لي چياڭ بريكس ەلدەرى باسشىلارى 17 - ديدارلاسۋىنىڭ 1 - كەزەڭدىك ماجىلىسىنە قاتىناستى ءارى ءسوز سويلەدى

سول جەر ۋاقىتى 7 - ايدىڭ 6 - كۇنى مەملەكەتتىك كەڭەستىڭ زۇڭليى لي چياڭ ريو - دە - جانەيرودا بريكس ەلدەرى باسشىلارى 17 - ديدارلاسۋىنىڭ 1 - كەزەڭدىك ماجىلىسىنە قاتىناسىپ، ”بەيبىتشىلىك جانە حاۋىپسىزدىك، عالامدىق جونگە سالۋ رەفورماسى“ كەڭەستىك تاقىرىبى جونىندە ءسوز سويلەدى. سۋرەتتە: ماجىلىسكە قاتىناسقان باسشىلار توپتىق سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 7 - ايدىڭ 6 - كۇنى، ريو - دە - جانەيرو (تىلشىلەر چىن شاڭۋىن، چىن ي - ميڭ). سول جەر ۋاقىتى 7 - ايدىڭ 6 - كۇنى مەملەكەتتىك كەڭەستىڭ زۇڭليى لي چياڭ ريو - دە - جانەيرودا بريكس ەلدەرى باسشىلارى 17 - ديدارلاسۋىنىڭ 1 - كەزەڭدىك ماجىلىسىنە قاتىناسىپ، ”بەيبىتشىلىك جانە حاۋىپسىزدىك، عالامدىق جونگە سالۋ رەفورماسى“ كەڭەستىك تاقىرىبى جونىندە ءسوز سويلەدى. بريكس ەلدەرىنىڭ باسشىلارى ماجىلىسكە قاتىناستى. برازيليانىڭ زۇڭتۇڭى لۋلا ءماجىلىستى باسقاردى.

لي چياڭ مىنالاردى ءبىلدىردى: قازىر دۇنيە ءجۇزىنىڭ 100 جىلدىق وزگەرىس جاعدايى جەدەل قۇبىلىپ، حالىقارالىق ەرەجە مەن ءتارتىپ اۋىر سوققىعا ۇشىراپ، كوپ جاقتى مەحانيزمنىڭ بەدەلى مەن ونىمدىلىگى السىرەدى. ءتوراعا شي جينپيڭ العا قويعان بىرگە اقىلداسۋ، بىرگە قۇرۋ، بىرگە يگىلىكتەنۋ سىندى دۇنيە جۇزىلىك جونگە سالۋ كوزقاراسى ءوزىنىڭ داۋىرلىك قۇنى مەن رەال ءمانىن اناعۇرلىم ايگىلەدى. اسقىنعان قايشىلىقتار مەن الاۋىزدىقتار الدىندا ءبىز تەڭ تۇرعىدا قۇرمەت ەتۋ پوزيتسياسىمەن اناعۇرلىم ويداعىداي اقىلداسۋىمىز كەرەك. تەرەڭ توعىسقان ورتاق مۇددە الدىندا ءبىز ىنتىماقتاسا سەلبەسۋ ارەكەتى ارقىلى اناعۇرلىم ويداعىداي بىرگە قۇرۋىمىز كەرەك. سەلبەستىك جاساۋ، ءوزارا تيىمدىلىك جاساۋ سىندى دامۋ ورايى الدىندا ءبىز ءوزارا تابىسقا جەتۋ كەڭ پەيىلىمەن اناعۇرلىم ويداعىداي ورتاق يگىلىكتەنۋىمىز كەرەك.

