قازاقستان جاستارىن جۇڭگو – قازاقستان دوستىعىن كۇشەيتۋگە شابىتتاندىردى

2014.06.25 14:26   كەلۋ قاينارى : حالىق تورابى

　　شينحۋا تورابى، بەيجيڭ، 24 – ماۋسىم. مەملەكەت ءتوراعاسى شي جيپيڭ 24 – ماۋسىمدا حالىق قۇرىلتايى سارايىندا ەلىمىزگە جازعى لاگەر قيمىلىنا قاتىناسۋعا كەلگەن قازاقستان نازاربايەۆ ۋنيۆەرسيتەتىنىڭ ستۋدەنتتەرى جانە وقىتۋشىلارىمەن كەزدەستى.

　　شي جينپيڭ ستۋدەنتتەر مەن وقىتۋشىلاردى قىزۋ قارسى الاتىندىعىن ءبىلدىرىپ، بىلتىر قىركۇيەكتە قازاقستاندا ساپاردا بولعان كەزدە ،نازاربايەۆ ۋنيۆەرسيتەتىنىڭ ستۋدەنتتەرى مەن وقىتۋشىلارىنان 200 ادامدى جۇڭگوعا كەلىپ جازعى لاگەرگە قاتىناسۋعا شاقىرعانىن ايتتى. شي جينپيڭ: «بۇگىن وسى ارادا سىزدەردى كورىپ ايىرىقشا قۋانىپ وتىرمىن»، - دەدى.

　　شي جينپيڭ جۇڭگونىڭ 5000 جىلدىق ۇزاق تاريحقا يە ەجەلگى مادەنيەتتى ەل ەكەنىن تىلگە تيەك ەتتى. جۇڭحۋا مادەنيەتى دامۋ بارىسىندا باسقا ەلدەردىڭ ارتىقشىلىقتارىن قابىلداپ، وزىندىك ەرەكشەلىككە يە باي مازمۇندى مادەنيەت بولىپ قالىپتاسقانىن، وسى ارقىلى جۇڭحۋا ۇلتىنىڭ قۇلشىنا العا باسۋىنا رۋحاني تىرەك بولعانىن باياندادى. جۇڭگو حالقىنىڭ قازىر جۇڭحۋا ۇلتىنىڭ ۇلى كوركەيۋىن ىسكە اسىرۋ ءۇشىن ۇمتىلىس جاساپ جاتقانىن ايتتى.

　　شي جينپيڭ جۇڭگو مەن قازاقستان جاقىن دوس، ەتەنە كورشى، ەكى ەل حالقى اراسىندا تابيعي جاقىندىق بار دەپ اتاپ ءوتتى. «2000 جىلدىڭ الدىندا بايىرعى جىبەك جولى ەكى ەل حالقىن بايلانىستىرعان. مەن نازاربايەۆ زۇڭتۇڭمەن جاقىن دوسپىن، ءبىز تىعىز بايلانىس جاساپ، ەكى ەل قارىم – قاتىناسىن قالاي دامىتۋ، سەلبەستىكتى قالاي كۇشەيتۋ، ەكى ەل حالقى اراسىنداعى دوستىقتى قالاي تەرەڭدەتۋ تۋرالى بىرگە كەڭەسىپ تۇرامىز. مەملەكەت اراسىنداعى قارىم – قاتىناس حالىق اراسىنداعى ءوزارا تۇسىنىسۋدەن باستالادى، ال ونىڭ تەتىگى جاستار اراسىنداعى بارىس – كەلىستە. وسى جولعى ساپار بارىسىندا جۇڭگونى اناعۇرلىم شىنايى ءتۇسىنىپ، تاماشا ەستەمەلەرگە يە بولىپ قايتاسىڭدار دەگەن ۇمىتتەمىن. سەندەر بولاشاقتا جۇڭگو مەن قازاقستاننىڭ دوستىعىن تەرەڭدەتە تۇسەدى دەگەن سەنىمدەمىن»، - دەدى شي جينپيڭ.

　　مەملەكەتتىك كەڭەستىڭ ورىنباسار زۇڭليى ليۋ ياندۇڭ قاتارلىلار كەزدەسۋدە بىرگە بولدى.

　　كەلۋ قاينارى: حالىق تورابى