لانجوۋ _ شينجياڭ جوعارى قارقىندى تەمىر جولىنىڭ شينجياڭ بولەگىندە رەسمي پويەز قاتىنادى

2014.11.18 13:19  

　　«شينجياڭ گازەتىنەن». قاراشانىڭ 16-كۇنى ساعات 11 دە گۋدوك داۋىسىنىڭ تارالۋىمەن جولاۋشىعا لىق تولعان D8602 ءنومىرلى جۇردەك پويەز ءۇرىمجى ۆوگزالىنان جولعا شىقتى. بۇل لانجوۋ-شينجياڭ جوعارى قارقىندى تەمىر جولىنىڭ شينجياڭ بولەگىندە رەسمي پويەز قاتىناپ، ەلىمىز باتىس تەرىستىگىنىڭ وسىدان باستاپ جوعارى قارقىندى تەمىر جول داۋىرىنە قادام تاستاعاندىعىنان دەرەك بەرەدى.

　　وسى رەت لانجوۋ-شينجياڭ جوعارى قارقىندى تەمىر جولىنىڭ الدىمەن ىسكە قوسىلعان ۇرىمجىدەن قۇمىلعا دەيىنگى بولەگىنىڭ جالپى ۇزىندىعى 530 كيلومەتر بولىپ، باستاپقى مەرزىمدە 4 جۇپ جۇردەك پويەز قاتىنادى. ءۇرىمجى وڭتۇستىك بەكەتى، تۇرپان سولتۇستىك بەكەتى، ءپىشان سولتۇستىك بەكەتى، تۇرپان -قۇمىل بەكەتى، قۇمىل بەكەتى سياقتى 5 بەكەتى بار. جۇردەك پويەزدىڭ ساعاتتىق قارقىنى 200 كيلومەترگە جەتىپ، بۇرىنعى پويەزدەر ۇرىمجىدەن قۇمىلعا 5 ساعاتتا بارسا، جۇردەك پويەز شامامەن 3 ساعاتتا جەتەدى.

　　شينجياڭداعى جولاۋشىلاردىڭ ەرەكشەلىگىنە قاراي، ۇرىمجىدەن قۇمىلعا دەيىنگى جۇردەك پويەزدە ۇيعۇر-حانزۋ تىلدەرىندە قىزمەت وتەلەدى، پويەزدەردىڭ ءاربىر قىزمەت وتەۋ گرۋپپاسىندا از ۇلت قىزمەتكەرلەر بار.

　　34 جاستاعى ءادىل تۇردى تەمىر جول تاراۋىنىڭ قاتاڭ سىنىنان ءوتىپ، ەلىمىزدە جۇردەك پويەزدى تۇڭعىش رەت ايداعان ۇيعۇر شوفەرگە اينالدى. ول اسەرلەنىپ تۇرىپ بىلاي دەدى: جۇردەك پويەزدىڭ شوفەرى بولعاندىعىمدى ماقتانىش سەزىنەمىن. ءوزىم ايداعان پويەزدى ەڭ تەز، ەڭ ورنىقتى، ەڭ حاۋىپسىز كەزەكشى پويەزگە اينالدىرۋعا بەل بايلادىم.

　　جالپى ۇزىندىعى ءبىر مىڭ 776 كيلومەتر لانجوۋ - شينجياڭ جوعارى قارقىندى تەمىر جولى گانسۋ، چيڭحاي، شينجياڭ ولكەلەرى اراسىندا قاتىنايدى، دۇنيە ءجۇزى بويىنشا قازىرگە دەيىن ءبىر رەتكى قۇرىلىس ۇزىندىعى ەڭ ۇزىن جوعارى قارقىندى تەمىر جولعا اينالدى. تەمىر جول تاراۋى مىنانى اتاپ كورسەتتى: وسى تەمىر جولدىڭ قۇمىلدان لانجوۋعا دەيىنگى بولەگى مەجەمەن بيىل جىل سوڭىندا ىسكە قوسىلسا، ۇرىمجىدەن بەيجيڭگە دەيىنگى جوعارى قارقىندى تەمىر جول 2017-جىلى اينالىمعا تۇسەتىن بولادى، سول كەزدە ۇرىمجىدەن بەيجيڭگە قاتىناۋ ۋاقىتى قازىرگى 41 ساعاتتان 16 ساعاتقا قىسقارادى.

　　كەلۋ قاينارى: «ىلە گازەتى» - ىلە اقپارات تورابى