جۇمابەك نەگە ءسۇرىندى؟

سۇحباتتاسقان: مۇحيت امانتاي ۇلى

2014.11.18 11:01   كەلۋ قاينارى : حالىق تورابى

　　جۇمابەك جۇڭگو قازاعىنان تۇڭعىش رەت شىققان ەركىن بوكسشى، جۇڭگوداعى ەركىن بوكس سالاسىندا توپ باستاعان سەركەلەردىڭ ءبىرى، بۇگىنگە دەيىن تالاي بەلەستى باعىندىرعان ازامات، ەركىن بوكس جاعىندا ەڭبەكتەنۋىن ءالى جالعاستىرۋدا. جۇمابەك جۇڭگودا وتكىزىلگەن ەركىن بوكس جارىسىندا الدىندا جان سالمادى، ونىمەن قوسا جۇڭگوعا قوناق بولىپ كەلگەن شەتەلدىك «جۋان جۇدىرىقتىلاردىڭ» دا تالايىنا جەڭىلىستىڭ كەرمەك ءدامىن تاتقىزدى.

　　جۋىردا جۇمابەك شەكارا اتتاپ شەتەلدە باعىن سىنادى، الايدا، UFCدىڭ جۋىرداعى ەكى رەتكى جارىسىندا دا كانىگى قارسىلاستارىنىڭ جۇمابەكتەن ايلاسىن اسىرىپ كەتكەنىن كورىپ، بارماق تىستەپ قالدىق. «ات سۇرىنبەي جەر تانىماس، ەر سۇرىنبەي ەل تانىماس» دەگەن ەمەس پە، «جەڭىلىس ــ جەڭىستىڭ اناسى» دەگەن قازاق دانالىعىنا سۇيەنسەك تە، ەركىن بوكستە ەندى قۇلاشىن سەرمەپ كەلە جاتقان قانداسىمىزدىڭ جەڭىلىسى ءبارىمىزدى ويلاندىردى، بۇل ەكى رەتكى جەڭىلىستىڭ سەبەبى تۋرالى جۇمابەكتىڭ وزىمەن سۇحباتتا بولدىق، تومەندە سۇحباتىمىزدى نازارلارىڭىزعا ۇسىنامىز:

　　مۇحيت: 8 – قاراشا، اۆستراليادا وتكەن UFC ەركىن بوكس جارىسىندا، بايقاۋسىزدا قارسىلاسىڭ ايلاسىن اسىرىپ كەتتى، ءوزىڭ بۇل جايلى نە ايتار ەدىڭ؟

　　جۇمابەك: يا، قارسىلاسىم قاپىدا ايلاسىن اسىردى، نە دەيمىن...مىنە بۇل جارىس، ءارقاشان ميىڭدى تۇنىق ۇستاپ، ساق بولۋىڭ قاجەت. نەگىزى بارعان جەردە ورتاعا ۇيلەسپەۋشىلىك بولدى، مەن ءۇشىن 15 كيلوگرام سالماق ءتۇسىرۋ كەرەك، ال مەن ەكى جەردە سالماق ولشەۋدەن وتپەي قالدىم، جارىس جاقىنداعان سايىن جان سالا سالماق ءتۇسىرۋىم كەرەك بولدى، ال سالماق ءتۇسىرۋ بارىسىندا قاتتى شارشادىم، دەنەگە لايىقتى كۇش - قۋات جيۋعا ۋاقىت تا بولمادى. سالماق ءتۇسىرۋ ەرتە باستالعان، ءبىراق اۋىلدا سۋىق بولدى، سۋىق اۋا رايىندا سالماق ءتۇسىرۋ وڭايعا تۇسپەدى.

　　بۇدان سىرت بۇرىنعى جارىستارىمىزدىڭ بارلىعى كەشكى ساعات 6دا باستالاتىن، بۇل جولعى جارىس تاڭەرتەڭگى ساعات 8دە باستالدى، تاڭەرتەڭگى ساعات 6دان باستاپ دايىندالدىق، نەگىزى ۋاقىت پارقى ما، جوق ورتاعا ۇيلەسە الماۋشىلىق پا بارعاننان باستاپ ۇيقىمنىڭ تامتىعى ۇشتى، نەگىزى سول كۇنى ءوزىمدى سەرگەك ۇستاي المادىم.

