مەملەكەت ءتوراعاسى شي جينپيڭ 2018 - جىلعا ارناپ قۇتتىقتاۋ ءسوزىن سويلەدى

2018.01.02 14:22   كەلۋ قاينارى : شينجياڭ گازەتى

　　شينحۋا اگەنتتىگىنىڭ 31 - جەلتوقساندا بەيجيڭنەن بەرگەن حابارى. جاڭا جىل قارساڭىندا، مەملەكەت ءتوراعاسى شي جينپيڭ جۇڭگو حالىقارالىق راديو ستانسياسى، ورتالىق حالىق راديو ستانسياسى، ورتالىق تەلەۆيزياسى، جۇڭگو حالىقارالىق تەلەۆيزياسى (جۇڭگو جەر شارى تەلەۆيزيا سايتى) جانە ينتەرنەت ارقىلى 2018 - جىلعا ارناپ قۇتتىقتاۋ ءسوزىن سويلەدى. ءسوزدىڭ تولىعى مىناداي:

　　كوپشىلىك، سالەمەتسىزدەر مە! ۋاقىت زىمىراپ، انە - مىنە دەگەنشە 2018 - جىل دا جەتىپ كەلدى. وسى ورايدا بۇكىل ەلدەگى ءار ۇلت حالقىنا، شياڭگاڭ ەرەكشە اكىمشىلىك رايونىنداعى باۋىرلاستارعا، اۋمىن ەرەكشە اكىمشىلىك رايونىنداعى باۋىرلاستارعا، تايۋاندىق باۋىرلاستارعا جانە شەتەلدەگى مۇھاجىر باۋىرلاستارعا جاڭا جىلدىق تىلەك تىلەپ، قۇتتى بولسىن ايتامىن! دۇنيە جۇزىندەگى ءارقايسى ەلدەردەگى جانە وڭىرلەردەگى دوستاردىڭ ىستەرىنىڭ ىلگەرى بولۋىن، ويىنداعىسىنىڭ ويداعىداي ورىندالۋىن تىلەيمىن!

　　ەڭبەگى باردىڭ ونبەگى بار، كۇن سايىن تۇلەپ كەلەمىز. 2017 - جىلى ءبىز جۇڭگو كوممۋنيستىك پارتياسىنىڭ مەملەكەتتىك 19 - قۇرىلتايىن اشىپ، جاپپاي سوتسياليستىك وسىزاماندانعان مەملەكەت قۇرۋدىڭ تىڭ جورىعىن باستادىق. ەلىمىزدىڭ ىشكى ءوندىرىس جالپى ءونىم قۇنى 80 تريلليون يۋاندىق بەلەسكە كوتەرىلدى، قالا - قالاشىقتا 13 ميلليوننان استام ادام تىڭنان جۇمىسقا ورنالاستى، قوعامدىق زەينەتكەرلىك قامسىزداندىرۋى 900 ميلليوننان استام ادامدى، نەگىزگى ەمدەۋ قامسىزداندىرۋى ءبىر ميلليارد 350 ميلليون ادامدى قامتىدى، بۇدان سىرت، اۋىل - قىستاقتا 10 ميلليوننان استام كەدەي كەدەيلىكتەن قۇتىلدى. «ءسىڭىرى شىققان الەمدە وقىعان كەدەي جاندارعا، كەڭىرەك ۇيدە ەلمەن تەڭ قۋاناتىن كۇن قايدا». 3 ميلليون 400 مىڭنان استام كەدەي وزگە جەرگە كوشىرىلىپ كەدەيلىكتەن قۇتىلىپ، جانعا جايلى جانۇياعا قول جەتكىزدى، لاشىقتى رايونداردى جاڭالاۋ ينجەنەرياسى بويىنشا 6 ميلليون ءۇي سالۋ نىسانالىق مىندەتى كۇنى بۇرىن ورىندالدى. حالىق تۇرمىسىنا قاتىستى ءتۇرلى ىستەر تەز قارقىنمەن دامىپ، ەكولوگيالىق قورشاعان ورتا بىرتىندەپ جاقسارىپ، حالىق بۇقاراسىنىڭ تابىس سەزىمى، باقىت سەزىمى، حاۋىپسىزدىك سەزىمى كۇشەيە ءتۇستى. ءبىز جاپپاي دوڭگەلەك داۋلەتتى قوعام ورناتۋ نىساناسىن جۇزەگە اسىرۋعا تاعى ءبىر نىق قادام تاستادىق.

