دۇنيە جۇزىلىك باسقارۋ جۇيەسىنىڭ جاڭالانۋى مەن كەمەلدەنۋىنە جۇڭگو جوباسىن ازىرلەدى (قۋاتتى ەل قۇرۋ جولىندا ەكپىندەي ىلگەرىلەپ، جاڭا جورىققا ارشىندى قادام تاستاۋ)

قازىر دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى بۇرىن بولماعان تاسىلمەن ورىستەتىلۋدە. قات - قابات دۇنيە جۇزىلىك سىن - سايىس الدىندا، جەكە دارا كۇرەس جۇرگىزۋگە بولمايدى، ءسوز جوق، دۇنيە جۇزىلىك ارەكەت ورىستەتۋ، دۇنيە ءجۇزى بولىپ توتەپ بەرۋ، دۇنيە جۇزىلىك سەلبەستىك ورىستەتۋ كەرەك.

75 جىلدىق بوران - شاشىندا جۇڭگونىڭ ديپلوماتياسى باستان - اياق ادامزاتتىڭ العا باسۋىن، دۇنيە ءجۇزىنىڭ ۇلى بىرلىگىن كوزدەۋدى مۇرات ەتتى. جاڭا داۋىردەن بەرى جۇڭگو بىرگە اقىلداسۋ، بىرگە قۇرۋ، بىرگە يگىلىكتەنۋ سىندى دۇنيە جۇزىلىك باسقارۋ كوزقاراسىن امالياتتا ايگىلەپ، دۇنيە جۇزىلىك باسقارۋ جۇيەسىنىڭ وزگەرىپ كەمەلدەنۋىنە جوبا ازىرلەپ، قوزعاۋشى كۇش قوسىپ، حالىقارالىق قوعاممەن قول ۇستاسىپ سىن - سايىستى بىرگە قارسى الىپ، بولاشاقتى بىرگە جاراتىپ، ادامزاتتىڭ تاعدىرلاس ورتاق تۇلعاسىن قۇرۋدىڭ نۇرلى نىساناسىنا قاراي ۇزدىكسىز قادام تاستادى.

دۇنيە ءجۇزىن كوكەيدە ساقتاپ، سىن - سايىسقا توتەپ بەرۋدىڭ كەڭ كولەمدى ورتاق تانىمىن ۇيىستىردى

2013 - جىلى 3 - ايدا ءتوراعا شي جينپيڭ ماسكەۋ حالىقارالىق قارىم - قاتىناس شۋەيۋانىندا ماڭىزدى لەكسيا جاساپ، ادامزاتتىڭ تاعدىرلاس ورتاق تۇلعاسىن قۇرۋ ماڭىزدى ۇستانىمىن تۇڭعىش رەت العا قويدى. لەكسيا مايدانىنداعى اۋدارماشى رەتىندە ماسكەۋ حالىقارالىق قارىم - قاتىناس شۋەيۋانىنىڭ پروفەسسورى الەكسەي الەكساشين وسى تاريحي ساتكە كۋا بولدى.

ءتوراعا شي جينپيڭ جاريالاعان «ءداۋىردىڭ العا باسۋ اعىمىنا ۇيلەسىپ، دۇنيە ءجۇزىنىڭ بەيبىت دامۋىن جەبەيىك» دەگەن تاقىرىپتا سويلەگەن ءسوزى الەكساشيننىڭ ساباق وتكەن كەزدە ۇنەمى تىلگە الاتىن لەكسياسىنا اينالىپ، وقۋشىلارعا دۇنيە ءجۇزىنىڭ بولاشاعى جونىنەن وي سالاتىن بولدى.

”دۇنيە ءجۇزىنىڭ ۇزاق بولاشاقتىق دامۋىنا تەرەڭ ىقپالى بار وسى لەكسيانى مەن ماڭگى ۇمىتپايمىن“. الەكساشين بىلاي دەدى: 10 نەشە جىلدان بەرگى اماليات ادامزاتتىڭ تاعدىرلاس ورتاق تۇلعاسىن قۇرۋ ۇستانىمى ادامزاتتىڭ ورتاق ىرىس - قۇتىن بەينەلەپ، دۇنيە ءجۇزىنىڭ بەيبىت دامۋىن قورعاۋعا، ادامزات وركەنيەتىنىڭ العا باسۋىن ىلگەرىلەتۋگە ايقىن باعدار كورسەتكەندىگىن ايگىلەدى.

ءداۋىردىڭ سىن - سايىسىنا بەتپە - بەت كەلىپ، دۇنيە ءجۇزىنىڭ سۇراۋىنا جاۋاپ بەردى، بۇل − جۇڭگونىڭ دايەكتى جاۋاپكەرشىلىگى. بەيبىت قاتار تۇرۋدى ەڭ الدىمەن دارىپتەۋدەن دۇنيە ءجۇزىنىڭ كوپ ۇيەكتەنۋىن، حالىقارالىق قاتىناستىڭ دەموكراتيالانۋىن باتىل دارىپتەۋگە، ونان ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن العا قويۋعا دەيىن، جۇڭگو دۇنيە جۇزىلىك باسقارۋدى كەمەلدەندىرۋگە بەلسەنە اقىل - پاراسات قوستى.