　　ودان كەيىن، قارسىلاسىمىنىڭ بۇرىنعى جارىستارىنىڭ كوپ كەسكىندەرىن ءتۇسىرىپ كورگەن بولاتىنبىز، ءبىزدىڭ زەرتتەۋىمىزشە، قارسىلاسىمنىڭ باسقا تەبەتىن ونەرى بولماعان، كوبىندە اياققا تەۋىپ، شالىپ شىعىپ، توبەلەسەتىن. ءبىز بۇكىلدەي وسىعان سايكەس جاتتىعۋ جاساعانبىز، امال قانشا، جارىس ولاي بولمادى، ونىڭ جارىسقا تولىق دايىندالعانى، تەحنيكالىق ورەسىنىڭ جوعارىلاعانى بەلگىلى بولدى.

　　ەندىگى جەردە، شەتەلدەگى جارىسقا ۇزاعىنان دايىندالۋ كەرەك سياقتى، ول ءۇشىن جارىس بولاتىن نەمەسە سول جەرمەن شامالاس جەردە ۇزاق جاتتىعۋ جاساۋ كەرەك، قازىر، جۇڭگودا بۇل تۇردەگى جارىستىڭ الدىن ءوزىمىز باستاپ تۇرعان سوڭ، جاتتىعۋ ورەمىز دە ءوز توڭىرەگىمىزدە بولماق، نەگىزى تايلاند، ا ق ش سياقتى كاسىپتىك ورەسى جوعارى دەڭگەيدەگى جەرلەرگە بارىپ، سول جەردەگى مىقتىلارمەن بىرگە جاتتىعۋ جاساپ، تاجىريبە الماستىرۋ كەرەك. قىسقاسى تولىق دايىندالۋ كەرەك.

　　مۇحيت: مەن سەنىڭ جارىس كەسكىنىڭدى كورىپ وتىرىپ مىناداي ماسەلەنى بايقادىم، سەن قارسىلاسىڭنان كەيىن، قازاقتىڭ اداي كۇيىمەن دۇمبىرلەتىپ ساحناعا شىقتىڭ، قىسقاشا تانىستىرۋدان كەيىن، سەن جانىڭداعىلارمەن قۇشاقتاسىپ، مايدانعا كوتەرىلدىڭ، ءبىراق قارسىلاسىڭمەن ۇقسامايتىنى، سەن ولاردى ءوزىڭ بارىپ قۇشاقتاپ، جارىسىڭا مەدەت تاۋىپ مايدانعا كوتەرىلدىڭ، سول مەزەتتە مەن ويلادىم، ءتىلىڭ، ءدىلىڭ ۇقسامايتىن بوگدە ادامدار، شىركىن، سول كەزدە قازاقتىڭ جىگىتتەرى قاسىڭدا بولسا، بولماسا باپكەرلەرىڭ قازاقتان بولسا، ۇرانىن شاقىرىپ، باسىنا كوتەرىپ، سەنىڭ ايباتىڭدى اسىرىپ، جانىڭا كۇش – قۋات سيلايتىن ەدى، سەن سول كەزدە وسىنداي كۇشكە مۇحتاجسىڭ با؟

　　جۇمابەك: ءيا، دۇرىس ايتاسىز، مەنىڭ جۇڭگودا وتكەن جارىستارىم دا ءوز ۇلتىمنان كوپتەگەن جانكۇيەرلەرىم بولعان، ويتكەنى ىشكەرىدە ۆنيۆەرسيتەتتەردە وقيتىن قازاق ستۋدەنتتەر كوپ قوي، ءارقاشان جارىسىمدا ولاردىڭ ماعان مەدەت بەرىپ ايعايلاعان داۋىستارىم ەستىپ، كوڭىلىم سونداي شاتتاناتىن، دەنەمە رياسىز ءبىر ءتۇرلى كۇش جينالاتىن.

　　ال شەتەلدەگى جارىستارعا ۇدايى جالعىز بارىپ جۇرمىن، بارلىعى دا مەن ءۇشىن جات جەر، بەيتانىس سەزىلەدى، كەي – كەزدە كوڭىل كۇيدە باسقاشا بولادى، قاسىما ەرەتىن قازاق جىگىتتەرى قۇداي قالاسا الدىداعى جارىستاردا بولىپ قالار، قازىر ءتۇرلى سەبەپتەرمەن ولار ءۇشىن ۆيزا جۇمىسى دا وڭايعا بىتپەيدى، اللا قالاسا بارلىعى دا اقىرىن – اقىرىن بولىپ قالار. ا ق ش – تاعى جارىسىمدى قازاقستانداعى ءبىر نەشە اعالارىمىز بارىپ كورىپ مەدەت بەردى، ارينە، قازاقتىڭ داۋىسى دا، جانى دا بولەك قوي.

