شي جينپيڭ باستى حالىقارالىق ەكونوميكالىق ۇيىمداردىڭ جاۋاپتىلارىمەن كەزدەستى

12 - ايدىڭ 10 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا ”10+1“ سۇحپات ماجىلىسىنە قاتىناسۋ ءۇشىن جۇڭگوعا كەلگەن نەگىزگى حالىقارالىق ەكونوميكالىق ۇيىمداردىڭ جاۋاپتىلارىمەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 12 - ايدىڭ 10 - كۇنى، بەيجيڭ. 12 - ايدىڭ 10 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا ”10+1“ سۇحپات ماجىلىسىنە قاتىناسۋ ءۇشىن جۇڭگوعا كەلگەن نەگىزگى حالىقارالىق ەكونوميكالىق ۇيىمداردىڭ جاۋاپتىلارىمەن كەزدەستى.

شي جينپيڭ نەگىزگى حالىقارالىق ەكونوميكالىق ۇيىمداردىڭ جاۋاپتىلارىمەن بىرگە توپتىق سۋرەتكە ءتۇسىپ، ەستەلىك قالدىرىپ، ولاردىڭ جۇڭگونىڭ وسىزاماندانۋ ىستەرىنە ۇزاق ۋاقىت قولداۋ كورسەتكەندىگىنە العىس ايتتى.

شي جينپيڭ بىلاي دەپ اتاپ كورسەتتى: قازىر 100 جىلدىق وزگەرىس جەدەل قۇبىلىپ، دۇنيە ءجۇزى جاڭا اۋمالى - توكپەلى وزگەرىس مەزگىلىنە ءوتىپ، تاعى دا شەشۋشى جول ايىرىعىندا تۇر. ادامزات − قۋانىش پەن جۇبانىشتا بىرگە بولاتىن تاعدىرلاس ورتاق تۇلعا، ءار ەل 190 نەشە قايىققا وتىرمايدى، قايتا تاعدىرلاس ۇلكەن كەمەگە وتىرادى، ءبىر - ءبىرىنىڭ دامۋىن سايىسقا ەمەس، قايتا ورايعا بالاۋى، ءبىر - ءبىرىن قارسىلاس ەمەس، قايتا ارىپتەس دەپ ساناۋى، ”ۇقساس جەر شارى مەكەنىندە ءبىر جاعادان باس، ءبىر جەڭنەن قول شىعارۋدى“، ىنتىماقتاسا سەلبەسۋدى، ءوزارا پايدا جەتكىزىپ، تەڭ يگىلىككە كەنەلۋدى ءداۋىردىڭ نەگىزگى اۋەنىنە اينالدىرۋى كەرەك. جۇڭگو جاق نەگىزگى حالىقارالىق ەكونوميكالىق ۇيىمدارمەن كوپ جاقتىلىقتى امالياتتا ايگىلەپ، حالىقارالىق سەلبەستىكتى جەبەپ، دۇنيە جۇزىندەگى وڭتۇستىك ەلدەردىڭ دامۋىنا قولداۋ كورسەتىپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىن، ەكونوميكانىڭ جالپىعا ءتيىمدى، سيىسىمدى جاھاندانۋىن ىلگەرىلەتىپ، بىرگە داميتىن ءادىل دۇنيە ءجۇزىن قۇرۋدى قالايدى.

