جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ، ورتالىق اسكەري ىستەر كوميتەتىنىڭ يە گۋاڭفۋعا ”2 - دارەجەلى عارىش ۇلەسكەرى مەدالىن“ بەرۋ، لي سۇڭعا، لي گۋاڭسۋعا ”قاھارمان عارىشكەر“ داڭق اتاعىن بەرۋ جانە ”3 - دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى

2024 – جىلى 4 - ايدىڭ 25 - كۇنى شىنجوۋ 18 - ءنومىرلى عارىشكەرلى الەم كەمەسى ءساتتى ۇشىرىلدى، عارىشكەر يە گۋاڭفۋ، لي سۇڭ، لي گۋاڭسۋ الەم كەمەسىنە وتىرىپ تيانحى وزەكتى بولمەسىنە ءساتتى كىرىپ، وربيتادا 6 اي تۇرىپ، ىلگەرىندى - كەيىندى 2 رەت كابينادان شىعۋ قيمىلىن جۇرگىزىپ، 6 رەت جۇك تيەيتىن گاز تيەكتى كابينادان كىرىپ - شىعۋ مىندەتىن اتقارىپ، 80 نەشە ءتۇرلى كەڭىستىك بەكەتى قۇرىلىسىنىڭ دارەجەسىن جوعارىلاتۋ، قورعاۋ، جوندەۋ مىندەتىن ورىندادى، 100 گە جۋىق كەڭىستىك عىلمي تاجىريبەسى مەن قولدانىلمالى كوتەرىمدىلىكتى وربيتادا تەكسەرۋدەن (سىناق) وتكىزۋدى ورىستەتىپ، 2024 – جىلى 11 - ايدىڭ 4 - كۇنى امان - ەسەن قايتىپ كەلدى. شىنجوۋ 18 ـ ءنومىرلى الەم كەمەسىنىڭ ادام الىپ ۇشۋ مىندەتى − ەلىمىزدىڭ عارىشقا ادام الىپ ۇشۋ ينجەنەرياسى كەڭىستىك بەكەتىن قولدانۋ جانە دامىتۋ كەزەڭىنە وتكەندەگى 3 ـ رەتكى ادام الىپ ۇشۋ مىندەتى، جۇڭگو عارىشكەرلەرىنىڭ ءبىر رەتكى مىندەتىندە وربيتادا جالعاستى ۇشۋ ۋاقىتى، ءبىر رەتكى كابينادان شىعۋ قيمىلىنىڭ ۋاقىتى رەكوردتارىن جاڭالاپ، ەلىمىزدىڭ وربيتاداعى سۋ ەكولوگياسىن زەرتتەۋ نىسانىن تۇڭعىش رەت ءساتتى ورىنداپ، حالىقارادا تۇڭعىش رەت وسىمدىك ساباعىنىڭ ۇشىنداعى تەك كلەتكا فۋنكتسياسىن وربيتادا زەرتتەۋدى ورىندادى، بۇل جۇڭگونىڭ عارىش ىستەرىنىڭ جوعارى دەڭگەيدەگى عىلىم ـ تەحنيكادا ءوز كۇشىنە سۇيەنىپ، ءوزىن الۋەتتەندىرۋدە تىڭ قادام تاستاعاندىعىنان دەرەك بەرەدى، ەلىمىزدىڭ جالپىلىق مەملەكەت قۋاتى مەن جۇڭحۋا ۇلتىنىڭ ۇيىسۋ قۋاتىن جوعارىلاتۋدا، بارلىق جۇڭحۋا ۇلاندارىنىڭ ۇلتتىق سەنىمى مەن ماقتانىش سەزىمىن ونان ارى كۇشەيتۋدە، بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن ىنتىماقتاسا العا باسۋعا، ۇدەرە العا تارتۋعا شابىتتاندىرۋدا ماڭىزدى مانگە يە.

