اقساي اۋدانىنىڭ 14-كەزەكتى اقىندار ايتىسى سالتاناتتى وتكىزىلدى

2017.07.05 16:18   كەلۋ قاينارى : حالىق تورابى

تورەبەك پەن جاينانىڭ جەكپە-جەك جىر دوداسىنان كورىنىس

　　مارالبەك ابدىكارىم ۇلى حابارلايدى. قويناۋى قۇتقا تولعان، سايىن دالاسىندا قوڭىر اڭدارى ورگەن قۇتتى مەكەن اقساي اۋدانىندا تاعى ءبىر ولەڭ-جىر شاشۋى جاقىندا عانا شىمدىلعىن اشتى.

　　اقساي قازاق اۆتونوميالى اۋدانىنىڭ 14-كەزەكتى اقىندار ايتىسى اقشي اۋىلدىعىنىڭ ۇيىمداستىرۋىندا 26-ماۋسىم كۇنى سالتاناتتى وتكىزىلدى. اۋدان باسشىلارى مەن الىس –جاقىننان كەلگەن قوناقتار، ساياحاتشىلار بولىپ 1000 عا تارتا كورەرمەن الامان ايتىستى تاماشالادى. بۇل رەتكى ايتىس بارىسندا اقشي اۋىلدىعى اقىنداردىڭ جەكپە-جەك ايتىسىن باستى مازمۇن ەتۋدەن سىرت، قازاق حالىق اندەرى جارىسىن، تەرمە جارىسىن، قازاق ءداستۇرلى حالىق ءبي جارىسىن وزدىرىپ، جالپى كورەرمەندەردىڭ جاقسى باعاسىن الدى.

　　جىر دوداسىنا جينالعان جۇرت لەك-لەك شاپالاق ۇنىمەن ولەڭ تويىن قىزدىرا ءتۇستى. اسىرەسە اقىن تورەبەك پەن جاينانىڭ ايتىسى الاڭداعى بارلىق كورەرمەنىن كۇلكىگە بولەسە، اناۋ ءداستۇرلى حالىق ءبيى ايۋ ءبيىىن بيلەگەن ازاماتتىڭ جاعىمدى ارەكەتى كورەرمەنىن ءتىپتى دە شاتتاندىرا ءتۇستى. سونىمەن اقىنداردىڭ جىر سايىسىندا تورەبەك داۋكەي ۇلى 1-دارەجەلى جۇلدەنى قانجىعاسىنا بايلانسا، جاينا مەن نۇرگۇل 2-دارەجەلى جۇلدەنى جەڭىپ الدى؛ ال تەرمە جارىسىندا جارقىن ءالاپاق قىزى 1-دارەجەنى قانجىعاسىنا بايلاندى؛ ءداستۇرلى حالىق ءبي جارىسىندا كۇلىمجان قايىربەك قىزى 1-دارەجەلى جۇلدەنى جەڭىپ الدى؛ حالىق اندەر جارىسىندا ءمارۇينا بولات قىزى 1-دارەجەلى جۇلدەنى قانجىعاسىنا بايلانعان ەدى.

　　ۇعىسۋعا قاراعاندا بۇل رەتكى ايتىستا جۇلدەلى بولعان اقىندار مەن ونەرپازدار ۇستەگى جىلى تامىز ايىنىڭ 12-جۇلدىزىندا اقساي اۋدانىندا وتكىزىلەتىن بۇكىل ەلىمىزدەگى ءۇش قازاق اۆتونوميالى اۋداندارىنىڭ 5-كەزەكتى ايتىسىنا قاتىناسادى ەكەن.

　　سۋرەتتەرىن ماقان قاپاس ۇلى تۇسىرگەن.

　　كەلۋ قاينارى: حالىق تورابى