جاڭا اشۋ بانكەسىنىڭ باستىعى روسەف، حالىقارالىق اقشا قورى ۇيىمىنىڭ باسالقاسى گەورگيەۆا، دۇنيە ءجۇزى بانكەسىنىڭ باستىعى پىڭ انجيە، دۇنيە جۇزىلىك ساۋدا ۇيىمىنىڭ باسالقاسى يۆيللا سىرت جاق اتىنان ءسوز سويلەدى. ولار جۇڭگونىڭ ەكونوميكالىق دامۋ جەتىستىكتەرىن جوعارى باعالاپ، جۇڭگونىڭ دامۋ بولاشاعىنا قىزىعىپ، جۇڭگونىڭ ۇزاق ۋاقىتتان بەرى حالىقارالىق ەكونوميكالىق ۇيىمداردىڭ قىزمەتىن قولداپ كەلگەندىگىنە العىس ايتتى. ولار مىنالاردى ءبىلدىردى: جۇڭگو دامۋ جەتىستىكتەرىمەن كۇللى دۇنيە ءجۇزىن جالت قاراتتى، اسىرەسە، كەدەيلىكتى ازايتۋ سالاسىندا ادامزاتتىڭ كەرەمەتىن جاراتىپ، جاڭاشا وندىرگىش كۇش جاعىندا دۇنيە ءجۇزىنىڭ الدىڭعى لەگىندە تۇرىپ، جۇڭگو ۇكىمەتى ۇستانعان حالىقتى وزەك ەتكەن دامۋ ۇستانىمىنىڭ ءساتتى ءارى جارامدى بولعاندىعىن، دۇنيە جۇزىنە ماڭىزدى وي سالۋ مانىنە يە ەكەندىگىن تولىق دالەلدەدى. جۇڭگو باستان - اياق دۇنيە ءجۇزى ەكونوميكاسىنىڭ ارتۋىنداعى ماڭىزدى قوزعالتقىش جانە ورنىقتىلىق ياكورى، كوپ جاقتىلىقتىڭ باتىل قورعاۋشىسى بولدى. جۇڭگو رەفورمانى ۇزدىكسىز جاپپاي تەرەڭدەتىپ، سىرتقا ەسىك اشۋدى كەڭەيتىپ، جوعارى ساپالى دامۋدى جۇزەگە اسىرىپ، دۇنيە جۇزىنە، اسىرەسە، دۇنيە جۇزىندەگى وڭتۇستىك ەلدەرىنە وراسان زور وراي ازىرلەدى. ءتوراعا شي جينپيڭ ”ءبىر بەلدەۋ، ءبىر جولدى“ بىرگە قۇرۋ باستاماسىن جانە 3 ۇلكەن دۇنيە جۇزىلىك باستامانى العا قويىپ، جۇڭگونىڭ جاۋاپكەرشىلىك ارقالايتىن ءىرى ەل رەتىندەگى جاۋاپكەرشىلىگىن تولىق ايگىلەپ، دۇنيە جۇزىندەگى وڭتۇستىك ەلدەردىڭ جۇڭگونىڭ دامۋ جۇردەك پويەزىنە وتىرۋىنا، ءوزىنىڭ دامۋىن جۇزەگە اسىرۋىنا ماڭىزدى تۇعىر ازىرلەدى. قازىر دۇنيە ءجۇزى ەكونوميكاسىنىڭ جاعدايى كوپتەگەن قيىنشىلىقتار مەن سىن - سايىسقا ءدوپ كەلىپ وتىر، سىڭار جاقتىلىق، قورعانىمپازدىق ءورشىپ بارادى. دۇنيە جۇزىندەگى ءار ەل نازارىن جۇڭگوعا اۋدارۋدا، جۇڭگونىڭ دۇنيە ءجۇزى ەكونوميكاسىنىڭ ارتۋىنداعى ەڭ ماڭىزدى قوزعالتقىشتىق رولىن ۇزدىكسىز ساۋلەلەندىرۋىن ءۇمىت ەتەدى جانە وعان سەنەدى. نەگىزگى حالىقارالىق ەكونوميكالىق ۇيىمدار جۇڭگو جاقپەن تىعىز سەلبەسىپ، كوپ جاقتىلىققا تاباندى بولىپ، ەركىن ساۋدا مەن ەكونوميكانىڭ جاھاندانۋىن قورعاپ، دۇنيە ءجۇزىنىڭ بىرگە دامۋى مەن گۇلدەنۋىن جەبەۋگە اناعۇرلىم زور ۇلەس قوسىپ، ادامزاتتىڭ تاعدىرلاس بولاشاعىن بىرگە جاراتۋدى قالايدى.

شي جينپيڭ سىرت جاق ۋاكىلدەرىنىڭ ءسوزىن مۇقيات تىڭدادى ءارى دۇنيە ءجۇزى ەكونوميكاسى، جۇڭگو ەكونوميكاسى، دۇنيە جۇزىلىك ەكونوميكانى باسقارۋ سياقتى قارسى جاق كوڭىل ءبولىپ وتىرعان ماسەلەلەر جونىندە جاۋاپ قايتاردى.

