لي چياڭ برازيليانىڭ زۇڭتۇڭى لۋلامەن كەزدەستى

سول جەر ۋاقىتى 7 - ايدىڭ 5 - كۇنى مەملەكەتتىك كەڭەستىڭ زۇڭليى لي چياڭ ريو ـ دە ـ جانەيرودا برازيليانىڭ زۇڭتۇڭى لۋلامەن كەزدەستى.

سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

»حالىق گازەتى«، 7 - ايدىڭ 5 - كۇنى، ريو ـ دە ـ جانەيرو (تىلشىلەر چىن ي - ميڭ، چىن شاڭۋىن). سول جەر ۋاقىتى 7 - ايدىڭ 5 - كۇنى مەملەكەتتىك كەڭەستىڭ زۇڭليى لي چياڭ ريو ـ دە ـ جانەيرودا برازيليانىڭ زۇڭتۇڭى لۋلامەن كەزدەستى.

لي چياڭ الدىمەن ءتوراعا شي جينپيڭنىڭ لۋلا زۇڭتۇڭعا جولداعان ىقىلاستى سالەمىن جەتكىزدى. لي چياڭ مىنالاردى ءبىلدىردى: قازىر جۇڭگو ـ برازيليا قارىم - قاتىناسى تاريحتاعى ەڭ جاقسى مەزگىلدە تۇر، ەكى جاق اناعۇرلىم ءادىل دۇنيە ءجۇزى مەن اناعۇرلىم باياندى پلانەتاداعى جۇڭگو ـ برازيليا تاعدىرلاس ورتاق تۇلعاسىن قول ۇستاسا قۇرۋدا. بيىل 5 ـ ايدا لۋلا زۇڭتۇڭ جۇڭگودا ساپاردا بولعان كەزدە، ەكى ەلدىڭ مەملەكەت باسشىلارى جۇڭگو ـ برازيليا تاعدىرلاس ورتاق تۇلعاسى قۇرىلىسىن ىشكەرىلەي ىلگەرىلەتۋ، كوپ جاقتىلىقتى بىرگە قورعاۋ سياقتىلار جونىندە ماڭىزدى ورتاق تانىمعا كەلدى. جۇڭگو جاق برازيليا جاقپەن بىرگە ۇزدىكسىز قۇلشىنىپ، ەكى جاقتى قارىم - قاتىناستىڭ مازمۇنىن ۇزدىكسىز بايىتىپ، اناعۇرلىم كوپ ءىس جۇزىندىك سەلبەستىك جەتىستىكتەرىنە قول جەتكىزىپ، ەكى ەل حالقىنا ءتىپتى دە زور باقىت جاراتۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق برازيليا جاقپەن ءبىرىن ـ ءبىرى تولىقتاۋ باسىمدىعىن ساۋلەلەندىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ جۇلگەسىندە ەكى جاقتى ساۋدا، فينانس، نەگىزدىك قۇرىلعى قۇرىلىسى سياقتى سەلبەستىكتەردى بەكەمدەپ جانە تەرەڭدەتىپ، سيفرلى ەكونوميكا، جاسىل ەكونوميكا، عىلىم ـ تەحنيكادا جاڭالىق اشۋ، عارىش سياقتى سالالارداعى سەلبەستىكتى كەڭەيتىپ، ەكى ەلدىڭ دامۋ قوزعاۋشى قۋاتىن كۇشەيتۋدى قالايدى. 2026 ـ جىلعى ”جۇڭگو ـ برازيليا مادەنيەت جىلى“ جەلىلەس قيمىلدارىن بىرگە ويداعىداي وتكىزىپ، وقۋ - اعارتۋ، جاستار، ەمدەۋ، دەنساۋلىق ساقتاۋ سياقتى جاقتارداعى سەلبەستىكتى كۇشەيتىپ، ادامداردىڭ بارىس - كەلىسىنە اناعۇرلىم قولايلىلىق جاساپ، جۇڭگو مەن برازيليانىڭ دوستىق سەلبەستىگىنىڭ حالىق رايى نەگىزىن بەكەمدەۋ كەرەك. جۇڭگو مەن برازيليا ەكەۋى دە كوپ جاقتىلىقتىڭ، ەركىن ساۋدانىڭ قورعاۋشىلارى، جۇڭگو جاق برازيليا جاقپەن بىرلەسكەن مەملەكەتتەر ۇيىمى، بريكس ەلدەرى، 20 ەل توبى سياقتى كوپ جاقتى مەحانيزمدەگى تىلدەسۋدى، سايكەسۋدى كۇشەيتىپ، قالىڭ وركەندەپ كەلە جاتقان ەلدەردى ىنتىماقتاستىرىپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋى مەن جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، دۇنيە جۇزىنە اناعۇرلىم كوپ ورنىقتىلىق، تۇراقتىلىق ۇستەۋدى قالايدى. جۇڭگو جاق برازيليانىڭ بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى بەللەن جينالىسىن ويداعىداي وتكىزۋىن قولدايدى.

