وسى ايدان باستاپ، ەڭبەكاقىڭىزعا تاعى اقشا قوسىلادى 

ەڭبەكاقى كارتۋچكاڭىزعا وسى ايدان باستاپ تاعى اقشا قوسىلادى، اتاپ ايتقاندا، جوعارى تەمپەراتۋراعا بايلانىستى بەرىلەتىن قوسىمشا قاراجات تاراتىلادى. «ىستىقتان ساقتانىپ، تەمپەراتۋرانى تومەندەتۋگە قاتىستى شارالاردى باسقارۋ جونىندەگى ەرەجەنىڭ» 17 – تارماعىنداعى بەلگىلەمەلەرگە ساي، جوعارى تەمپەراتۋرالى ورىندا جۇمىس ىستەيتىن ەڭبەكشىلەردىڭ زاڭ بويىنشا جۇمىس ورنىنا بايلانىستى قوسىمشا قاراجاتتان يگىلىكتەنۋىنە بولادى.

ادام ىستەتۋشى ورىن ەڭبەكشىنى 35 گرادۋستان جوعارى ىستىق تەمپەراتۋرادا دالاداعى اشىق ورىندا جۇمىس ىستەۋگە ورنالاستىراتىن بولسا ءارى ءونىمدى شارالاردى قولدانىپ، جۇمىس ورنىنىڭ تەمپەراتۋراسىن 33 گرادۋستان تومەن دەڭگەيگە تۇسىرۋىنە مۇمكىندىك بولماسا، ەڭبەكشىگە جوعارى تەمپەراتۋراعا قاتىستى قوسىمشا قاراجات بەرۋى ءارى ونى ەڭبەكاقىنىڭ جالپى سوماسىنا قوسۋى قاجەت.

اتاپ ايتقاندا، جوعارى تەمپەراتۋرادا دالادا جۇمىس ىستەۋشىلەر جوعارى تەمپەراتۋراعا بايلانىستى بەرىلەتىن قوسىمشا قاراجاتتان يگىلىكتەنىپ قانا قويماي، ادام ىستەتۋشى ورىن جۇمىسكەرلەردىڭ جۇمىس ىستەگەن ورنىنىڭ تەمپەراتۋراسىن ءونىمدى شارالار ارقىلى 33 گرادۋستان تومەن تۇسىرە المايتىن جاعدايدا، دالادا ىستەمەيتىن جۇمىسكەرلەر دە جوعارى تەمپەراتۋراعا بايلانىستى بەرىلەتىن قوسىمشا قاراجاتتان يگىلىكتەنەدى.

قازىر 31 ولكەدە جوعارى تەمپەراتۋراعا بايلانىستى بەرىلەتىن قوسىمشا قاراجاتتىڭ ولشەمى 100 يۋاننان 300 يۋان ارالىعىنا شوعىرلانعان.

جوعارى تەمپەراتۋراعا بايلانىستى بەرىلەتىن قوسىمشا قاراجات ىستىقتان ساقتانىپ، تەمپەراتۋرانى تومەندەتۋ قاراجاتىمەن ۇقسامايدى

جوعارى تەمپەراتۋراعا بايلانىستى بەرىلەتىن قوسىمشا قاراجاتتى ەڭبەكشى تۇرعان ورىن مىندەتىنە الىپ، ەڭبەكاقىنىڭ جالپى سوماسىنا قوسادى، ەڭ تومەنگى ەڭبەكاقى ولشەمى مەن قالىپتى قىزمەت ۋاقىتىنداعى ەڭبەكاقىعا قوسىپ ەسەپتەمەيدى.

جوعارى تەمپەراتۋراعا بايلانىستى بەرىلەتىن قوسىمشا قاراجات زاڭدا بەلگىلەنگەن ۆاليۋتا فورماسىندا ەڭبەكشىلەرگە تاراتىلادى، سالقىنداتقىش سۋسىندار، ىستىقتان ساقتانىپ، تەمپەراتۋرانى تومەندەتۋ بۇيىمدارى قاتارلى ناقتى زاتتار مەن ءتۇرلى باعالى قاعازدار ارقىلى الماستىرۋعا بولمايدى.

كەلۋ قاينارى: حالىق تورابى