كوكتوعاي اۋدانى قاراجول قىستاعىندا قاسقىر ادام مەن مالعا شاۋىپ، 6 ادامدى جارالادى

2014.08.14 13:46   كەلۋ قاينارى : حالىق تورابى

　　حالىق تورابى (ەرىكتى ءتىلشى نۇرشات حابارلايدى). 11 – تامىز كۇنى تۇنگى ساعات 2دەن ساعات 4كە دەيىن شينجياڭ كوكتوعاي اۋدانى قارابۇلعىن اۋىلى قاراجول قىستاعىندا ادام مەن مالعا قاسقىر شاپتى. اۋىلدىق ۇكىمەت پەن ساقشى بولىمشەسى ادام جىبەرىپ، بۇقارانىڭ ءومىرى مەن مال – مۇلكىن كۇش سالا قورعادى.

　　11 – تامىز تۇنگى ساعات 2 اينالاسىندا قارابۇلعىن اۋىلدىق ساقشى مەكەمەسى قاراجول قىستاعى تۇرعىندارىنىڭ ساقشىعا مالىمدەۋ تەلەفونىن قابىلدايدى: اتالعان قىستاقتا قاسقىر ادامعا شاۋىپ، ءبىر ادام اۋىر جارالانعان. مالىمدەۋدى تاپسىرىپ العاننان كەيىن ساقشى بولىمشەسى حالىق ساقشىلارىن دەرەۋ ۇيىمداستىرىپ، قاراجول قىستاعىنا جىبەرگەن. قاسقىردىڭ شابۋىلىنا ۇشىراعان جيڭ ۋانفۋ اتتى قىستاق تۇرعىنىنىڭ وتباسىنا بارعاندا، ساقشىلار جەردەگى قان داقتارىن، قاسقىرمەن الىسقان كەزدە قالعان ىزدەردى كورگەن، جيڭ ۋانفۋدىڭ ايەلىنىڭ موينىن قاسقىر اۋىر جارالاعان. قاسقىردىڭ شابۋىلىنا ۇشىراعان ما گولياڭ اتتى قىستاق تۇرعىنىنىڭ ۇيىنە بارعان حالىق ساقشىلارى قىستاق تۇرعىندارىنىڭ قاسقىرلارمەن شايقاسۋ بارىسىندا ءبىر قاسقىردى ولتىرگەنىن كورگەن. العاشقى ساناققا قاراعاندا، بۇل جولى 4 ~ 5 قاسقىر اۋىلداعى 5 وتباسىنا شابۋىلداپ، 6 ادامدى جارالاعان، مۇندا ءبىر ادامنىڭ جاراقاتى اۋىر بولعاندىقتان، اۆتونوميالى رايوندىق شيپاحاناعا جوتكەلىپ ەمدەلگەن. ەكى وتباسىنىڭ ءۇي قۇستارى مەن تۇلىكتەرىن قاسقىر تىستەپ جارالاعان نەمەسە تاماقتاپ كەتكەن.

　　قارابۇلعىن اۋىلدىق پارتكوم مەن ۇكىمەت بۇل جاعدايدى اۋداندىق پارتكوم مەن ۇكىمەتكە مالىمدەگەن ءارى قاتىستى تاراۋلاردىڭ رۇحساتىن العاننان كەيىن، ساراپتاۋ ارقىلى، اۋىلدىق پارتكوم مەن ۇكىمەت جانە ساقشى بولىمشەسى حالىق ساقشىلارى مەن كادرلاردان ۇيىمداسقان قاسقىر اۋلاۋ گرۋپپاسىن قۇرىپ، ادامداردىڭ ومىرىنە، تۇلىكتەرىنە جانە ءۇي قۇستارىنا حاۋىپ توندىرگەن قاسقىرلاردى اۋلاۋعا جىبەرگەن، 11 – تامىز كۇنى تاڭ ءسارى ساعات 7دە قاسقىرلار بايقالعان وڭىردە شارلاۋ جانە ساقتىق شارالارىن اتقارعان، قاسقىرلاردى قۋالاعان جانە اۋلاعان. سونىمەن بىرگە، ۇگىت اترەتىنەن 8 اترەت قۇرىپ، اۋىلدىق پارتكوم مەن ۇكىمەت باسشىلارى جەتەكشى بولىپ، سول ماڭداعى قىستاقتارعا بارىپ، بۇقاراعا ۇگىت قىزمەتىن جۇرگىزگەن ءارى قىستاق تۇرعىندارىنا قاسقىردىڭ ادامدى جارالاعانىن ايتىپ، ولارعا اتىزدا ەڭبەك ىستەۋ بارىسىندا اباي بولۋدى، قورعانۋ قۇرالدارىن الا ءجۇرۋدى، قاسقىر بايقالسا دەرەۋ ساقشىعا مالىمدەۋدى، ءتورت تۇلىككە جاقسى قاراۋدى، تاعى دا كۇتپەگەن جاعدايدىڭ تۋىلۋىنان ساقتانۋدى ەسكەرتكەن.

　　كەلۋ قاينارى: حالىق تورابى

　　ءۇنحات تەكشەمىزگە قوسىلىڭىز:

　　http://kazakh.people.com.cn/168684/15441604.html