كوكتوعايدا التىن نەكە جانە جاڭا شاڭىراق كوتەرۋ تويى وتكىزىلدى

2015.01.08 14:42  

　　حالىق تورابى، 8 – قاڭتار، بەيجيڭ. التاي اقپارات تورابىنىڭ حابارلاۋىنشا، كوكتوعاي اۋداندىق ايەلدەر بىرلەستىگى مەن تۇرعىن اۋىلى جانە حالىق ىستەرى مەكەمەسى بىرلىكتە ۇيىمداستىرعان التىن نەكە جانە شاڭىراق كوتەرۋ تويى 2 – قاڭتاردا تۇرعىن اۋىلىندا سالتاناتتى وتكىزىلدى، ءار اۋىلدان تويعا كەلگەن 4000نان استام ادام توعىز جۇپ جاستىڭ شاڭىراق كوتەرۋدەي باقىتتى ساتىنە جانە 9 جۇپ قارتتىڭ التىن نەكەسىنە كۋا بولدى.

　　توي باستالا شالقىعان «شاشۋ» انىمەن جۇرت الدىنا 9 جۇپ قارت شىقتى، اۋداندىق حالىق قۇرىلتايى تۇراقتى كوميتەتىنىڭ مەڭگەرۋشىسى سىمايىل ءسوز سويلەپ، التىن نەكەلى قارتتارعا ساۋعا سيلادى. التىن نەكەلى قارتتاردىڭ اتىنان ءسوز كەزەگىن العان قاھارمان قاريا: جاس كەزىمىزدە مۇنداي شارت – جاعداي بولعان جوق، نەكە كۋالىگىن الىپ، توي ءتاتتىسىن تاراتساق توي جاساعان ەسەپتەلەتىن، بۇگىن اۋدانىمىز التىن نەكەمىزدى تويلاپ، توي سۋرەتىنە دە ءتۇسىردى، كوپشىلىككە راحىمەت، جاستار قازىرگى تۇرمىستى قادىرلەپ، ءبىر – بىرىنە ماڭگى باقي سەرىك بولسىن»، - دەپ شەشىلە سويلەدى.

　　8 جۇپ جاس ات شاناعا وتىرىپ «جار – جار» ءانى ىشىندە ساحنا الدىنا كەلدى، دوس – جاراندارى، تۋىس – تۋعاندارى مەن الىستان كەلگەن مەيماندار دۋ قول سوعىپ تىلەكتەرىن جاۋدىردى. اق سامايلى انالار شاشۋ شاشىپ، اق ساقالدى اتالار باتاسىن بەردى، جاستار جۇرت الدىندا سەرت بايلاسىپ، شاڭىراق سىندى كيەلى ۇعىمنىڭ شاراپاتىن جاستار جۇرەگىنە ۇيالاتقانداي بولدى.

　　كەلۋ قاينارى: حالىق تورابى