لۋلا لي چياڭعا ءتوراعا شي جينپيڭگە ىقىلاستى سالەمىن جەتكىزۋدى تاپسىردى. لۋلا مىنالاردى ءبىلدىردى: برازيليا مەن جۇڭگو حالقىنىڭ دوستىعى تەرەڭ. برازيليا جاق جۇڭگومەن قارىم - قاتىناسىن دامىتۋعا باسا ءمان بەرەدى، جۇڭگو جاقپەن قول ۇستاسا وتىرىپ ەكى ەل مەملەكەت باسشىلارى كەلىسكەن ماڭىزدى ورتاق تانىمدى تياناقتاندىرىپ، جوعارى جىكتەگىلەردىڭ بارىس ـ كەلىسىن ونان ارى جيىلەتىپ، ەكونوميكا ـ ساۋدا، عىلىم ـ تەحنيكا، فينانس، عارىش سياقتى سالالارداعى اۋىس ـ كۇيىس پەن سەلبەستىكتى جەبەپ، كليمات وزگەرىسىنە توتەپ بەرۋ سياقتى سەلبەستىكتەردى كۇشەيتۋدى قالايدى. جۇڭگو جاقتىڭ بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى بەللەن جينالىسىنا قاتىناسۋىن قارسى الامىز. برازيليا جاق جۇڭگو جاقتىڭ بيىل جۇڭگو ـ لاتىن امەريكاسى تالقى مىنبەرىنىڭ 4 - كەزەكتى مينيستر دارەجەلىلەر ءماجىلىسىن ءساتتى وتكىزگەندىگىن قۇتتىقتايدى، جۇڭگو جاقپەن كوپ جاقتى قارىم - قاتىناستى، سەلبەستىكتى تەرەڭدەتىپ، سىڭار جاقتىلىقتى بىرگە تەجەپ، كوپ جاقتىلىق پەن ەركىن ساۋدانى قورعاپ، دۇنيە ءجۇزىنىڭ بەيبىت دامۋىن جەبەۋدى قالايدى.

كەزدەسۋدەن كەيىن ەكى جاق قازىنا، فينانس، جاساندى زەردە، دامۋ ستراتەگياسىن ۇشتاستىرۋ، عارىش سياقتى سالالارداعى سەلبەستىك قۇجاتتارىنا قول قويۋعا بىرگە كۋا بولدى.

لي چياڭ سول جەر ۋاقىتى 7 - ايدىڭ 5 - كۇنى تۇستەن كەيىن جالعا العان ۇشاقپەن ريو ـ دە ـ جانەيروعا باردى. بارعان كەزدە برازيليا ۇكىمەتىنىڭ ۋاكىلدەرى مەن جۇڭگونىڭ برازيليادا تۇراتىن باس ەلشىسى جۋ چيڭچياۋ قاتارلىلار اۋەجايعا بارىپ قارسى الدى.

كەلۋ قاينارى: حالىق تورابى