شاماسىن %5.5 اينالاسىندا تىزگىندەۋ؛ تۇرعىنداردىڭ تۇتىنۋ باعاسىنىڭ قىمباتتاۋ مولشەرىن %3 اينالاسىندا تىزگىندەۋ؛ تۇرعىندار كىرىسىنىڭ ارتۋىن ەكونوميكانىڭ ارتۋىمەن نەگىزىنەن سايكەستىرۋ؛ يمپورت - ەكسپورتتىڭ ورنىقتىلىعىن جەبەپ، ساپاسىن جوعارىلاتىپ، حالىقارالىق كىرىس - شىعىستىڭ تەپە - تەڭدىگىن نەگىزىنەن ساقتاۋ؛ استىق ءونىم مولشەرىن ءبىر تريلليون 300 ميلليارد جىڭنان اسىرۋ؛ ىشكى ءوندىرىستىڭ جالپى قۇنىنداعى ەنەرگيانىڭ بىرلىكتىك جۇمسالىمى مەن باستى لاس زاتتاردىڭ شىعارىلۋ مولشەرىن ۇزدىكسىز تومەندەتىپ، قازبا ەنەرگيانىڭ تۇتىنىلۋىن ءتۇيىندى تۇردە تىزگىندەپ، ەكولوگيالىق ورتانىڭ ساپاسىن ورنىقتى جاقسارتۋ.
بيىلعى ۇكىمەت قىزمەتى جونىندەگى ۇسىنىستا لي كىچياڭ مىناداي بىرنەشە ءتۇيىندى ورتاعا قويدى: ءبىرىنشى، ىشكى سۇرانىستى كۇش سالا كەڭەيتۋ؛ ەكىنشى، وسىزاماندانعان كاسىپ جۇيەسىن قۇرۋدى جەدەلدەتۋ؛ ءۇشىنشى، «ەكىدەن استە اۋىتقىماۋدى» شىن مانىندە تياناقتاندىرۋ؛ ءتورتىنشى، شەتەل قارجىسىن اناعۇرلىم زور تەبىنمەن باۋراۋ جانە پايدالانۋ؛ بەسىنشى، كەلەلى ەكونوميكالىق، فينانستىق حاۋىپ - قاتەردەن ۇتىمدى ساقتانۋ جانە ونى جويۋ؛ التىنشى، استىق ءوندىرىسىن ورنىقتىرۋ جانە اۋىل - قىستاقتى گۇلدەندىرۋدى ىلگەرىلەتۋ؛ جەتىنشى، دامۋ تاسىلىندە جاسىل تيپكە بۇرىلىس جاساۋدى ىلگەرىلەتۋ؛ سەگىزىنشى، نەگىزگى حالىق تۇرمىسىن قامتاماسىز ەتۋ جانە قوعامدىق ىستەردى دامىتۋ.
باياندامادا لي كىچياڭ تاعى ۇلت، ءدىن جانە مۇھاجىرلار قىزمەتى، مەملەكەت قورعانىسى جانە ارميا قۇرىلىسى، شياڭگاڭنىڭ، اۋمىننىڭ دامۋى جانە ەكى جاعالاۋ قاتىناسى، سونداي - اق ەلىمىزدىڭ ديپلوماتيالىق ساياساتى جونىندە پايىمداۋ جاسادى.
لي كىچياڭنىڭ بايانداماسىنا قىزۋ قول شاپالاق ءۇنى كوتەرىلدى.
ءماجىلىستىڭ كەڭەستىك تارتىبىنە سايكەس، ءماجىلىس مەملەكەتتىك كەڭەستىڭ 2022 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ جاعدايى جانە 2023 - جىلعى حالىق شارۋاشىلىعى مەن قوعامدىق دامۋ جوسپارى جوباسى بايانداماسىن، سونداي - اق 2023 - جىلعى حالىق شارۋاشىلىعى مەن قوعامدىق دامۋ جوسپار جوباسىن، مەملەكەتتىك كەڭەستىڭ 2022 - جىلعى ورتالىق پەن جەرگىلىكتى ورىنداردىڭ مەجە ەسەبىنىڭ اتقارىلۋ جاعدايى جانە 2023 - جىلعى ورتالىق پەن جەرگىلىكتى ورىنداردىڭ مەجە ەسەپ جوباسى بايانداماسىن، سونداي - اق 2023 - جىلعى ورتالىق پەن جەرگىلىكتى ورىنداردىڭ مەجە ەسەپ جوباسىن تەكسەردى.
مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ تاپسىرۋىمەن مەملەكەتتىك 13 - كەزەكتى حالىق قۇرىلتايى تۇراقتى كوميتەتى باستىعىنىڭ ورىنباسارى ۋاڭ چىن زاڭ شىعارۋ زاڭىنا وزگەرىس ەنگىزۋ جوباسى جونىندە تۇسىنىك جاسادى.
زاڭ شىعارۋ زاڭىنا وزگەرىس ەنگىزۋ جوباسى جونىندەگى تۇسىنىكتە بىلاي دەپ اتاپ كورسەتىلدى: زاڭ شىعارۋ − مەملەكەتتىڭ ماڭىزدى ساياسي قيمىلى، پارتيانىڭ قۋاتتاماسى مەن حالىقتىڭ ەركىن زاڭدىق ءتارتىپ ارقىلى مەملەكەتتىڭ ەركىنە اينالدىرۋ بارىسى، ول پارتيا مەن مەملەكەت ىستەرىنىڭ دامۋ جالپى جاعدايىنا سايادى. زاڭ شىعارۋ زاڭى − مەملەكەتتىڭ زاڭ شىعارۋ ءتۇزىمى مەن زاڭ شىعارۋ قيمىلىن ارناعا تۇسىرەتىن، سوتسياليستىك زاڭمەن باسقارۋدىڭ بىرلىگىن قورعايتىن نەگىزدىك زاڭ. پارتيانىڭ 18 - قۇرىلتايىنان بەرى شي جينپيڭ جولداستى ۇيىتقى ەتكەن پارتيا ورتالىق كوميتەتى جۇڭگوشا سوتسياليزمدە تاباندى بولۋ جانە ونى دامىتۋ جالپى جاعدايى مەن ستراتەگيالىق تۇرعىسىنان مەملەكەتتى جاپپاي زاڭمەن جونگە سالۋ جونىندە ءبىرسىپىرا كەلەلى ورنالاستىرۋ جاساپ، ءبىرسىپىرا كەلەلى قىزمەتتى ىلگەرىلەتىپ، تاريحي تابىستارعا قول جەتكىزدى. باس شۋجي شي جينپيڭ مەملەكەتتى جاپپاي زاڭمەن جونگە سالۋ جونىندەگى ءبىرقىدىرۋ كەلەلى نازاريالىق جانە امالياتتىق ماسەلەنى تەرەڭ پايىمدادى، شي جينپيڭ زاڭمەن جونگە سالۋ يدەياسى جاڭا داۋىردە مەملەكەتتى جاپپاي زاڭمەن جونگە سالۋ، زاڭ شىعارۋ قىزمەتىن كۇشەيتۋ جانە جاقسارتۋ ءۇشىن ءتۇبىرلى تياناق ازىرلەدى.