شي جينپيڭ بىلاي دەپ اتاپ كورسەتتى: دۇنيە ءجۇزى ەكونوميكاسىنىڭ قۋاتتى جانە باياندى ارتۋ جولىنا ءتۇسۋىن قالاي ىلگەرىلەتۋ − حالىقارالىق قوعام ءدوپ كەلگەن كەلەلى تاقىرىپ. ءار ەل ەكونوميكاسىنىڭ وزىندىك قيىنشىلىعى بار، اشىق دۇنيە جۇزىلىك ەكونوميكالىق جۇيەنى سەلبەسىپ قۇرىپ، جاڭالىق اشۋ ارقىلى دەم بەرۋگە تاباندى بولىپ، سيفرلى ەكونوميكا، جاساندى زەردە، تومەن كومىرتەكتى تەحنيكا سياقتى ماڭىزدى ورايلاردى ويداعىداي يگەرىپ، ەكونوميكالىق ارتۋدىڭ جاڭا قوزعاۋشى كۇش قاينارىن جاراتىپ، ءبىلىم، تەحنيكا، دارىندىلاردىڭ ەل ارالىق اۋىسۋىنا قولداۋ كورسەتۋ كەرەك. ”شاعىن اۋلا، بيىك داۋال“، ”بايلانىسىن ءۇزىپ تاستاۋ“ باسقالارعا زيان جەتكىزۋمەن بىرگە، وزىنە دە زيان جەتكىزەدى. جۇڭگو جاق باستان - اياق بىلاي دەپ ەسەپتەيدى: جۇڭگو جاقسى بولسا، دۇنيە ءجۇزى جاقسى بولادى؛ دۇنيە ءجۇزى جاقسى بولسا، جۇڭگو ءتىپتى دە جاقسى بولادى. ءار ەل ەكونوميكالىق جاقتاعى ءوزارا يەك سۇيەۋدى ارتىقشىلىعىن قابىلداپ، جەتەرسىزدىگىن تولىقتايتىن، ءوزارا پايدا جەتكىزىپ، تەڭ يگىلىككە كەنەلەتىن جاقسى ءىس دەپ قاراۋى، حاۋىپ - قاتەر دەپ قاراماۋى كەرەك.

شي جينپيڭ جۇڭگو كوممۋنيستىك پارتياسى 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ قاتىستى جاعدايلارىن، اسىرەسە، جۇڭگونىڭ تاياۋدا شىعارعان جەلىلەس ماڭىزدى شارالارىن تانىستىرا كەلىپ بىلاي دەپ اتاپ كورسەتتى: 40 نەشە جىلدىق ءۇرتىس، تەز دامۋدى باستان كەشىرگەن جۇڭگو ەكونوميكاسى جوعارى ساپالى دامۋ كەزەڭىنە ءوتىپ، دۇنيە ءجۇزى ەكونوميكاسىنىڭ ارتۋىنا ۇلەس قوسۋ سالىستىرماسىن %30 اينالاسىندا ساقتادى. جۇڭگو بيىلعى ەكونوميكالىق ارتۋ نىساناسىن جۇزەگە اسىرۋعا تولىق سەنىمدى، دۇنيە ءجۇزى ەكونوميكاسىنىڭ ارتۋىنداعى ەڭ ۇلكەن قوزعالتقىشتىق رولىن ۇزدىكسىز ساۋلەلەندىرەدى. جۇڭگونىڭ دامۋى اشىق، سيىسىمدى بولادى، جۇڭگو سىرتقا ەسىك اشۋدى ۇزدىكسىز كەڭەيتىپ، حالىقارالىق جوعارى ولشەمدى ەكونوميكا - ساۋدا ەرەجەسىمەن ىرىقتىلىقپەن ۇشتاسىپ، بازارلانعان، زاڭمەن باسقارىلاتىن، حالىقارالانعان ماڭداي الدى شارۋاشىلىق - ساۋدا ورتاسىن قۇرىپ، اناعۇرلىم جوعارى دەڭگەيدەگى اشىق ەكونوميكالىق جاڭا ءتۇزىلىس ورناتىپ، دۇنيە جۇزىندەگى ءار ەلدىڭ دامۋىنا اناعۇرلىم كوپ جاڭا وراي ازىرلەپ، اناعۇرلىم كوپ دامۋ پايداسىنان بىرگە يگىلىكتەنەدى.

