شي جينپيڭ چاۋشيان ەڭبەك پارتياسى قۇرىلعاندىعىنىڭ 80 جىلدىعى بايلانىسىمەن چاۋشيان ەڭبەك پارتياسىنىڭ باس شۋجيى جين جىڭىنعا قۇتتىقتاۋ تەلەگرامماسىن جولدادى

شينحۋا اگەنتتىگى، 10 - ايدىڭ 10 - كۇنى، بەيجيڭ. 10 - ايدىڭ 10 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ چاۋشيان ەڭبەك پارتياسىنىڭ باس شۋجيى جين جىڭىنعا تەلەگرامما جولداپ، چاۋشيان ەڭبەك پارتياسى قۇرىلعاندىعىنىڭ 80 جىلدىعىن قۇتتىقتادى.

شي جينپيڭ قۇتتىقتاۋ تەلەگرامماسىندا بىلاي دەدى: چاۋشيان ەڭبەك پارتياسى قۇرىلعاندىعىنىڭ 80 جىلدىعى قارساڭىندا، مەن جۇڭگو كوممۋنيستىك پارتياسى ورتالىق كوميتەتى اتىنان ءارى ءوز اتىمنان باس شۋجي جولداستى جانە چاۋشيان ەڭبەك پارتياسى ورتالىق كوميتەتىن، چاۋشيان ەڭبەك پارتياسىنىڭ بارلىق مۇشەسىن، سونداي - اق چاۋشيان حالقىن قىزۋ قۇتتىقتايمىن جانە ىزگى تىلەك بىلدىرەمىن.

شي جينپيڭ مىنالاردى ءبىلدىردى: 80 جىلدان بەرى چاۋشيان ەڭبەك پارتياسى چاۋشيان حالقىن ىنتىماقتاستىرىپ جانە باستاپ، قايراتتانا العا ۇمتىلىپ، قامال الىپ، قيىنشىلىقتاردى جەڭىپ، چاۋشياننىڭ سوتسياليزم ىستەرىندە قۋانارلىق تابىسقا قول جەتكىزۋىن ىلگەرىلەتتى. تاياۋ جىلداردان بەرى باس شۋجي جولداس چاۋشيان پارتياسى مەن حالقىنا باسشىلىق ەتىپ، پارتيا قۇرىلىسىن كۇشەيتۋگە، ەكونوميكانى دامىتۋعا، حالىق تۇرمىسىن جاقسارتۋعا بەلسەنە كۇش سالدى. باس شۋجي جولداس باستاعان چاۋشيان ەڭبەك پارتياسىنىڭ پارمەندى باسشىلىعىندا، چاۋشياننىڭ سوتسياليزم ىستەرىندە ۇزدىكسىز تىڭ تابىستارعا قول جەتكىزىپ، چاۋشيان ەڭبەك پارتياسىنىڭ 9 قۇرىلتايىنىڭ جەڭىسپەن اشىلۋىن قارسى الۋىن تىلەيمىن.

شي جينپيڭ بىلاي دەپ باسا دارىپتەدى: جۇڭگو مەن چاۋشيان ەكەۋى دە − كوممۋنيستىك پارتيا باسشىلىعىنداعى سوتسياليستىك مەملەكەت. تاياۋ جىلداردان بەرى مەن باس شۋجي جولداسپەن تالاي رەت كەزدەسىپ، ەكى پارتيانىڭ، ەكى ەلدىڭ قارىم قاتىناسىنىڭ دامۋىنا باعدار نۇسقاپ، جۇڭگو چاۋشيان دوستىعىنىڭ شىت جاڭا تاراۋىن اشتىق. تاياۋدا باس شۋجي جولداس جۇڭگوعا كەلىپ جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناستى، مەن باس شۋجي جولداسپەن ىشكەرىلەي كەڭەس وتكىزىپ، جۇڭگو مەن چاۋشياننىڭ دوستىق سەلبەستىك قارىم - قاتىناسىن ونان ارى دامىتۋىنا العا باسۋ بەتالىسىن كورسەتىپ بەردىم. حالىقارالىق جاعداي قالاي وزگەرسە دە، جۇڭگو - چاۋشيان قارىم - قاتىناسىن ويداعىداي قورعاۋ، ويداعىداي بەكەمدەۋ، ويداعىداي دامىتۋ − باستان - اياق جۇڭگو پارتياسى مەن ۇكىمەتىنىڭ وزگەرمەيتىن باعىتى. جۇڭگو جاق چاۋشيان جاقپەن بىرگە ستراتەگيالىق قارىم - قاتىناستى كۇشەيتىپ، ناقتى سەلبەستىكتى تەرەڭدەتىپ، سايكەسۋدى، سەلبەسۋدى جيىلەتىپ، جۇڭگو - چاۋشيان قارىم - قاتىناسىنىڭ ۇزدىكسىز العا دامۋىن ىلگەرىلەتىپ، ەكى ەلدىڭ سوتسياليستىك قۇرىلىس ىستەرىنە قىزمەت وتەپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە بەلسەندى ۇلەس قوسۋدى قالايدى. چاۋشيان ەڭبەك پارتياسىنىڭ ۇزدىكسىز اناعۇرلىم زور تابىستارعا قول جەتكىزۋىن تىلەيمىن! جۇڭگو - چاۋشيان دوستىعىنىڭ ماڭگى جالعاسۋىن تىلەيمىن!

كەلۋ قاينارى: حالىق تورابى