بيىل ەلىمىزدە جاڭا تيپتى ايدارشا ۆيرۋس ۆاكسيناسىن ءوندىرۋ مولشەرى شامامەن 3 ميلليارد دانادان اسادى

2021.04.21 13:41   كەلۋ قاينارى : حالىق تورابى

　　سۋرەتتە: 4 – ايدىڭ 20 – كۇنى جىڭ جۇڭۋەي بو – اۋ ازيا تالقى مىنبەرىندەگى «جاڭا تيپتى ايدارشا ۆيرۋس ۆاكسيناسىمەن قامداۋ جانە ونىڭ قولجەتىمدىلىگى» بولىمشە تالقى مىنبەرىندە ءسوز سويلەۋدە. شينحۋا اگەنتتىگىنىڭ ءتىلشىسى لي حى فوتوسى

　　شينحۋا اگەنتتىگىنىڭ ءتىلشىسى چىن كايزىنىڭ 4 – ايدىڭ 20 – كۇنى حاينان بو – اۋدان بەرگەن حابارى. 4 – ايدىڭ 20 – كۇنى مەملەكەتتىك كەڭەستىڭ بىرلەسكەن ساقتانۋ – تىزگىندەۋ مەحانيزمى عىلىمي زەرتتەۋدە قامال الۋ گرۋپپاسى ۆاكسينانى زەرتتەۋ ارناۋلى قىزمەت گرۋپپاسىنىڭ باستىعى، مەملەكەتتىك دەنساۋلىق ساقتاۋ – سالاماتتىق كوميتەتى ەمدەۋ – دەنساۋلىق ساقتاۋ عىلىم – تەحنيكاسىن دامىتۋ ورتالىعىنىڭ مەڭگەرۋشىسى جىڭ جۇڭۋەي بو – اۋ ازيا تالقى مىنبەرى 2021 – جىلعى جىلدىق ماجىلىسىندە وتكىزىلگەن «جاڭا تيپتى ايدارشا ۆيرۋس ۆاكسيناسىمەن قامداۋ جانە ونىڭ قولجەتىمدىلىگى» بولىمشە تالقى مىنبەرىندە مىنانى ءبىلدىردى: ستراتەگيالىق شەشىمدەردى ەرتە جاساۋدىڭ، تۇزىمدىك ابزالدىلىقتىڭ، سونداي – اق ۇيىمداستىرۋ مەن باسقارۋدا جاڭالىق جاراتۋدىڭ ارقاسىندا، قازىر جۇڭگونىڭ جاڭا تيپتى ايدارشا ۆيرۋس ۆاكسيناسىنا قاتىستى جىلدىق ءوندىرىس قۋاتى 5 ميلليارد داناعا جاقىندادى، مەجەمەن بيىلعى ءونىم مولشەرى 3 ميلليارد دانادان اسادى، بۇل جوسپار كەيىنگى جارىم جىلدا بىرتىندەپ ورىندالادى.

　　جىڭ جۇڭۋەي مىنانى ءبىلدىردى: جاڭا تيپتى ايدارشا ۆيرۋس ىندەتى تۋىلعان سوڭ، جۇڭگو عىلىمي زەرتتەۋدە قامال الۋدى جەدەلدەتۋدى دەرەۋ ماقۇلداپ، ۆاكسينانى زەرتتەۋدى ورىستەتتى. مەملەكەتتىك كەڭەستىڭ بىرلەسكەن ساقتانۋ – تىزگىندەۋ مەحانيزمى عىلىمي زەرتتەۋدە قامال الۋ گرۋپپاسى ۆاكسينانى زەرتتەۋ ارناۋلى قىزمەت گرۋپپاسى قۇرىلعان سوڭ، بۇكىل ەلىمىز بويىنشا 10 عىلىمي زەرتتەۋ ورنىنىڭ 12 ءتۇرلى ۆاكسيناسىن سارالاپ شىعىپ، عىلىمي زەرتتەۋدە قامال الۋدى جان – جاقتىلى ىلگەرىلەتىپ، ءساتتى بولۋ مولشەرىنە كەپىلدىك ەتتى، بۇل ۆاكسينالار دۇنيە جۇزىندەگى باستى تەحنيكالىق تاسىلدەردى تولىق قامتىدى.

　　مۇنان سىرت، جۇڭگو ۆاكسينانى زەرتتەۋ، ساراپقا سالۋ قاتارلى مەحانيزمدەردە «تىزبەكتى جالعاسۋ» فورماسىنان «قوساقتالا جالعاسۋ» فورماسىنا قاراي جاڭالىق اشا ويىستى، زەرتتەۋ، حايۋاناتتارعا سىناق ەتۋ، ساراپتاۋ – بەكىتۋ قاتارلى قىزمەتتەرگە جاۋاپتى قۇرىلىمدار ۆاكسينانىڭ ومىرگە كەلۋىنە بىرلىكتە كۇش قوستى. ول مىنانى ءبىلدىردى: «قارقىنى تەز بولعانىمەن، ارالىقتاعى ءارقانداي بۋىن دا قاعىس قالدىرىلعان جوق، سوڭعى مەرزىمدە شەتەلدە 3 – مەرزىمدىك كلينيكالىق سىناقتان وتكىزۋ دە وسىعان قامتىلادى. جۇڭگونىڭ ۆاكسينانى ساراپتاۋ – بەكىتۋ ولشەمى ا ق ش مەن ەۆروپا وداعىنىڭ ولشەمىنەن استە تومەن ەمەس».

　　«جۇڭگو ۆاكسينانى ءوندىرۋدى ورنالاستىرۋ بارىسىندا، دۇنيە جۇزىندەگى ىندەتكە توتەپ بەرۋ قاجەتىن دە ويلاستىردى»، — دەدى جىڭ جۇڭۋەي، جۇڭگو جاڭا تيپتى ايدارشا ۆيرۋس ۆاكسيناسىن دۇنيە جۇزىلىك الەۋمەتتىك ءونىم رەتىندە قاراۋدى ورتاعا قويىپ، ءار ەلدەر حالقىنىڭ شىنايى پايدالانۋىنا، پايدالانا الۋىنا شارت – جاعداي ازىرلەدى. مەجەمەن بيىل سوڭعى جارىم جىلدا، جۇڭگو كوپ جاقتى، ەكى جاقتى مەحانيزمدەر ارقىلى دۇنيە ءجۇزىن اناعۇرلىم مول ۆاكسينامەن قامدايدى.

　　كەلۋ قاينارى: حالىق تورابى