شي جينپيڭ پاكيستاننىڭ زۇڭتۇڭى زارداريمەن كەڭەس وتكىزدى

2 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پاكيستاننىڭ زۇڭتۇڭى زارداريمەن كەڭەس وتكىزدى. سۋرەتتە: شي جينپيڭ زارداريمەن قول الىسۋدا.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

2 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پاكيستاننىڭ زۇڭتۇڭى زارداريمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا زارداريگە ارناپ قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى لي تاۋ تۇسىرگەن

«حالىق گازەتى»، 2 – ايدىڭ 5 – كۇنى، بەيجيڭ. 2 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پاكيستاننىڭ زۇڭتۇڭى زارداريمەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن پاكيستان مىزعىماس دوستار جانە بارلىق جاعدايدا بىردەي ستراتەگيالىق سەلبەستىك سەرىكتەرى. ۇزاق ۋاقىتتان بەرى بەكەمدەلگەن جۇڭگو مەن پاكيستاننىڭ ءداستۇرلى دوستىعىن ەكى ەلدىڭ اعا بۋىن باسشىلارى ءوز قولىمەن ورناتقان، بۇل − ەكى ەلدىڭ جانە ەكى ەل حالقىنىڭ باعالى بايلىعى. تاياۋ جىلداردان بەرى ەكى جاق ءوزارا ساياسي قولداۋدى بەكەمدەپ، جوعارى جىكتەگىلەردىڭ ءجيى بارىس - كەلىسىن ساقتاپ، جۇڭگو - پاكيستان ەكونوميكالىق ءدالىزى قۇرىلىسى مەن ءار سالاداعى سەلبەستىكتى ىشكەرىلەي ىلگەرىلەتىپ، مەملەكەت پەن مەملەكەت قاتىناسىنىڭ ۇلگىسىن ورناتتى. جۇڭگو جاق پاكيستان جاقپەن وزدەرىنىڭ وسىزاماندانۋ جولىندا قول ۇستاسا العا باسىپ، جاڭا داۋىردەگى اناعۇرلىم تىعىز جۇڭگو - پاكيستان تاعدىرلاس ورتاق تۇلعاسىن جەدەل قۇرىپ، ەكى ەل حالقىن اناعۇرلىم ويداعىداي باقىتقا كەنەلتىپ، ءوڭىردىڭ بەيبىتشىلىگىنە، ورنىقتىلىعىنا، گۇلدەنۋىنە اناعۇرلىم زور ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: جۇڭگو جاق جۇڭگو – پاكيستان قارىم - قاتىناسىنا باستان - اياق ستراتەگيالىق تۇرعىدان مامىلە جاسايدى، پاكيستانعا قاراتىلعان دوستىق ساياساتتا وسكەلەڭ ورنىقتىلىق پەن ۇلاسپالىلىقتى ساقتاپ، باستان - اياق پاكيستانداعى جالپى حالىقتىڭ مۇددەسىن كوزدە ۇستايدى. جۇڭگو جاق پاكيستاننىڭ يەلىك ۇقىعىن، تاۋەلسىزدىگىن جانە تەرريتوريا تۇتاستىعىن قورعاۋىن، لاڭكەستىككە سوققى بەرۋىن، ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن بۇرىنعىداي باتىل قولدايدى. ەكى جاق دامۋ ستراتەگياسىن ۇشتاستىرۋدى جانە ەل باسقارۋ تاجىريبەلەرىن اۋىستىرۋدى تەرەڭدەتىپ، ءار دارەجەلىلەردىڭ، ءارقايسى تاراۋدىڭ بارىس - كەلىسىن كۇشەيتىپ، جۇڭگو - پاكيستان قارىم - قاتىناسىنىڭ ساياسي نەگىزىن ۇزدىكسىز بەكەمدەۋى كەرەك. پاكيستاننىڭ جۇڭگونىڭ رەفورمانى اناعۇرلىم جاپپاي تەرەڭدەتۋىنەن، جوعارى دەڭگەيدەگى سىرتقا ەسىك اشۋدى كەڭەيتۋىنەن الدىمەن يگىلىكتەنۋىن قارسى الامىز، جۇڭگو جاق پاكيستان جاقپەن ءار سالاداعى ناقتى سەلبەستىكتى تەرەڭدەتىپ، جۇڭگو - پاكيستان ەكونوميكالىق ءدالىزى سەلبەستىگىنىڭ ”دارەجەسى جوعارىلاعان نۇسقاسىن“ بىرگە جاساپ، پاكيستاننىڭ دامۋ نەگىزىن بەكەمدەۋىنە، دامۋ كومەسكى كۇشىن اشۋىنا كومەكتەسۋدى قالايدى. پاكيستان جاقتىڭ پاكيستانداعى جۇڭگو ادامدارىنىڭ، نىساندارىنىڭ جانە قۇرىلىمدارىنىڭ حاۋىپسىزدىگىن قورعاۋدى كۇشەيتىپ، لاڭكەستىككە قارسى تۇرۋدىڭ ەكى جاقتى، كوپ جاقتى سەلبەستىگىن كۇشەيتۋىن ءۇمىت ەتەمىن. كەلەر جىل − جۇڭگو مەن پاكيستاننىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى، ەكى جاق مادەنيەت، وقۋ - اعارتۋ، اقپارات قۇرالدارى سياقتى سالالارداعى اۋىس - كۇيىستى، سەلبەستىكتى تەرەڭدەتىپ، جۇڭگو - پاكيستان دوستىعىن ۇرپاقتان - ۇرپاققا جالعاۋى كەرەك. جۇڭگو جاق پاكيستان جاقتىڭ ءۇش ۇلكەن دۇنيە جۇزىلىك باستامانى بەلسەنە قولداعاندىعىن ءارى قاتىستى سەلبەستىككە ات سالىسقاندىعىن القايدى، پاكيستان جاقپەن بىرگە بەيبىت قاتار تۇرۋدىڭ بەس پرينسيبىنە تاباندى بولىپ، سىڭار جاقتىلىق پەن زورەكەرلىك ارەكەتتەردى تەجەپ، كوپ جاقتى سەلبەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