لي چياڭ بىلاي دەپ باسا دارىپتەدى: بريكس ەلدەرى دۇنيە ءجۇزىنىڭ وڭتۇستىگىندەگى ”ءبىرىنشى شەپ“ رەتىندە، دەربەس، ءوز - وزىنە قوجايىن بولۋعا تاباندى بولىپ، جاۋاپكەرشىلىك ارقالاۋدى ايگىلەپ، ورتاق تانىمدى ۇيىستىرۋ، بىرىككەن كۇش توپتاۋ جاعىندا اناعۇرلىم زور ىسكەرلىك كورسەتىپ، دۇنيە ءجۇزىن جونگە سالۋ وزگەرىسىن ىلگەرىلەتۋدىڭ وزىق كۇشىنە اينالۋعا قۇلشىنۋى كەرەك. ادامگەرشىلىككە تاباندى بولىپ، دۇنيە ءجۇزىنىڭ بەيبىتشىلىگىن، تىنىشتىعىن قورعاۋ كەرەك. تالاس - تارتىستى بەيبىت تاسىلمەن شەشۋدى ىلگەرىلەتىپ، ءىستىڭ ءوزىنىڭ دۇرىس - بۇرىستىعىنا قاراي تۇبىرىنەن وڭاۋ شارالارىن قاراستىرۋ كەرەك. نازاردى دامۋعا شوعىرلاندىرىپ، ەكونوميكالىق ارتۋدىڭ قوزعاۋشى قۋاتىن زورايتۋ كەرەك. دامۋ سەلبەستىگىنە بەلسەنە جەتەكشىلىك ەتىپ، جاڭادان گۇلدەنگەن سالالارداعى ارتۋ كومەسكى كۇشىن اشۋ كەرەك. بيىل جۇڭگو جاق جۇڭگو - بريكس ەلدەرىنىڭ جاڭاشا وندىرگىش كۇشتەردى زەرتتەۋ ورتالىعىن قۇرادى، سونداي - اق بريكس ەلدەرىنىڭ جاڭا ونەركاسىپ ”التىن قۇتانى“ ۇزدىك وقۋ سيلىق اقشاسىن بەلگىلەپ، بريكس ەلدەرىنىڭ ونەركاسىپ، حابارلاسۋ سياقتى سالالارداعى دارىندىلاردى جەتىلدىرۋىنە كومەكتەسەدى. سيىسىمدى بولىپ، وركەنيەتتەردىڭ اۋىس - كۇيىسىن، ءوزارا ۇلگى الۋىن جەبەۋ كەرەك. وركەنيەت پەن جاراسىمدى قاتار ءومىر ءسۇرۋدى دارىپتەۋشى بولىپ، تۇرلىشە وركەنيەتتىڭ ءبىرىن - ءبىرى نۇرلاندىرۋىن، ءبىرىن - ءبىرى جەبەۋىن، بىرگە العا باسۋىن قۇلشىنا جۇزەگە اسىرۋ كەرەك. جۇڭگو جاق بريكس ەلدەرىمەن بىرگە قۇلشىنىپ، دۇنيە جۇزىلىك جونگە سالۋدىڭ اناعۇرلىم ءادىل، ۇيلەسىمدى، جوعارى ءونىمدى، ءتارتىپتى باعىتقا قاراي دامۋىن ىلگەرىلەتىپ، اناعۇرلىم كوركەم دۇنيە ءجۇزىن قول ۇستاسا قۇرۋدى قالايدى.

ماجىلىسكە قاتىناسقان ەلدەردىڭ باسشىلارى مىنالاردى ءبىلدىردى: بريكس ەلدەرىنىڭ سەلبەستىك مەحانيزمى ۇزدىكسىز دامىپ، زورايىپ، ۋاكىلدىك سيپاتى ونان ارى كۇشەيىپ، حالىقارالىق ىقپالى كۇن سايىن جوعارىلاپ، دۇنيە جۇزىندەگى وڭتۇستىك ەلدەردىڭ وزىندىك دامۋ ۇقىعىن قورعاۋىنا، حالىقارالىق ادىلدىك پەن ادىلەتتىلىكتى قورعاۋىنا، دۇنيە جۇزىلىك جونگە سالۋ جۇيەسى رەفورماسىنا ات سالىسۋىنا ماڭىزدى تۇعىر ازىرلەدى. بۇگىنگى دۇنيە ءجۇزى اناعۇرلىم اۋمالى - توكپەلى بولىپ، سىڭار جاقتىلىق، قورعانىمپازدىق باس كوتەردى، بريكس ەلدەرى ىنتىماقتى، سەلبەستىكتى كۇشەيتىپ، بىرلەسكەن مەملەكەتتەر ۇيىمى ەرەجەسىنىڭ ماقساتى مەن پرينسيبىن قورعاپ، كوپ جاقتىلىقتى قورعاپ جانە امالياتتا ايگىلەپ، بىرگە دامۋدى ىلگەرىلەتۋگە، دۇنيە جۇزىلىك جونگە سالۋدى كەمەلدەندىرۋگە، دۇنيە ءجۇزىنىڭ باياندى بەيبىتشىلىگى مەن گۇلدەنۋىن جەبەۋگە اناعۇرلىم زور ۇلەس قوسۋى كەرەك.

ءماجىلىس «بريكس ەلدەرى باسشىلارىنىڭ 17 - رەتكى ديدارلاسۋى ريو - دە - جانەيرو جارناماسىن» ماقۇلدادى.

كەلۋ قاينارى: حالىق تورابى