شي جينپيڭ ”ءبىر بەلدەۋ، ءبىر جول“ باستاماسى العا قويىلعان 10 جىلدان بەرى قول جەتكەن بەلسەندى ىلگەرىلەۋشىلىكتەردى تانىستىرا كەلىپ، بىلاي دەپ باسا دارىپتەدى: جۇڭگو − ىسكەر، ارەكەتتەنۋشى، ”شەگە قاعۋ“ رۋحىمەن ”ءبىر بەلدەۋ، ءبىر جولدى“ بىرگە قۇرۋدى تىڭعىلىقتى ىلگەرىلەتىپ، جۇڭگو مەن دۇنيە ءجۇزىنىڭ بىرگە دامۋىنىڭ كوپىرىن سالۋ كەرەك. ءارقايسى حالىقارالىق ەكونوميكالىق ۇيىمداردىڭ ”ءبىر بەلدەۋ، ءبىر جول“ قۇرىلىسىنا ۇزدىكسىز بەلسەنە ات سالىسىپ، دۇنيە جۇزىندەگى ەلدەردىڭ بەيبىت داميتىن، ءوزارا پايدا جەتكىزىپ سەلبەسەتىن، بىرگە گۇلدەنىپ - كوركەيەتىن وسىزاماندانۋدى جۇزەگە اسىرۋدى ىلگەرىلەتۋىن قارسى الامىز.

دۇنيە جۇزىلىك ەكونوميكانى باسقارۋ جونىندە شي جينپيڭ بىلاي دەپ باسا دارىپتەدى: دۇنيە ءجۇزى ەكونوميكاسىنىڭ ارتۋىن ىلگەرىلەتۋ ءونىمدى، جارامدى دۇنيە جۇزىلىك ەكونوميكانى باسقارۋدان ايرىلا المايدى. حالىقارالىق ەكونوميكالىق ۇيىمدار داۋىرمەن بىرگە العا باسىپ، ءداۋىردىڭ ۇنىنە جانە دۇنيە ءجۇزى حالقىنىڭ تىلەگىنە جاۋاپ قايتارىپ، دۇنيە جۇزىلىك ەكونوميكانى باسقارۋ جۇيەسى رەفورماسىنا بەلسەنە ات سالىسىپ جانە ونى ىلگەرىلەتىپ، دۇنيە جۇزىلىك ەكونوميكانى باسقارۋدىڭ اناعۇرلىم ءادىل، ۇيلەسىمدى جۇيەسىن ورناتىپ، دۇنيە ءجۇزى ەكونوميكاسى جاعدايىنىڭ دامۋىن، وزگەرىسىن بەينەلەپ، دۇنيە جۇزىندەگى وڭتۇستىك ەلدەرىنىڭ ۋاكىلدىك سيپاتىن جانە ءسوز بيلىگىن ارتتىرۋى كەرەك. ءار جاق بۇل جاعىندا كەيبىر ورتاق تانىمعا كەلدى، مۇنداعى شەشۋشى ءتۇيىن − بولاشاق ارماندى رەالدىققا اينالدىرۋ. دۇنيە جۇزىلىك ەكونوميكانى باسقارۋعا قانداي رەفورما جاسالسا دا، ءسوز جوق، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە، ناعىز كوپ جاقتىلىققا تاباندى بولىپ، ءار ەلدىڭ ۇقىق تەڭدىگىنە، وراي تەڭدىگىنە، ەرەجە تەڭدىگىنە شىنايى كەپىلدىك ەتۋ كەرەك.

شي جينپيڭ تاعى جۇڭگونىڭ جۇڭگو - ا ق ش قارىم - قاتىناسىن دامىتۋداعى دايەكتى پرينسيپتىك تۇرعىسىن بايانداپ، بىلاي دەپ باسا دارىپتەدى: جۇڭگو جاق ا ق ش ۇكىمەتىمەن تىلدەسۋدى جالعاستىرىپ، سەلبەستىكتى كەڭەيتىپ، الاۋىزدىقتى مەڭگەرىپ، جۇڭگو - ا ق ش قارىم - قاتىناسىنىڭ ورنىقتى، اقاۋسىز، باياندى باعىتقا قاراي دامۋىن ىلگەرىلەتۋدى قالايدى، ا ق ش - نىڭ جۇڭگومەن ءبىر باعىتتا ءجۇرۋىن ءۇمىت ەتەدى. كەدەن سالىعى سوعىسى، ساۋدا سوعىسى، عىلىم - تەحنيكا سوعىسى تاريحي اعىم مەن ەكونوميكالىق زاڭدىلىققا قايشى، مۇندا جەڭىمپاز بولمايدى. جۇڭگو زەيىن - زەردەنى شوعىرلاندىرا وتىرىپ ءوز ءىسىن ويداعىداي ىستەۋگە باستان - اياق تاباندى بولىپ، ءوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعايدى. سونىمەن بىرگە، جۇڭگو جاقتىڭ جوعارى دەڭگەيدەگى سىرتقا ەسىك اشۋدى ىلگەرىلەتۋ بەكىمى وزگەرمەيدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى