جۇقپالى تۇماۋعا شالدىققاننان كەيىن تاعى ۆاكسينا سالدىرۋدىڭ قاجەتى بار ما؟ قانداي ادامدار ۆاكسينا ەكتىرۋدى الدىمەن ويلاستىرۋى كەرەك؟ 

مەملەكەتتىك دەنساۋلىق ساقتاۋ – سالاماتتىق كوميتەتى 10 – ايدىڭ 9 – كۇنى اقپار جاريالاۋ ءماجىلىسىن اشىپ، مەزگىل مەن امالعا جانە دەنساۋلىققا قاتىستى جاعدايلاردى تانىستىردى. جىجياڭ ولكەلىك اۋرۋدىڭ الدىن الۋ جانە ونى تىزگىندەۋ ورتالىعىنىڭ زەرتتەرمەنى جياڭ جيانميننىڭ تانىستىرۋىنشا، قاىر جۇقپالى تۇماۋدان ساقتانۋدىڭ ەڭ ۇتىمدى دا ءونىمدى تەحنيكالىق ءتاسىلى ۆاكسينا ەكتىرۋ بولىپ سانالادى.

نەلىكتەن ءار جىلى جۇقپالى تۇماۋدىڭ ۆاكسيناسىن ەكتىرۋ قاجەت؟

ءار جىلى جۇقپالى تۇماۋدىڭ ۆاكسيناسىن ەكتىرۋدىڭ سەبەبى، باستىسى، مىناداي ەكى ءتۇرلى:

جۇقپالى تۇماۋ ۆيرۋسى وڭاي وزگەرەدى، ءار جىلى تارالاتىن ۆيرۋس تۇبىرشىگى ۇقساس بولماۋى مۇمكىن. ەلىمىز بۇكىل ەل بويىنشا باقىلاۋ ساندى مالىمەتىنە نەگىزدەلىپ، دۇنيە جۇزىلىك دەنساۋلىق ساقتاۋ ۇيىمى ءار جىلى جاريالايتىن جۇقپالى تۇماۋ ۆاكسيناسىنىڭ تۇبىرشىگى جونىندەگى پىكىردى ويلاستىرا وتىرىپ، سول ماۋسىمداعى جۇقپالى تۇماۋ ۆاكسيناسىنىڭ قۇرامىن رەتتەپ، ۆاكسينانىڭ سول جىلى تارالعان ۆيرۋس تۇبىرشىگىنىڭ انتيگەنىنە سايكەس كەلۋىنە كۇش سالادى.

جۇقپالى تۇماۋ ۆاكسيناسىن ەكتىرگەن سوڭ، دەنەدە قالىپتاسقان انتيدەنە ورەسى ۋاقىتتىڭ وتۋىنە بايلانىستى بىرتىندەپ تومەندەيدى، سوندىقتان، ءار جىلى ەكتىرگەندە عانا، اناعۇرلىم ويداعىداي قورعاۋ ونىمدىلىگىنە قول جەتكىزۋگە بولادى.

قانداي ادامدار ۆاكسينا ەكتىرۋدى ەڭ الدىمەن ويلاستىرۋى كەرەك؟

جاسى 6 ايدان اسقان ءارى تيىم سالۋ كۋالىگى جوق ادامداردىڭ بارلىعى جىل سايىن جۇقپالى تۇماۋ ۆاكسيناسىن ەكتىرگەنى ءجون، مىناداي ادامدارعا ۆاكسينا ەكتىرۋدى الدىمەن ورنالاستىرۋ قاجەت:

بىرىنشىدەن، ءتۇيىندى توپتاعى ادامدار، باستىسى، 60 جاستاعى جانە ودان جوعارى جاستاعى قارتتار، سوزىلمالى ناۋقاسقا شالدىققاندار قاتارلىلار، ولاردىڭ يممۋنيتەت قىزمەتى ءبىرشاما ءالسىز بولاتىندىقتان، جۇقپالى تۇماۋ ۆيرۋسىمەن جۇعىمدالعان جاعدايدا وكپە قابىنۋى، جۇرەك بۇلشىق ەتىنىڭ قابىنۋى قاتارلى اۋىر قوسالقى اۋرۋلاردى وڭاي تۋىنداتادى نەمەسە ءاسىلى بار نەگىزدىك اۋرۋلارىن اسقىندىرادى.

