از ۇلتتاردىڭ 5 – رەتكى مەملەكەتتىك ادەبيەت – كوركەمونەر بايقاۋىنىڭ اشىلۋ سالتىنا ازىرلەنگەن ادەبيەت – كوركەمونەر ساۋىق كەشى بەيجيڭدە وتكىزىلدى

2016.08.19 15:32   كەلۋ قاينارى : حالىق تورابى

　　«حالىق گازەتى»، 18 – تامىز، بەيجيڭ (ءتىلشى پىڭ بو). جۇڭحۋا ۇلتتارى ءبىر ءۇيلى جانداي ىنتىماقتاسىپ، ءبىر نيەت، ءبىر تىلەكپەن جۇڭگو ارمانىن ىسكە اسىرادى. از ۇلتتاردىڭ 5 – رەتكى مەملەكەتتىك ادەبيەت – كوركەمونەر بايقاۋىنىڭ اشىلۋ سالتىنا ازىرلەنگەن ادەبيەت – كوركەمونەر ساۋىق كەشى 18 – تامىز كەشتە بەيجيڭدەگى حالىق سارايىندا سالتاناتپەن وتكىزىلدى. پارتيا مەن مەملەكەت باسشىلارىنان شي جينپيڭ، لي كىچياڭ، يۇي جىڭشىڭ، ليۋ يۇنشان قاتارلىلار 3 مىڭنان استام اداممەن بىرگە ساۋىق كەشىن تاماشالادى.

　　ساعات 20 مولشەرىندە شي جينپيڭ قاتارلىلار ساۋىق كەشى وتكىزىلەتىن الاڭعا كەلگەندە، تۇتاس الاڭدا قىزۋ قول شاپالاق ءۇنى كوتەرىلدى. «جۇڭحۋا ۇلتتارى ءبىر ءۇيلى جانداي» دەگەن تارتىمدى ءان – ءبي نومىرىمەن «ءبىر نيەت، ءبىر تىلەكپەن جۇڭگو ارمانىن ىسكە اسىرايىق» نەگىزگى تاقىرىبىنداعى ادەبيەت – كوركەمونەر ساۋىق كەشى باستالدى. جالپى ساۋىق كەشى «ىنتىماق ءبولىمى»، «دامۋ ءبولىمى»، «ارمان ءبولىمى» سىندى 3 بولەكتەن قۇرالعان، ارتيستەردىڭ قىزۋ ىنتامەن ورىنداعان نومىرلەرى ءار ۇلت حالقىنىڭ باي مازمۇندى مادەنيەتىن، جۇڭحۋا ۇلتتارىنىڭ ادەبيەت – كوركەمونەردەگى جالپى جارىس ءۇن قاتۋ دەيتىن ومىرشەڭدىك قۋاتىن ايگىلەدى. ءان – ءبي «تاۋداي بيىك، تەڭىزدەي تەرەڭ تۋىسقاندىق مەيىر»، ءان – ءبي «تۇلپاردىڭ ورالۋى»، توپتىق ءبي «مەرەكە كيىمى»، كورىنىستى ءان – ءبي «ءۇمىت، قايدا جول تارتتىڭ» ... مىنە، وسىنداي بەينەلەۋ فورماسى الۋان ءتۇرلى بولىپ كەلگەن كونسەرت نومىرلەرى ءار ۇلت پەرزەنتتەرىنىڭ پارتيانىڭ باسشىلىعىندا ىنتىماقتاسىپ، باقىتتى تۇرمىس كەشىرىپ وتىرعانىن جىرعا قوستى، ولاردىڭ ۇلى وتانعا دەگەن پاك ماحابباتىن تولىق بەينەلەدى. جالپى ساۋىق كەشىنىڭ ۇلتتىق ەرەكشەلىگى قويۋ، داۋىرلىك ءتۇسى ايقىن بولىپ، پارتيا 18 – قۇرىلتايىنان بەرى ءار ۇلت بۇقاراسىنىڭ شي جينپيڭ جولداس باس شۋجي بولعان پارتيا ورتالىق كوميتەتىنىڭ ايرىقشا ءمان بەرۋى مەن شىنايى قامقورلىعىندا جۇدىرىقتاي جۇمىلىپ، ءبىر نيەت، ءبىر تىلەكتە بولىپ، ءوزارا قارايلاسىپ، كوركەم بولاشاق جاراتۋداعى بەرىك سەنىمىن وبرازدى بەينەلەدى، تۇتاس الاڭدا اۋىق – اۋىق قىزۋ قول شاپالاق ءۇنى كوتەرىلىپ تۇردى. ەڭ سوڭىندا «ءبىر نيەت، ءبىر تىلەكپەن جۇڭگو ارمانىن ىسكە اسىرايىق» دەگەن اسەرلى مۋزىكانىڭ سۇيەمەلدەۋىندەگى ءار ۇلت ارتيستەرىنىڭ جالىندى بيلەرىمەن ساۋىق كەشىنىڭ شىمىلدىعى جابىلدى.

　　كەلۋ قاينارى: حالىق تورابى