قىسقى قىزىل تال

( فوتو شالقىما)  

باقىتبەك ءجۇمادىل ۇلى 

2016.01.22 13:59   كەلۋ قاينارى : حالىق تورابى

　　اياز قىسقان قىس كۇندەرى وزەن اڭعارىندا القىزىلدانا ءبورتىپ، بۇرشىك جارعانداي بولىپ تۇرعان توپ - توپ قىزىل تال نازارىمدى بولە بەردى.

　　بەتكەيىنىڭ ءبارى جاسىل ءتۇسىن ءارقاشان وزگەرتپەي تۇراتىن قايسار قاراعايمەن، اندىز - اندىز قىزىل قايىڭ، موسقال قارا تەرەكتەرمەن كومكەرىلگەن وسى سىرلى دا سۇلۋ تاۋ قويناۋىنداعى جاس ءورىم قىزىل تالدار بىردە جاسىل قاراعايلاردىڭ ەتەگىنە باسىلعان القىزىل گۇل ورنەكتەرىندەي كورىنسە، كەي جەرلەرى قالىڭ توپ، جەلبىرەگەن قىزىل لەنتالاردى بۇلعاپ ءوزىڭدى قارسى الىپ تۇرعانداي سەزىلەدى.

　　قالاي تۇسپالداساڭ دا، ايتەۋ وسى اڭعارداعى ورمان جيەكتەرىندەگى، كوك وزەن جاعاسىنداعى نارت قىزىل تالدار اشاڭ تارتقان، سۇڭعاق بويلى، القىزىل ءجۇزدى ارۋ سياقتانىپ، ءار كىمدى ەرىكسىز مويىن بۇرعىزاتىنىنا تالاس جۇرمەيتىنىن سول اراعا بارساڭىز عانا انىق سەزىنەسىز.

　　كوركەم فوتو تۋىندى جاسامپازدىعىمەن اينالىسۋ شىنايى قۇلشىنىسپەن كىرىسكەن ادامعا ۇلى جاراتىلىستىڭ ءار قۇبىلىسىنا، ءتىپتى تۇتاس تىرشىلىككە اسا ىجداعاتتى سۇيىسپەنشىلىكپەن نازار سالۋدى ۇيرەتەدى. فوتوگرافتا ۇلى جاراتىلىسقا دەگەن شىنايى ءسۇيىنىشتى جۇرەك سەزىمى بولعاندا عانا، ونىڭ جاسامپازدىق شابىتى ۇلى تابيعاتتىڭ ەڭ كوركەم تۇرعىسىمەن قاۋىشىپ، باسقالار بايقاي الماعان تاماشا تۋىندىلارى تولاسسىز ءوربيدى.

　　مەن كورگەن بۇل قىسقى قىزىل تال الىستا ەمەس. «باسى كۇنەس ىلەنىڭ...» دەگەندەي، ىلە اڭعارىنىڭ باسى بولىپ كەلەتىن كۇنەستەگى، نارات ساحاراسىنىڭ سارشوقى كورىنىس وڭىرىمەن قويتاس جايلاۋى ارالىعىنداعى باس - اياعى ەكى - ءۇش ءجۇز شاقىرىم، جاسىل قاراعايىنا قارا تەرەك، قايىڭى ارالاسقان جىنىس ورماندى قويناۋداعى، كۇنەس وزەنىنىڭ ەكى جاعالاۋىندا سامسىپ، كوزگە وتتاي باسىلادى.

　　بۇل جەردە قىس كۇندەرى وزەن ارناسىن كوك مۇز كەرنەپ، قىراتتارى قالىڭ قار جامىلىپ جاتسا، جاعاداعى جاسامىس تالدىڭ باسى الاۋلاپ، قىزارىپ تۇرعانىن كورگەن ادامنىڭ ويىندا الۋان ءتۇرلى سۇراقتار تۋار. ءبىز ەڭ اۋەلى وسى وڭىردىڭ كليمات ەرەكشەلىگىنە زەر سالساق: قىس ماۋسىمىندا، وسى اڭعاردىڭ شىعىس باسىنداعى ۇلان اسىر جازىق ــ بايىنبۇلاق ساحاراسىنان ويىسقان سۋىق اعىس تەرىستىكتەگى بولەكنۇر تاۋ سىلەمىنىڭ كۇنگەي بەتىندەگى جىلى اۋانى باتىسقا ىعىستىرىپ، كۇنەس باسىنداعى «جەلدى كەزەڭنەن» قۇلداتىپ، وسى اڭعارعا ايداپ اكەلىپ، وزەن بويىنداعى قىزىل تالداردى جىلى لەپپەن اپتاپ، ايازعا جىبەرمەي تۇرسا، ودان قۇلداپ اڭعار اۋزىنا شىققاندا ناراتتىڭ باسىنان گۋلەي سوعاتىن، ءالميساقتان ەل - جۇرت «التىن كۇرەك» دەپ اتاپ كەتكەن ماۋسىمدىق جەلدى قالىپتاستىراتىن كورىنەدى. بۇل تۇسپالىمىزدىڭ عىلمي نەگىزىن كەسەتە المايمىز، ءبىراق «حالىق ايتسا قالت ايتپايدى» دەگەندەي، سارشوقى باۋرايىن قىستاپ، جەلدى كەزەڭگە دەيىنگى كەڭ جايلاۋدى مالىنا ءورىس ەتىپ كەلگەن، وسى اڭعاردا عاسىرعا تاياۋ جاساعان ءبىر كاريانىڭ «التىن كۇرەك» تۋرالى شەرتكەن اڭگىمەسىنەن دالەل تاۋىپ ايتىپ وتىرمىز.

　　مەيلى قالاي بولسا دا، وسى اڭعاردىڭ باسىنان اياعىنا دەيىنگى كوكتەمنىڭ شۋاقتى كۇندەرى كەلىسىمەن القىزىل ءتۇسىن وزگەرتىپ، ەرتە باس جارىپ، سامال جەلمەن تەربەلە جايقالاتىن جاسامىس تالدىڭ وسى كوركى، قىسقى ساياحات شارۋاشىلىعى وركەندەپ كەلە جاتقان بۇگىنگى كۇنى اق قار قىمتاعان قويناۋداعى كوز تارتىپ كوڭىل بۇرارلىق باسقاشا ءبىر اسەم كورىنىس ەكەنى فوتوگرافتار ەمەس جاي كوزگە دە ايتقىزباي مەن مۇندالايدى. سۋرەتتەردى تۇسىرگەن باقىتبەك ءجۇمادىل ۇلى

　　كەلۋ قاينارى: حالىق تورابى