　　عىلىم - تەحنيكادا جاڭالىق اشۋدان، كەلەلى ينجەنەريالىق قۇرىلىستاردان قۋانىشتى حابارلار تارالدى. «حۇييان» جاساندى سەرىگى عارىشتى شارلاپ، C919 تۇرپاتتى جولاۋشىلار ۇشاعى زەڭگىر كوكتە سامعادى، كۆانتتىق كومپيۋتەر ءساتتى زەرتتەپ جاسالدى، تەڭىز كۇرىشىنەن سىناق رەتىندە ءونىم الىندى، ەلىمىز ءوزى جاساعان تۇڭعىش اۋياماتكا سۋعا ءتۇسىرىلدى، «حاي - ي» اتتى شىڭىراۋ تەڭىز پلانەرى تەرەڭ تەڭىزدەگى تەكسەرۋ مىندەتىن ورىندادى، تەڭىزدەگى جانار مۇزدى تۇڭعىش رەت سىناق رەتىندە الۋ تابىستى بولدى، ياڭشانداعى 4 - مەرزىمدى اۆتوماتتى پورت رەسمي ىسكە قوسىلدى، شياڭگاڭ - جۋحاي - اۋمىن ۇلكەن كوپىرىنىڭ تۇلعالىق قۇرىلىسى بۇكىل لەنيا بويىنشا ىسكە قوسىلدى، «فۋشيڭ» اتتى ۇشقىر پويەز وتانىمىزدىڭ كەڭ بايتاق دالاسىندا زىمىرادى... مەن جۇڭگو حالقىنىڭ ارىنداعان جاسامپازدىق ۇلى كۇشىنە ماداق ايتامىن!

　　ءبىز زۇركى بىرلەسكەن جاتتىعۋ بازاسىندا اسكەر جاتتىقتىرىپ، جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعىن ەسكە الدىق. شياڭگاڭ وتان قۇشاعىنا ورالعاندىعىنا 20 جىل تولعان كەزدە مەن شياڭگاڭعا بارىپ، وتانىمىزدىڭ بەرىك قورعان بولۋىندا شياڭگاڭنىڭ باياندى كوركەيىپ، ورنىقتى بولعانىن، بولاشاعىنىڭ، ءسوز جوق، اناعۇرلىم شۇعىلالى بولاتىنىن ءوز كوزىممەن كوردىم. ءبىز تاعى جالپى حالىقتىڭ جاپون شاپقىنشىلارىنا قارسى كۇرەسى باستالعاندىعىنىڭ 80 جىلدىعىن ەسكە ءتۇسىرۋ سالتىن جانە نانجيڭ قاندى قىرعىنىندا قازا بولعاندارعا مەملەكەتتىك ازا ءبىلدىرۋ سالتىن وتكىزىپ، تاريحتى ەستە بەرىك ساقتاپ، بەيبىتشىلىك تىلەدىك.

　　ءبىز ەل ىشىندە كوپتەگەن ديپلوماتيالىق قيمىلداردى باس بولىپ وتكىزدىك، بۇلار «ءبىر بەلدەۋ، ءبىر جول» حالىقارالىق ىنتىماقتاستىق جوعارى دارەجەلىلەر تالقى مىنبەرى، بريكس ەلدەرى باسشىلارىنىڭ شيامىن باس قوسۋى، جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسى قاتارلى جينالىستاردى قامتيدى. مەن دۇنيە جۇزىندەگى ءبىرقانشا ماڭىزدى كوپ جاقتى ماجىلىستەرگە قاتىناستىم. بيىل جىل باسىندا داۆوس دۇنيە جۇزىلىك ەكونوميكالىق تالقى مىنبەرىنىڭ جىلدىق ماجىلىسىنە قاتىناستىم ءارى ب م ۇ - نىڭ جەنەۆاداعى باس شتابىندا ءسوز سويلەدىم، سوڭىنان 20 ەل توبى باسشىلارىنىڭ باس قوسۋى، ازيا - تىنىق مۇحيت ەكونوميكالىق ىنتىماقتاستىق ۇيىمى مۇشەلەرى باسشىلارىنىڭ بەيرەسمي ءماجىلىسى قاتارلى قيمىلدارعا قاتىناستىم. وسى قيمىلداردا مەن قاتىستى جاقتارمەن ىشكەرىلەي پىكىرلەستىم، كوپشىلىك ادامزاتتىڭ تاعدىرلاس ورتاق تۇلعاسىن بىرگە قۇرىپ، دۇنيە جۇزىندەگى ءار ەل حالقىن يگىلىككە كەنەلتۋدى قۇپتادى.

