2024 – جىلعى ەكى جاعالاۋ كاسىپورىنشىلارى باسشىلار باس قوسۋىنىڭ جىلدىق ءماجىلىسى اشىلدى

شينحۋا اگەنتتىگى، 12 - ايدىڭ 9 – كۇنى، شيامىن. 2024 – جىلعى ەكى جاعالاۋ كاسىپورىنشىلارى باسشىلار باس قوسۋىنىڭ جىلدىق ءماجىلىسى 12 - ايدىڭ 9 - كۇنى شيامىن قالاسىندا وتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ حۋنيڭ ەكى جاعالاۋ كاسىپورىنشىلارى باسشىلار باس قوسۋى القالار كەڭەسىنە قۇتتىقتاۋ حاتىن جولداپ، باس شۋجي شي جينپيڭ مەن جۇڭگو كوممۋنيستىك پارتياسى ورتالىق كوميتەتى اتىنان جىلدىق ءماجىلىستىڭ اشىلعاندىعىن قۇتتىقتادى، باسشىلار باس قوسۋىنىڭ بارلىق مۇشەلەرى مەن ماجىلىسكە قاتىناسقان سيلى قوناقتارعا سالەم جولدادى.

ۋاڭ حۋنيڭ مىنانى ءبىلدىردى: كوپ جىلدان بەرى ەكى جاعالاۋ كاسىپورىنشىلارى باسشىلار باس قوسۋى ەكى جاعالاۋ كاسىپورىندارى مەن ونەركاسىپ - ساۋدا سالاسىنداعى قايراتكەرلەردى كەڭ كولەمدە ىنتىماقتاستىرىپ، ەكى جاعالاۋ قارىم - قاتىناسىنىڭ بەيبىت دامۋىن، توعىسپالى دامۋىن جەبەۋگە ماڭىزدى ۇلەس قوستى. جاڭا ءداۋىردىڭ جاڭا جورىعىندا ەكى جاعالاۋ كاسىپورىنشىلارى باس قوسۋى كوپىرلىك، دانەكەرلىك رولىن ۇزدىكسىز ساۋلەلەندىرىپ، ەكى جاعالاۋدىڭ اۋىس - كۇيىسىن، بارىس - كەلىسىن كۇشەيتىپ، ەكى جاعالاۋدىڭ ەكونوميكالىق سەلبەستىگىنىڭ جوعارى ساپالى دامۋىن ىلگەرىلەتىپ، جۇڭحۋا ۇلتىنىڭ ەكونوميكاسىن زورايتۋى كەرەك.

ۋاڭ حۋنيڭ بىلاي دەپ اتاپ كورسەتتى: جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى رەفورمانى اناعۇرلىم جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە جۇيەلى ورنالاستىرۋ جاساپ، ەكى جاعالاۋدىڭ اۋىس - كۇيىسىنە، سەلبەستىگىنە، بىرگە دامۋىنا، ءوزارا پايدا جەتكىزىپ، تەڭ يگىلىككە كەنەلۋىنە جاڭا قوزعاۋشى كۇش قوسىپ، جاڭا وراي ازىرلەدى. ءبىز جۇڭگو كوممۋنيستىك پارتياسى 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ رۋحىن ىشكەرىلەي دايەكتىلەندىرىپ، ءبىر جۇڭگو پرينسيبى مەن ”1992 - جىلعى ورتاق تانىمعا“ تاباندى بولىپ، ”تايۋان دەربەستىگىنە“ جانە سىرتتىڭ كيلىگۋىنە باتىل قارسى تۇرىپ، ەكى جاعالاۋدىڭ ەكونوميكا، مادەنيەت اۋىس - كۇيىسى مەن سەلبەستىگىن جەبەپ، ەكى جاعالاۋدىڭ ءار سالاسىنىڭ توعىسا دامۋىن تەرەڭدەتىپ، تايۋاندىق باۋىرلاستاردىڭ، تايۋان كاسىپورىندارىنىڭ جۇڭگو ۇلگىسىندەگى وسىزامانداندىرۋ قۇرىلىسىنا قاتىناسىپ، وتان ۇلى قۇرلىعىنىڭ دامۋ، العا باسۋ جەتىستىكتەرىنەن بىرگە يگىلىكتەنۋىن قولداپ، ەكى جاعالاۋداعى باۋىرلاستاردىڭ تۋىسقاندىق ىرىس - قۇتىن ارتتىرامىز.

ۋاڭ حۋنيڭ مىنانى ءبىلدىردى: ەكى جاعالاۋداعى باۋىرلاستاردىڭ، ەكى جاعالاۋداعى كاسىپورىنشىلاردىڭ ۇلتتىڭ ۇلى مۇراتىن ۇستانىپ، ءداۋىر اعىمىنا سايكەسىپ، ەكى جاعالاۋ قارىم - قاتىناسى دامۋىنىڭ دۇرىس بەتالىسىن يگەرىپ، جۇڭحۋا ۇلتىنىڭ تاعدىرىن جۇڭگولىقتاردىڭ ءوز قولىندا بەرىك ۇستاپ، وتاننىڭ تۇتاستىعىنىڭ، ۇلتتىڭ گۇلدەنۋىنىڭ شۇعىلالى داستانىن بىرگە جازۋىن ءۇمىت ەتەمىن.

باسشىلار باس قوسۋىنىڭ ۇلى قۇرلىق جاق القا باستىعى گو جينلۇڭ جانە تايۋان جاق القا باستىعى ليۋ جاۋشۋان قاتارلىلار جىلدىق ماجىلىسكە قاتىناستى. وسى رەتكى باسشىلار باس قوسۋى جىلدىق ءماجىلىسىنىڭ تاقىرىبى: ”ەكى جاعالاۋدىڭ جاڭا داۋىردەگى كاسىپ تىزبەگىن قالىپتاستىرىپ، ەكى جاعالاۋ ەكونوميكاسىنىڭ توعىسپالى دامۋىن جەبەۋ“ بولدى، اشىلۋ سالتى، تاقىرىپتىق لەكسيا، باسشىلار باس قوسۋىنىڭ ءارقايسى كاسىپ سالاسى سەلبەستىگىن ىلگەرىلەتۋ گرۋپپالارىنىڭ ارناۋلى تاقىرىپتىق تالقى مىنبەرى جانە جىلدىق قورىتىندى سياقتى قيمىلداردى قامتىدى. ەكى جاعالاۋدىڭ ونەركاسىپ - ساۋدا سالاسىنان 700 دەن استام قايراتكەر ماجىلىسكە قاتىناستى.

كەلۋ قاينارى: حالىق تورابى