تۇسىنىكتە مىنالار اتاپ كورسەتىلدى: زاڭ شىعارۋ زاڭىنا وزگەرىس ەنگىزۋ − جاڭا داۋىردە پارتيانىڭ زاڭ شىعارۋ قىزمەتىنە جاپپاي باسشىلىعىن كۇشەيتىپ، زاڭمەن جونگە سالۋ ارقىلى پارتيانىڭ لۋشيان، باعىت - ساياساتىنىڭ جانە شەشىم - ورنالاستىرۋىنىڭ دايەكتى اتقارىلۋىنا كەپىلدىك ەتۋدىڭ قاجەتتى تالابى؛ جاڭا داۋىردە جالپى بارىستىق حالىق دەموكراتياسىندا تاباندى بولىپ جانە ونى دامىتىپ، زاڭمەن باسقارۋ ارقىلى حالىقتىڭ ءوز – وزىنە قوجا بولۋىن قامتاماسىز ەتۋدىڭ وبيەكتيۆ تالابى؛ جاڭا داۋىردە مەملەكەتتى جاپپاي زاڭمەن جونگە سالۋدى، مەملەكەتتى نەگىزگى زاڭ بويىنشا جونگە سالۋدى ىلگەرىلەتۋدىڭ، سوتسياليستىك زاڭمەن جونگە سالىناتىن مەملەكەت قۇرۋدىڭ ماڭىزدى شاراسى؛ جاڭا داۋىردە رەفورما مەن زاڭمەن جونگە سالۋدىڭ قاتىناسىن دۇرىس ءبىر جاقتى ەتۋدىڭ امالياتتىق تاجىريبەلەرىن قورىتىندىلاپ، زاڭمەن جونگە سالۋ جاعدايىندا رەفورمانى ىلگەرىلەتۋ مەن رەفورما بارىسىندا زاڭمەن جونگە سالۋدى كەمەلدەندىرۋدىڭ بىرلىگىندە اناعۇرلىم ويداعىداي تاباندى بولۋدىڭ رەال قاجەتى. زاڭ شىعارۋ زاڭىنىڭ وزگەرىس ەنگىزۋ جوباسى جيىنى 37 تارماق. ءبىرىنشى، زاڭ شىعارۋدىڭ جەتەكشى يدەياسى مەن پرينسيبىن كەمەلدەندىرۋ؛ ەكىنشى، نەگىزگى زاڭعا ۇيلەسىمدىلىگىن تەكسەرۋگە قاتىستى تالاپتاردى ايقىنداۋ؛ ءۇشىنشى، زاڭ شىعارۋ شەشىمى مەن رەفورما شەشىمى ۇشتاساتىن، بىرلىككە كەلگەن ءتۇزىم مەحانيزمىن كەمەلدەندىرۋ؛ ءتورتىنشى، مەملەكەتتىك حالىق قۇرىلتايىنىڭ جانە ونىڭ تۇراقتى كوميتەتىنىڭ زاڭ شىعارۋ ۇقىق شەگىن، زاڭ شىعارۋ ءتارتىبىن جانە قىزمەت مەحانيزمىن كەمەلدەندىرۋ؛ بەسىنشى، باقىلاۋ ءتۇزىلىسى رەفورماسىنىڭ قاجەتىنە سايكەسىپ قاتىستى مازمۇنداردى تولىقتاۋ؛ التىنشى، جەرگىلىكتى سيپات العان زاڭ بەلگىلەمەسىنىڭ، ەرەجەنىڭ ۇقىق شەگى مەن ءتارتىبىن كەمەلدەندىرۋ؛ جەتىنشى، ەستەلىككە الىپ تەكسەرۋ ءتۇزىمىن كەمەلدەندىرۋ.
ءماجىلىس داۋىسقا سالۋ ارقىلى 14 - كەزەكتى مەملەكەتتىك حالىق قۇرىلتايى 1 – ءماجىلىسىنىڭ 14 - كەزەكتى مەملەكەتتىك حالىق قۇرىلتايىنىڭ ارناۋلى كوميتەتتەرىن قۇرۋ تۋراسىنداعى قارارىن ماقۇلدادى، مەملەكەتتىك 14 - كەزەكتى حالىق قۇرىلتايى 1 - ءماجىلىسىنىڭ مەملەكەتتىك 14 - كەزەكتى حالىق قۇرىلتايى ارناۋلى كوميتەتتەرىنىڭ مەڭگەرۋشى مۇشەسىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ كانديدات ەسىمدىگىن داۋىسقا سالۋ ءادىسىن ماقۇلدادى، مەملەكەتتىك 14 - كەزەكتى حالىق قۇرىلتايى نەگىزگى زاڭ جانە زاڭدار كوميتەتىنىڭ مەڭگەرۋشى مۇشەسىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ ەسىمدىگىن ماقۇلدادى، مەملەكەتتىك 14 - كەزەكتى حالىق قۇرىلتايى قازىنا - ەكونوميكا كوميتەتىنىڭ مەڭگەرۋشى مۇشەسىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ ەسىمدىگىن ماقۇلدادى.