مۇنان سىرت، جاسى 6 ايدان اسقان نارەستەلەر مەن بالالار، نارەستەلەردىڭ يممۋنيتەت جۇيەسى ءالى تولىق جەتىلىپ بولماعاندىقتان، جۇقپالى تۇماۋ ۆيرۋسىمەن جۇعىمدالعان جاعدايدا قاتتى قىزىپ ەسىنەن تانۋ، وكپە قابىنۋى، ميدىڭ قابىنۋى قاتارلى اۋىر ناۋقاستانۋ حاۋپى تۋىلادى، ونىڭ ۇستىنە، بالالار باقشاسى مەن ءسابيحانادا نەمەسە مەكتەپتە ىندەتتىڭ شوعىرلى تارالۋىن تۋىنداتۋى مۇمكىن.

تاعى ءبىر توپتاعى ۆاكسينا ەكتىرۋدى الدىمەن ويلاستىرۋعا ءتيىستى ادامدار — ءتۇيىندى قۇرىلىمدار مەن ورىندارداعى قىزمەتكەرلەر، مۇندا ەمدەۋ قۇرىلىمدارى، زەينەتكەرلىك قۇرىلىمدارى، كۇتىمدەۋ قۇرىلىمدارى، قامقورلىق ءۇيى قاتارلى ورىنداردىڭ قىزمەتكەرلەرى، سونداي – اق، جاسى 6 ايدان اسپاعان سابيلەر بار وتباسىلاردىڭ مۇشەلەرى قامتىلادى.

مۇنداي ادامدار ۆاكسينا ەكتىرۋ ارقىلى ءوزىنىڭ جۇعىمدالۋىنان ساقتانىپ قانا قويماي، توڭىرەگىندەگى جۇعىمدالعان جاعدايدا سالماقتى ناۋقاسقا وڭاي شالدىعاتىن ادامداردى دا قورعايدى، سوندىقتان، ولارعا ۆاكسينا ەگۋدى الدىمەن ويلاستىرعان ءجون.

نەلىكتەن جۇقپالى تۇماۋعا شالدىققان سوڭ تاعى دا ۆاكسينا ەكتىرۋ قاجەت؟

جۇقپالى تۇماۋعا شالدىققان سوڭ تاعى دا ۆاكسينا ەكتىرۋدىڭ سەبەبى، باستىسى، مىناداي ەكى ءتۇرلى:

بىرىنشىدەن، جۇقپالى تۇماۋ ۆيرۋسىنىڭ كوپ ءتۇرلى تيپى بار، ءبىر رەت جۇقپالى تۇماۋعا شالدىققان سوڭ انتيدەنە قالىپتاسقانىمەن، ول تەك وسى تۇردەگى جۇقپالى تۇماۋ تيپىنە عانا جارامدى.

ەندى ءبىر جاعىنان، جۇعىمدالعان سوڭ قالىپتاسقان انتيدەنەنىڭ قورعاۋ رولى دا ۇزاققا بارمايدى، ۆاكسينانى ەكتىرۋ ارقىلى انتيدەنەنىڭ قورعاۋ ورەسىن ونان ارى كۇشەيتۋگە، جوعارىلاتۋعا بولادى.

قازىر ىزعار شىق امالى جەتىپ كەلدى، اۋا تەمپەراتۋراسى كورنەكتى تومەندەدى، جۇقپالى تۇماۋ ءجيى تۋىلاتىن ماۋسىم كەلىپ قالدى، كوپشىلىكتىڭ جۇقپالى تۇماۋ ۆاكسيناسىن ەرتەرەك ەكتىرگەنى ءجون. (باس ستانسيا ورتالىق تەلەۆيزيا ءتىلشىسى ياڭ ياڭ، شى يىڭچۇن)

كەلۋ قاينارى: حالىق تورابى