استانادا اسەم ءان اسقاقتادى...

2013.05.20 16:34   كەلۋ قاينارى : حالىق تورابى

　　ءومىرجان سەيسەنقۇل ۇلى بەيجيڭنەن حابارلايدى. مامىردىڭ 18-جۇلدىزى قاسيەتتى ءبىلىم ورداسى ورتالىق ۇلتتار ۋنيۆەرسيتەتىندە ايتا قالسىن ايىرىقشا ءبىر كۇن بولدى. كوكتەم لەبى ەسكەن جانعا جايلى، ارايلى وسى ءبىر كۇنى، قالىڭ ستۋدەنتتەر كوپتەن بەرى حاباردار بولىپ تاعاتسىزدانا كۇتكەن، «قيالعا قانات ءبىتىرىپ، جاستىق كوكتەمدى جالىنداتۋ» اتىنداعى مۋزيكا ساۋىق كەشى التىن كۇننىڭ قىزارىپ ۇياسىنا قاراي باياۋ جىلجۋىمەن ورتالىق ۇلتتار ۋنيۆەرسيتەتى مۋزيكا زالىندا شىمىلدىعىن اشتى.

　　ۇلتتار ىنتىماعىن باستى مازمۇن ەتكەن بۇل مۋزيكا كەشىنىڭ ونەر كورسەتۋشىلەرى ـــ شيىنجياڭ ءان-ءبي ۇيىرمەسىنەن كەلگەن، مەملەكەتتىك ءتۇرلى جارىستاردا سان مارتە سيلىق ساحناسىنان ورىن الىپ، جوعارى ورەدەگى ءان ورىنداۋ شەبەرلىكتەرىمەن جۇرتىنا ءان-جىردان رۋحاني ازىق بەرىپ جۇرگەن قازاق، ۇيعۇر، قىرعىز ءۇش ۇلتتىڭ ارنا، الميراگۇل، ارزىگۇل قاتارلى ءانشى قىزدارى قۇلاقتان كىرىپ بويدى الار اندەرىمەن قالىڭ كورەرمەن قاۋىمدى تاڭداي قاقتىرىپ، ءالسىن-السىن شاپالاق سوقتىرىپ، تامساندىردى...

　　كەشكە قازاقستان ەۆر-ازيا ۇلتتىق ۋنيۆەرسيتەتى «وتىرار كىتاپحاناسى» عىلىمي زەرتتەۋ ورتالىعىنىڭ مەڭگەرۋشىسى، ايگىلى جازۋشى تۇرسىن جۇرتباي ۇلى، ورتالىق ۇلتتار ۋنيۆەرسيتەتىنىڭ پروفەسسورى مۇحتار ءابىلقاق ۇلى، بولاش شوكەي ۇلى باستاعان مۇعالىمدەر، بەيجيڭدە جۇمىس جاساپ جاتقان ءار سالاداعى قىزمەتتەگى جولداستار مەن وقۋشىلار بولىپ، جالپى ءۇش جۇزگە تارتا ادام قاتىناستى.

　　كونسەرت «اتا قونىستى كۇزەتكەن، ەستەن كەتپەس داۋرەن»، «قيالعا قانات ءبىتىرىپ، جاستىق كوكتەمدى جالىنداتۋ»، «بىرلىكتە گۇلدەنىپ، جۇڭگو ارمانىن كەمەلدەندىرۋ» سىندى ءۇش بولەكتە وتكىزىلدى.

　　كەشتىڭ شىمىلدىعى الميراگۇلدىڭ ورىنداۋىندا ۇيعۇر حالىق ءانى «ساعىنىشپەن» اشىلىپ، ارنانىڭ ورىنداۋىندا قازاق حالىق ءانى «مايرا»، «بالالىق »، قىرعىز حالىق ءانى «سەن قايداسىڭ»، «كوڭىلدى كۇندەر» سىندى قيىندىق دارەجەسى ءبىرشاما جوعارى اندەر ميكروفونسىز، ءتىرى داۋىسپەن ورىندالىپ، ءوز مارەسىن تاۋىپ، كورەرمەن قاۋىمنىڭ ايىزىن قاندىرسا، الميراگۇلدىڭ حانزۋشا، يسپانياشا جوعارى داۋىستا ورىنداعان «يسپانيا بويجەتكەنى»، ارزىگۇلدىڭ قىرعىزشا، قازاقشا ناقىشىنا كەلتىرىپ ورىنداعان«قارلىعاش» ءانى، ارنانىڭ تاتار، قازاق قوس تىلدە اۋەلەتىپ سالعان«ايروبۋ» ءانى قالىڭ كورەرمەندى تاڭعالدىرىپ، تاڭداي قاقتىرىپ، كەشكە كەلگەن كورەرمەن اي ءجۇزدى، سىمباتىنا ونەرى ساي كەلگەن كۇمىس كومەي ارۋ قىزدارىن گۇلمەن كومكەردى.

　　كەشتىڭ شىمىلدىعى ءانشى قىزداردىڭ «مەن جانە مەنىڭ وتانىم» ءانىن توپتىق ورىنداۋىندا ءوز مارەسىنە جەتىپ، ەكى مينۋتقا سوزىلعان ۇزاق شاپالاق ۇنىمەن جابىلىسا، «پا! نەتكەن جاقسى تاماشا كەش بولدى» دەپ، بارەكەلدى ايتقان جۇرتتىڭ ريزالىعى مەن ماداعى ءار اۋىزدان ەستىلىپ، سان جۇرەككە شابىت سيلاپ، قۇلاق تۇبىنەن قايتا جاڭعىرعان اسەم ءان اۋەنى استانا كوشەلەرىندە ءتۇن تۇنەگىنە سىڭىپ بارا جاتتى.

　　كەلۋ قاينارى: حالىق تورابى