　　مۇحيت: جۇمابەك، سەن ەركىن بوكس ونەرىنىڭ جۇڭگوداعى كوش باستاۋشىسىسىڭ، ءار قانداي ءبىر ءىستى باستاۋ قيىن - عوي، قاناتىڭ تالماسىن دەي وتىرىپ، بولاشاقتا سوڭىڭنان ەرەتىن ىنىشەكتەرىڭدى وسى ونەرگە باۋلۋ، تاربيەلۋ تۋرالى جوسپارىڭ بارما؟ بۇدان سىرت ەندىگى جارىستارىڭا قانداي تاجىريبە توپتادىڭ، قالاي دايىندالماقسىڭ؟

　　جۇمابەك: يا، بۇل ونەر ءالى تالاي ەلگە جات، مەن وزىم دە بۇعان كەيىنتىنەن قاتىناستىم، ازىراق تالەيىم جانعانداي بولدى، بارلىعى دا بويىمىزداعى قاسيەتىمىزدەن بولار، اتا – بابالارىمىز باتىر بولدى، ءبىز سول بابالاردىڭ ۇرپاعىمىز، بەيبىت زاماندا ءوز جۇيەسىمەن بۇل ويىندى ويناۋ ءبىز ءۇشىن ەرسى ەمەس تەپ ويلايمىن، بۇعان قازاق جاستارىنىڭ شاماسى ابدەن جەتەدى، ونى دا ويلاپ جۇرمىن، اللا قالاسا ارتىمنان ەرگەن ىنىشەكتەرگە وسىنداي ونەرگە جاتتىعاتىن كلۋب اشامىن با دەپ جوسپارلاپ ءجۇرمىن، قالاسا الدا بارلىعى بولىپ قالار، «جالعىزدىڭ شاڭى شىقپاس» دەيدى، وسى ونەرمەن اينالىساتىن قازاق جاستارى كوبەيسە، ەرتەڭ – اق الەم چەمپيوندارى شىعاتىنىنا سەنەمىن.

　　«جەڭىلىس – جەڭىستىڭ اناسى» دەگەن، حالىقارلىق جارىسقا ەندى اياق باستىم، ءوزىمىنىڭ جەتەرسىزدىكتەرىمدى ءبىر شەتىنەن بايقاپ كەلەمىن، «باق شابا ما، باپ شابا ما» دەگەن، ءبىر باعىمدى اللادان سۇرايمىن، ال بابىمدى ءوزىم جاساۋىم كەرەك سياقتى. الدا UFCمەن بولعان كەلىسىم بويىنشا سوڭعى ءبىر جارىسىم قالدى، ماۋسىم ايىنا تاياپ وتپەك، جوعارىداعى ايتىلعان تاجىريبەلەردى جيناقتاي كەلە، 1 – اقپاننان باستاپ، 3 اي ۋاقىت تايلاندقا، سوڭعى 2 ايدا ا ق ش – قا بارىپ جاتتىعۋ جاساۋعا بەكىدىم، وسى جولى ءار جاعىنان تولىق دايىندالايىن دەپ وتىرمىن. جارىس وسىمەن توقتاپ قالمايدى، ەندە قالاسا شەتەل مەن ازياعادا بىردەي كىرىسپەكپىن، ەكى جەردەگى جارىسقا دا كەلىسىم شارتقا وتىرامىن، قىسقاسى مەن ءۇشىن قاتتى ءبىر بەلدەسۋ كەرەك بولىپ تۇر. اللا قالاسا قاسىما مەدەت بەرەتىن جولداس جىگىتتەر دە ەرەدى.

　　كوپ راحمەت جۇمابەك وزىڭە، بۇل ونەردىڭ كوشىن باستاپ جۇرسىڭ، جۇك بولسا اۋىر، قانشا جەردەن جىعىلساڭ دا، بەتكە العان نيەتىڭنەن قايتپاعايسىڭ، ءارقاشان جارىسىڭدا الەمنىڭ جارتىسىن ات تۇياعىمەن تاپتاپ وتكەن اتا – بابا رۋحىن ەسىڭە العايسىڭ. ال ءبىز ءارقاشان سەنىڭ تابىسقا جەتۋىڭە تىلەكتەسپىز.

　　كەلۋ قاينارى: حالىق تورابى