شي جينپيڭ ”پالەستينا حالقىنا مەدەت بەرۋ حالىقارالىق كۇنىن“ اتاپ ءوتۋ جينالىسىنا قۇتتىقتاۋ تەلەگرامماسىن جولدادى

شينحۋا اگەنتتىگى، 11 - ايدىڭ 27 – كۇنى، بەيجيڭ. 11 - ايدىڭ 26 - كۇنى بىرلەسكەن مەملەكەتتەر ۇيىمى ”پالەستينا حالقىنا مەدەت بەرۋ حالىقارالىق كۇنىن“ اتاپ ءوتۋ جينالىسىن وتكىزدى، مەملەكەت ءتوراعاسى شي جينپيڭ جينالىسقا قۇتتىقتاۋ تەلەگرامماسىن جولدادى.

شي جينپيڭ بىلاي دەپ اتاپ كورسەتتى: پالەستينا ماسەلەسى − ورتا شىعىس ماسەلەسىنىڭ وزەگى، حالىقارالىق ادىلدىك پەن ادىلەتتىلىككە سايادى. قازىرگى شۇعىل مىندەت بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ قاتىستى قاۋلىلارىن جاپپاي، ءونىمدى اتقارىپ، سوعىستى تەز ارادا توقتاتىپ، وڭىرلىك جاعدايدى باسەڭدەتۋ. ءتۇبىرلى شىعار جول − ”ەكى ەل جوباسىن“ ناقتى تياناقتاندىرىپ، پالەستينا ماسەلەسىنىڭ ساياسي جولمەن شەشىلۋىن ىلگەرىلەتىپ، 1967 - جىلعى شەكارانى نەگىز، شىعىس يەرۋساليمدى استانا ەتكەن، تولىق يەلىك ۇقىقتان يگىلىكتەنەتىن تاۋەلسىز پالەستينا مەملەكەتىن قۇرىپ، پالەستين حالقىنىڭ مەملەكەت قۇرۋ ۇقىعىن، ءومىر ءسۇرۋ ۇقىعىن، قايتا ورالۋ ۇقىعىن جۇزەگە اسىرۋ.

شي جينپيڭ بىلاي دەپ باسا دارىپتەدى: جۇڭگو پالەستينا حالقىنىڭ ۇلتتىڭ زاڭدى ۇقىعىن قالپىنا كەلتىرۋ سىندى ادىلەتتى ءىسىن باستان - اياق باتىل قولدايدى، پالەستيناداعى ءارقايسى توپتىڭ ىنتىماقتى كۇشەيتىپ، «بولشەكتەنۋدى اياقتاتىپ، پالەستينا ۇلتىنىڭ ىنتىماعىن كۇشەيتۋ جونىندەگى بەيجيڭ جارناماسىن» تياناقتاندىرىپ، ىشكى راقايلاسۋدى جۇزەگە اسىرۋىن قولدايدى. جۇڭگو پالەستينانىڭ بىرلەسكەن مەملەكەتتەر ۇيىمىنىڭ رەسمي مۇشە ەلى بولۋىن باتىل قولدايدى، اناعۇرلىم كەڭ كولەمدى، اناعۇرلىم بەدەلدى، اناعۇرلىم ناقتى ونىمدىلىككە يە حالىقارالىق بەيبىتشىلىك ءماجىلىسىن اشۋدى قولدايدى. جۇڭگو حالىقارالىق قوعاممەن بىرگە سوعىس ءورتىن تىنىشتاندىرۋدى، قىرعىنداۋدى توقتاتۋدى ۇزدىكسىز ىلگەرىلەتىپ، بىرلەسكەن مەملەكەتتەر ۇيىمىنىڭ تاياۋ شىعىستاعى پالەستين بوسقىندارىن قۇتقارۋ جانە ينجەنەريا باسقارماسىنىڭ گازا حالقىنا ادامگەرشىلىك كومەك بەرۋىن قولداپ، پالەستين ماسەلەسىنىڭ ”ەكى ەل جوباسىنىڭ“ دۇرىس ارناسىنا ءتۇسىپ، ەرتەرەك جان - جاقتى، ءادىل، باياندى شەشىلۋىن ىلگەرىلەتەدى.

كەلۋ قاينارى: حالىق تورابى