شىنجوۋ 18 ـ ءنومىرلى الەم كەمەسىنىڭ عارىشقا ادام الىپ ۇشۋ مىندەتىنىڭ تولىق تابىستى بولۋىنا قالىڭ عىلىم - تەحنيكا قىزمەتكەرلەرىنىڭ، عارىشكەرلەردىڭ، كادرلار مەن جۇمىسشى - قىزمەتكەرلەردىڭ، ازاتتىق ارميا كوماندير - جاۋىنگەرلەرىنىڭ اقىل - پاراساتى مەن جۇرەك قانى سىڭگەن. يە گۋاڭفۋ، لي سۇڭ، لي گۋاڭسۋ جولداستار − سولاردىڭ كورنەكتى ۋاكىلدەرى، ولار پارتياعا ادال بولىپ، وتان ءۇمىتىن اقتاۋدى مۇرات ەتىپ، قايراتتانا العا ۇمتىلىپ، ىنتىماقتاسا سەلبەسىپ، دۇنيە جۇزىنە قۇدىرەتتى جۇڭگو رۋحىن، جۇڭگو كۇشىن ايگىلەدى. يە گۋاڭفۋ جولداس ارادا ەكى جىل وتكەندە عارىشقا شىعىپ، بۇيرىق بەرۋشى بولىپ، ەلىمىزدەگى جالپى ۇشۋ ۋاقىتى ءبىر جىلدان اسقان تۇڭعىش عارىشكەرگە اينالدى. لي سۇڭ جولداس تىڭعىلىقتى جاتتىعىپ، جاپالى شىڭدالىپ، داڭقپەن شىنجوۋ 18 ـ ءنومىرلىنى ۇشىرۋ گرۋپپاسىنا تاڭدالىپ، مىندەتتى تىڭعىلىقتى ورىندادى. لي گۋاڭسۋ جولداس سالماقتى، باتىل بولىپ، اۋىر مىندەتتى ەرلىكپەن ارقالاپ، تۇڭعىش رەت كابينادان شىققاندا تۇڭعىش رەتكى كەڭىستىك بەكەتىندە قوقىستان قورعاۋ قۇرىلعىسىن ورناتۋ مىندەتىن تابىسپەن ورىندادى. ولاردىڭ ەلىمىزدىڭ عارىشقا ادام الىپ ۇشۋ ىستەرى ءۇشىن قوسقان كورنەكتى ەڭبەگىن ماداقتاۋ ءۇشىن، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى يە گۋاڭفۋ جولداسقا ”2 - دارەجەلى عارىش ۇلەسكەرى مەدالىن“بەرۋدى، لي سۇڭ، لي گۋاڭسۋ جولداستارعا ”قاھارمان عارىشكەر“ داڭق اتاعىن بەرۋدى جانە ”3 - دارەجەلى عارىش ۇلەسكەرى مەدالىن“ بەرۋدى ۇيعاردى.

يە گۋاڭفۋ، لي سۇڭ، لي گۋاڭسۋ جولداستار − اۋەلگى ماقساتتى ۇمىتپاي، بورىشتى ەستە بەرىك ساقتاپ، وسكەلەڭ ىستەرگە ءوزىن ارناۋدىڭ ءداۋىر اتويشىلارى، عارىشقا ىزدەنىس جاساۋدىڭ، عارىش كەڭىستىگى ارمانىنا قانات قاعۋدىڭ، عارىش ىستەرىندە قۋاتتى ەل قۇرۋدىڭ ۇلگىلەرى. پارتيا ورتالىق كوميتەتى بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ماداقتالىپ - سيلانعان عارىشكەرلەردى ۇلگى ەتىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ەكى بومبى، ءبىر جاساندى سەرىك“ رۋحىن جانە عارىشقا ادام الىپ ۇشۋ رۋحىن بارىنشا ساۋلەلەندىرىپ، قايراتتانا العا ۇمتىلىپ، دۇرىس جولدان جازباي، جاڭالىق اشىپ، كۇش ۇستىنە كۇش قوسىپ، اۋقىمعا قاراي العا ۇمتىلىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋگە ۇندەيدى!

(شينحۋا اگەنتتىگى، 1 - ايدىڭ 23 – كۇنى، بەيجيڭ)

كەلۋ قاينارى: حالىق تورابى