　　مەن 2017 - جىلى بۇقارادان كوپتەگەن حات تاپسىرىپ الدىم، مۇندا شيزاڭ لۇڭزى اۋدانى يۇيماي اۋىلى تۇرعىندارىنىڭ، ىشكى موڭعۇل سۋنيد وڭ حوشۇنى ۇلانمۇچىر كوركەمونەر ۇيىرمەسىندەگىلەردىڭ، شي - ان قاتىناس ۋنيۆەرسيتەتىنەن باتىسقا قونىس اۋدارعان قارت پروفەسسوردىڭ جانە نانكاي ۋنيۆەرسيتەتىنەن اسكەري قوسىنعا جاڭادان قابىلدانعان ستۋدەنتتىڭ حاتى بار، ولاردىڭ حيكايالارى مەنى ەرەكشە اسەرلەندىردى. قالىڭ حالىق جۇرتشىلىعىنىڭ وتاندى ءسۇيىپ، ۇلەس قوسۋىنان، ەشقانداي وكپە - ناز بىلدىرمەۋىنەن سان ميلليونداعان جاي بۇقارانىڭ ەڭ ۇلى ەكەنىن سەزىندىم، سونىمەن بىرگە باقىتتى تۇرمىسقا كۇرەس ارقىلى عانا قول جەتەتىنىن دە شىنايى سەزىندىم.

　　2018 - جىل − جۇڭگو كوممۋنيستىك پارتياسىنىڭ مەملەكەتتىك 19 - قۇرىلتايىنىڭ رۋحىن جاپپاي دايەكتىلەندىرەتىن تۇڭعىش جىل، 19 - قۇرىلتايدا ەلىمىزدىڭ الداعى 30 نەشە جىلدىق دامۋ جوباسى جاسالدى. ءزاۋلىم عيمارات ىرگە تاسىنان باستاپ قالانادى، سوندىقتان قىزمەتتەردى تىڭعىلىقتى تىندىرۋىمىز كەرەك.

　　2018 - جىلى ءبىز رەفورما جاساپ، ەسىك اشۋدىڭ 40 جىلدىعىن قارسى الامىز. رەفورما جاساپ، ەسىك اشۋ − زامانىمىزداعى جۇڭگونىڭ دامۋىندا، العا باسۋىندا، ءسوز جوق، باسىپ وتەتىن جول جانە جۇڭگو ارمانىن جۇزەگە اسىرۋدا، ءسوز جوق، باسىپ وتەتىن جول. ءبىز رەفورما جاساپ، ەسىك اشۋدىڭ 40 جىلدىعىن قۇتتىقتاۋدى وراي ەتىپ، اسۋلاردى باعىندىرىپ، وزەندەردى نوقتالاپ، رەفورمانى سوڭىنا دەيىن جالعاستىرۋىمىز كەرەك.

　　2020 - جىلعا بارعاندا ەلىمىزدىڭ قازىرگى ولشەمى بويىنشا اۋىل - قىستاقتاعى كەدەيلەردى كەدەيلىكتەن قۇتىلدىرۋ − ءبىزدىڭ ايبىندى ۋادەمىز. ءبىز ۋادەمىزدى ورىندايمىز. 2020 - جىلعا ءۇش - اق جىل قالدى، بۇكىل قوعام جابال اتتانىسقا كەلىپ، ىسكە جۇمىلا كىرىسىپ، دالمە - ءدال شارا قولدانىپ، ۇزدىكسىز تىڭ تابىستارعا قول جەتكىزۋ ءتيىس. 3 جىلدان كەيىن كەدەيلىكتەن قامال الۋ شايقاسىندا ءوز ۋاعىندا جەڭىسكە جەتۋ − جۇڭحۋا ۇلتىنىڭ نەشە مىڭ جىلدىق دامۋ تاريحىندا تاقىر كەدەيلىكتى تۇڭعىش رەت تۇلعالىق جاقتان الاستاۋى بولىپ تابىلادى، جۇڭحۋا ۇلتى جونىنەن دە، كۇللى ادامزات جونىنەن دە كەلەلى ماڭىز الاتىن وسى ۇلى ءىستى بىرگە جۇزەگە اسىرايىق.