زارداري مىنالاردى ءبىلدىردى: پاكيستان مەن جۇڭگو − تاتۋ كورشىلەر، ونان دا ماڭىزدىسى، بارلىق جاعدايدا بىردەي جاقسى دوس، سەنىمدى سەرىكتەر. پاكيستان مەن جۇڭگونىڭ دوستىعى بوران - شاشىندى باستان كەشىرسە دە، ەكى ەل حالقىنىڭ جۇرەگى باستان - اياق تىعىز توعىستى. جاعداي قالاي وزگەرسە دە، پاكيستان تيتتەي دە اۋىتقىماستان جۇڭگومەن بىرگە بولادى. پاكيستان جاق جۇڭگو جاقتىڭ پاكيستاننىڭ ەكونوميكالىق، قوعامدىق دامۋىنا قالتقىسىز كومەك كورسەتكەندىگىنە العىس ايتادى، جۇڭگونىڭ تابىستى تاجىريبەلەرىن ۇيرەنىپ، جۇڭگو - پاكيستان ەكونوميكالىق ءدالىزى مەن ءار سالاداعى سەلبەستىگىنىڭ جوعارى ساپالى دامۋىن ىلگەرىلەتىپ، پاكيستاننىڭ ونەركاسىپتەنۋى مەن وسىزاماندانۋىن جۇزەگە اسىرۋىنا دەم بەرۋدى قالايدى. ءتوراعا شي جينپيڭنىڭ كورەگەندىكپەن باستاۋىندا جۇڭگو حالىقارالىق ىستەردە بارعان سايىن زور جەتەكشىلىك رول اتقارىپ، دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن قورعايتىن ماڭىزدى كۇشكە اينالدى. پاكيستان جاق جۇڭگو جاقپەن تىعىز سايكەسىپ، كوپ جاقتىلىققا تاباندى بولىپ، ەركىن ساۋدانى قورعاپ، ەكى ەلدىڭ جانە قالىڭ وركەندەپ كەلە جاتقان ەلدەردىڭ ورتاق مۇددەسىن جەبەۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى جۇڭگو - پاكيستان ەكونوميكالىق ءدالىزى، ساۋدا، عىلىم - تەحنيكا، راديو - تەلەۆيزيا سياقتى سالالارداعى كوپ ءتۇرلى ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

كەڭەستەن بۇرىن شي جينپيڭ حالىق سارايىنىڭ سولتۇستىك زالىندا زارداريدى قارسى الۋ سالتىن وتكىزدى.

تيان - انمىن الاڭىندا 21 رەت ساليۋت اتىلىپ، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن پاكيستاننىڭ مەملەكەت اندەرىن ورىندادى. زارداري شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى كەشتە شي جينپيڭ حالىق سارايىنىڭ التىن ءتۇستى زالىندا زارداريعا ارناپ قارسى الۋ قوناعاسىن وتكىزدى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى