كىتاپ تاراتۋ سالتى وتكىزىلدى

2014.08.18 12:41   كەلۋ قاينارى : حالىق تورابى

　　2014- جىلى 7- تامىز كۇنى تۇستەن كەيىن تولى اۋداندىق 1- ورتا مەكتەپ جىيىن زالىندا تولى اۋدانىنىڭ قازىنا سالاسىندا 40 جىلدان ارتىق قىزمەت اتقارعان تاڭداۋلى پارتيا مۇشەسى، تانىمالى بۇعالتىر قابىكەن بازاربەك ۇلى تۋرالى شىققان «قازىنادا قىرىق جىل»اتتى كىتاپتى تاراتۋ سالتى بولىپ ءوتتى.قابىكەن بازاربەك ۇلى 50- جىلداردا قىزمەتكە قاتىناسىپ60- جىلداردان باستاپ تولى اۋداندىق قازىنا مەكەمەسىندە تابانى كۇرەكتەي 40 نەشە جىل قىزمەت ىستەپ قۇرمەتپەن زەينەتكە شىعادى، قابەڭ قىزمەت ىستەگەن ءارى باسشىلىق اتقارعان سول جىلدار اۋدان ەكونوميكاسى تۇرالاعان، ءتىپتى مەملەكەت ەكونوميكاسى دا تىم شىركىناي ەمەس جىلدار بولسادا، ءوزىنىڭ قىزمەتكە ادالدىعى، مۇقياتتىلىعى، ايرىقشا جاۋاپكەرشىلىگىمەن اۋدان قازىناسىن شاشاۋ شىعارماي باسقارىپ ەل قۇرمەتىنە بولەنەدى، قابىكەن بازاربەك ۇلى ءوزىنىڭ قاراپايىم دا ىسكەر باسشى ەكەنىن تانىتىپ سول جىلداردا اۋدان قازىناسىن نە ءبىر قىيىن وتكەلدەردەن وتكىزىپ «امۋ داۋ جۇرمەيتىن شىندىق»دەگەننىڭ ناعىز بەينەسىن حالىققا تانىتا بىلەدى. ول كىسى وتكەن جىلى دۇنيەدەن وتكەنىمەن تۋعان حالقى ساعىنا ەسكە الىپ بۇرىننان بەرى قارت باسشى تۋرالى قۇرمەتتەپ جازىلعان ەسسە، ەستەلىكتەردى، ءارى قابەڭنىڭ تارباعاتاي ەكونوميكاسىن دامىتۋ ويلارى تۋرالى جازىلعان قوماقتى ەكونوميكالىق ەڭبەكتەرىن نەگىز ەتكەن وسى «قازىنادا قىرىق جىل»اتتى كىتاپتى باسپادان شىعارىپ، مارقۇمنىڭ قايتىس بولعاندىعىنا ءبىر جىل تولۋ بايلانىسىمەن ەسكە الىپ عىلمي تالقى جىيىنىن اشىپ، كىتاپ تاراتۋ سالتىن وتكىزدى.كىتاپ تاراتۋ سالتىنا تارباعاتاي ايماقتىق حالىق قۇرىلتايى قىزمەت كوميتەتىنىڭ بۇرىنعى ورىنباسار مەڭگەرۋشىسى عاريپوللا ءسادەن ۇلى، تولى اۋداندىق پارتكومنىڭ ورىنباسار سەكىراتارى، اۋدان اكىمى جالىن توقتاعازى ۇلى، تولى اۋداندىق ۇكىمەتتىڭ ورىنباسار اكىمى ماقسات جالەلقان ۇلى قاتارلى باسشىلار مەن مارقۇمنىڭ الىس- جاقىننان كەلگەن تۋعان تۋىستارى، ساپتاستارى، اقىن-جازۋشىلار، قازىنا سالاسىنداعى بارلىق قىزمەتشىلەر قاتىناستى. عاريپوللا سادەن ۇلى، اۋدان اكىمى جالىن قاتارلى جولداستار ارناۋلى ەسسەلەر وقىدى. كىتاپ تاراتۋ سالتىن تولى اۋداندىق پارتكوم ءۇگىت بولىمىنىڭ باستىعى گۇلناز قاسىمحان قىزى باسقاردى.

　　كەلۋ قاينارى: حالىق تورابى

　　ەرىكتى ءتىلشى: عادىلەت داكەنوۆ

　　قىزمەت ورنى: تولى اۋداندىق پارتكوم ءۇگىت بولىمى