　　قازىرگى تاڭدا، تاراپتار ادامزاتتىڭ بەيبىتشىلىگى جانە دامۋ بولاشاعىنان ءۇمىت كۇتىپ قانا قالماستان، الاڭداپ تا وتىر، ولار جۇڭگونىڭ تۇرعىسى مەن پوزيتسياسىن ايقىن ءبىلدىرۋىن كۇتۋدە. جالپاق جاھان − ءبىر شاڭىراق. جاۋاپكەرشىلىك ارقالايتىن ءىرى ەل ساناتىندا جۇڭگونىڭ دا ءوز ايتارى بار. جۇڭگو ب م ۇ - نىڭ بەدەلى مەن مارتەبەسىن باتىل قورعاپ، وتەۋگە ءتيىستى حالىقارالىق بورىش - جاۋاپكەرشىلىكتەرىن بەلسەنە ادا ەتەدى، الەمدىك كليمات وزگەرىسىنە توتەپ بەرۋ ۋادەسىنەن اينىمايدى، «ءبىر بەلدەۋ، ءبىر جولدى» بىرگە قۇرۋدى بەلسەنە ىلگەرىلەتىپ، قاي - قاشان دا دۇنيە بەيبىتشىلىگىن قۇرۋشى، دۇنيە ءجۇزىن دامىتۋعا ۇلەس قوسۋشى، حالىقارالىق ءتارتىپتى ساقتاۋشى بولادى. جۇڭگو حالقى ءار ەل حالقىمەن بىرگە ادامزاتتىڭ اناعۇرلىم گۇلدەنىپ - كوركەيگەن، ءتىپتى دە تىنىش تاماشا بولاشاعىنا جول اشادى.

　　ءبىزدىڭ ۇلى دامۋ جەتىستىگىمىزدى حالىق جاراتقان، سوندىقتان حالىق ودان بىرگە يگىلىكتەنۋى كەرەك. بۇقارا وقۋ - اعارتۋ، جۇمىسقا ورنالاستىرۋ، كىرىس، قوعامدىق قامسىزداندىرۋ، ەمدەلۋ، زەينەتكەرلىك، قونىس، قورشاعان ورتا سياقتى جاقتارداعى ىستەرگە ايرىقشا نازار اۋدارادى. جۇرتشىلىق ءبىرسىپىرا تابىسقا قول جەتكىزگەنىمەن، الاڭدايتىن، ابىرجيتىن ىستەرى دە از ەمەس. حالىق تۇرمىسى جاعىنداعى قىزمەتىمىزدە ءالى تالاي ولقىلىقتار، جەتەرسىزدىكتەر بار، بۇل بىزدەن بورىشتىلىق سەزىم مەن جاۋاپكەرشىلىك سەزىمدى كۇشەيتىپ، حالىقتى يگىلىككە كەنەلتەتىن ىستەردى شىن مانىندە تىڭعىلىقتى تىندىرۋدى تالاپ ەتەدى. ءار دارەجەلى پارتكومدار، ۇكىمەتتەر جانە كادرلار قاي - قاشان دا بۇقارانىڭ قامىن ويلاپ، حالىقتى باقىتقا كەنەلتۋدى ەڭ زور ساياسي ناتيجە رەتىندە قاراپ، بۇقارانىڭ ويلاعانىن ويلاپ، بۇقارانىڭ اسىققانىنا اسىعىپ، حالىقتى باي - باقىتتى تۇرمىسقا كەنەلتۋگە قۇلشىنىس جاساۋى كەرەك.

　　كوپشىلىككە راقىمەت.

　　كەلۋ قاينارى: شينجياڭ گازەتى