ما شيڭرۇي، ۋاڭ ي، يىن لي، شى تايفىڭ، ليۋ حى، ليۋ گوجۇڭ، شۇي چيلياڭ، سۇن چۇنلان، لي شۋلەي، ياڭ شياۋدۋ، حى ۋەيدۇڭ، حى ليفىڭ، جاڭ يوۋشيا، جاڭ گوچيڭ، چىن ۋىنچيڭ، چىن جينيڭ، چىن مين - ىر، حۋ چۇنحۋا، يۋان جياجۇن، حۋاڭ كۇنميڭ، ليۋ جينگو، ۋاڭ شياۋحۇڭ، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، بايماچىلين، ۋەي فىڭحى، ۋاڭ يۇڭ، جاۋ كىجى، جوۋ چياڭ، جاڭ جۇن، ليۋ چيباۋ، پابالا گىلەلاڭجيە، ۋان گاڭ، حى حوۋحۋا، لۋ جانگۇڭ، ما بياۋ، چىن شياۋگۋاڭ، لياڭ جىنيىڭ، شيا باۋلۇڭ، ياڭ چۋانتاڭ، لي بين، باتىر، ۋاڭ يۇڭچيڭ، سۋ حۇي، گۋ شىڭزۋ، ليۋ شينچىڭ، شاۋ حۇڭ، گاۋ يۇنلۇڭ، سونداي - اق ورتالىق اسكەري ىستەر كوميتەتىنىڭ مۇشەلەرى لي شاڭفۋ، ليۋ جىنلي، مياۋ حۋا، جاڭ شىڭمين قاتارلىلار دا ءتوراعالار مىنبەسىنەن ورىن الدى.
شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ اكىمى حى ي - چىڭ ماجىلىسكە سىرتتاي قاتىناستى ءارى ءتوراعالار مىنبەسىنەن ورىن الدى.
مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ مۇشەلەرى ماجىلىسكە سىرتتاي قاتىناستى. ساياسي كەڭەس مەملەكەتتىك 14 - كەزەكتى كوميتەتىنىڭ 1 - ماجىلىسىنە قاتىناسىپ جاتقان ساياسي كەڭەس مۇشەلەرى ماجىلىسكە سىرتتاي قاتىناستى.
ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميانىڭ قاتىستى ورىندارىنىڭ جانە قارۋلى ساقشى بولىمدەرىنىڭ، حالىقتىق ۇيىمداردىڭ قاتىستى جاۋاپتىلارى ماجىلىسكە سىرتتاي قاتىناستى نەمەسە سىرتتاي تىڭدادى.
شەتەلدەردىڭ جۇڭگودا تۇراتىن ەلشىلەرى ءماجىلىستى سىرتتاي تىڭدادى.
كەلۋ قاينارى: حالىق تورابى
 |
مەملەكەتتىك 14 - كەزەكتى حالىق قۇرىلتايىنىڭ 1 - ءماجىلىسى 3 - ايدىڭ 5 - كۇنى بەيجيڭدەگى حالىق سارايىندا اشىلدى. مەملەكەتتىك كەڭەستىڭ زۇڭليى لي كىچياڭ ۇكىمەت قىزمەتىنەن بايانداما جاسادى. سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن
|
 |
مەملەكەتتىك 14 - كەزەكتى حالىق قۇرىلتايىنىڭ 1 - ءماجىلىسى 3 - ايدىڭ 5 - كۇنى بەيجيڭدەگى حالىق سارايىندا اشىلدى. جاۋ لىجي ءماجىلىستى باسقاردى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
|
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
