شينجياڭ بايىنعولىن اۆتونوميالى وبلىسىنىڭ لوبنۇر اۋدانىندا 5.1 بال جەر سىلكىنگەن 

ورتالىق تەلەۆيزيا تورابىنىڭ حابارى: سۋ يگىلىگى مينيسترلىگىنىڭ تورابىنان الىنعان حابارعا قاراعاندا، 2 – ايدىڭ 23 – كۇنى ساعات 12 دەن 12 مينۋت وتكەندە، شينجياڭ بايىنعولىن اۆتونوميالى وبلىسىنىڭ لوبنۇر اۋدانىندا 5.1 بال جەر سىلكىنگەن، سىلكىنىس قاينارى 15 كيلومەتر تەرەڭدىكتە. سۋ يگىلىگى مينيسترلىگى سۋ يگىلىگى سالاسىندا جەر سىلكىنىسىنە قارسى اتتانىپ، اپاتتان قۇتقارۋ رەتتەۋ – باسقارۋ مەحانيزمىن دەرەۋ ىسكە قوسىپ، ارناۋلى تاقىرىپتىق كەڭەسۋ ءماجىلىسىن ۇيىمداستىرىپ، جەر سىلكىنىسىنىڭ سۋ يگىلىگى قۇرىلىسىنا جانە اۋىل - قىستاقتى سۋمەن قامداۋعا جەتكىزگەن ىقپالى تۋرالى تالداۋ جاساپ، جەر سىلكىنىسى تۋىلعان وڭىردەگى جاۋىن – شاشىن مەن سۋ جاعدايىنا تۇجىرىم جاساپ، سۋ يگىلىگى سالاسىندا جەر سىلكىنىسىنە قارسى اتتانىپ، اپاتتان قۇتقارۋ قىزمەتى جونىندە ورنالاستىرۋ جاساعان.

سۋ يگىلىگى مينيسترلىگى بۇكىل ەلىمىز بويىنشا ”سۋ يگىلىگى سالاسىنداعى ءبىرتۇتاس جوسپارعا“ ساي تالداۋ جاساپ، جەر سىلكىنىسى تۋىلعان وڭىرگە جاقىن اۋماقتاعى وزەندەر جانە سۋ ەلەكتر ستانسيالارى، توسپا تيەگى، وزەن كەمەرى، اۋىل شارۋاشىلىعىن سۋمەن قامداۋ ينجەنەرياسى، سۋ جاعدايىن ولشەۋ ستانسياسى قاتارلىلاردىڭ تارالۋ جاعدايىن دەرەۋ ءبىر – بىرلەپ تەكسەرگەن ءارى دەر كەزىندە شينجياڭ ۇيعۇر اۆتونوميالى رايوندىق سۋ يگىلىگى مەڭگەرمەسى مەن شينجياڭ ءوندىرىس – قۇرىلىس بيڭتۋانى سۋ يگىلىگى مەڭگەرمەسىنە اڭىس ەتىپ، سۋ يگىلىگى ينجەنەريالارىنىڭ جەر سىلكىنىسىندە زياندالۋ جاعدايىن تۇگەل اداقتاۋىنا قۋزاۋ سالعان جانە جەتەكشىلىك ەتكەن. باستاپقى قادامدا تەكسەرۋ ناتيجەسىنە قاراعاندا، جەر سىلكىنىسى تۋىلعان ءوڭىردىڭ وزەندەرىندە سۋ جاعدايى تۇراقتى، سۋ يگىلىگى ينجەنەريالارى مەن قۇرىلعىلارى قالىپتى جۇمىس ىستەۋدە.

بولجامعا قاراعاندا، الداعى 7 كۇن ىشىندە جەر سىلكىنىسى تۋىلعان وڭىردە جاۋىن – شاشىن بولمايدى. سۋ يگىلىگى مينيسترلىگى جەر سىلكىنىسى تۋىلعان وڭىردەگى جاۋىن – شاشىن، سۋ جاعدايىن جانە سۋ يگىلىگى ينجەنەريالارىنىڭ جۇمىس ىستەۋ جاعدايىن ۇزدىكسىز ءجىتى باقىلاپ، جەرگىلىكتى سۋ يگىلىگى تاراۋلارىن جاساندى سەرىك، ۇشقىشسىز ۇشاق قاتارلى قۇرال – جابدىقتاردى قولدانىپ، جەر سىلكىنىسى تۋىلعان وڭىردەگى سۋ يگىلىگى قۇرىلىسىنىڭ جەر سىلكىنىسى سەبەپتى زيانعا ۇشىراۋ جاعدايىن ءبىر – بىرلەپ تەكسەرۋ قىزمەتىن جالعاستى ويداعىداي ورىستەتۋىنە، قوسىمشا اپاتتاردىڭ تۋىلۋىنان قاتاڭ ساقتانۋىنا، سونىمەن بىرگە، جۇرتشىلىقتىڭ سۋدان پايدالانۋىنا كەپىلدىك ەتۋ جاعىنداعى ۋاقىتتىق جوبانى دايىنداپ، جۇرتشىلىقتىڭ اۋىز سۋ حاۋىپسىزدىگىنە كەپىلدىك ەتۋىنە جەتەكشىلىك ەتەدى.

كەلۋ قاينارى: حالىق تورابى