بيىل 7 - ايدا دۇنيە ءجۇزىنىڭ دامۋدان بىرگە يگىلىكتەنۋ ارەكەتى تالقى مىنبەرىنىڭ 2 - كەزەكتى جوعارى دارەجەلىلەر ءماجىلىسى بەيجيڭدە وتكىزىلدى. ءماجىلىس كەزىندە تىكە تاراتىلعان وزگەشە ەلەكتروندى ساۋدا جۇرت نازارىن اۋداردى. جاسىل ءمۇيىس، پاكيستان، تايلاند سياقتى كوپ ەلدىڭ ۋاكىلدەرى دۇنيە جۇزىلىك دامۋ سيفرلى ەكونوميكا ەلەكتروندى ساۋداسى تىكە تاراتۋ بولمەسىنە كىرىپ، ءوز ەلدەرىنىڭ ەرەكشە ونىمدەرى مەن مادەنيەت، ساياحات نىساندارىن تانىستىردى. تىكە تاراتۋ 12 ساعاتقا جالعاسىپ، ەرەكشەلىككە يە 60 نەشە ءتۇرلى تاۋاردى تانىستىرىپ، جالپى 33 ميلليوننان استام ادام - رەت كورىلدى.

جاسىل ءمۇيىس ارالدارى ديپلوماتيا جانە سەلبەستىك مەملەكەت ىستەرى حاتشىسى ۆيەلا بىلاي دەدى: ماجىلىسكە قاتىناسقان ءار ەل ۋاكىلدەرىنىڭ سىن - سايىستى بىرگە قارسى الىپ، قول ۇستاسا بىرگە العا باسۋ بەكىمى ادامعا تەرەڭ اسەر قالدىرادى، دۇنيە جۇزىلىك دامۋ باستاماسى حالىقارالىق سەلبەستىكتى ىلگەرىلەتۋدە، باياندى دامۋدى جۇزەگە اسىرۋدا ماڭىزدى مانگە يە.

جاڭا داۋىردەن بەرى ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى ارەكەت بەتالىسى ەتكەن جۇڭگو ”ءبىر بەلدەۋ، ءبىر جولدى“ بىرگە قۇرۋ باستاماسى، دۇنيە جۇزىلىك دامۋ باستاماسى، دۇنيە جۇزىلىك حاۋىپسىزدىك باستاماسى، دۇنيە جۇزىلىك وركەنيەت باستاماسى سياقتىلاردى ىلگەرىندى - كەيىندى العا قويىپ، ءداۋىردىڭ سىن - سايىسىنا توتەپ بەرۋ ءۇشىن كەڭ كولەمدى ورتاق تانىم ۇيىستىرىپ، سەلبەستىك تۇعىرىن ازىرلەدى.

جۇڭگونىڭ باستاماسى ءداۋىر اعىمىنا سايكەسىپ، ءار ەلدىڭ سۇرانىسىنا ۇيلەستى، سەلبەستىكتىڭ سۇبەلى تابىستارى ۇزدىكسىز جارىققا شىقتى. ”ءبىر بەلدەۋ، ءبىر جول“ سەلبەستىگى ازيا - ەۆروپا قۇرلىعىنان افريكا مەن لاتىن امەريكاسىنا دەيىن كەڭەيدى، 150 دەن استام مەملەكەت، 30 دان استام حالىقارالىق ۇيىم بىرگە قۇرۋ سەلبەستىك قۇجاتىنا قول قويدى؛ دۇنيە جۇزىلىك دامۋ باستاماسى جۇلگەسىندە 1100 دەن استام نىسان ورىستەتىلىپ، دۇنيە جۇزىلىك دامۋ نىسان قامباسى 600 دەن استام نىساندى اتقاردى؛ دۇنيە جۇزىلىك حاۋىپسىزدىك باستاماسىن زەرتتەۋ ورتالىعى بيىل 7 - ايدا قۇرىلىپ، 20 ءتۇيىندى سەلبەستىك بەتالىسىندا ناقتى ناتيجەگە قول جەتكىزۋ تۋرالى باستاما كوتەردى؛ دۇنيە جۇزىلىك وركەنيەتتەر تىلدەسۋ، سەلبەستىك جاساۋ تورىن قۇرۋ ۇزدىكسىز ىلگەرىلەتىلدى، حالىقارالىق گۋمانيتارلىق اۋىس - كۇيىس، سەلبەستىك ۇزدىكسىز كۇشەيدى...

فرانسيانىڭ بۇرىنعى زۇڭليى لافاران مىنانى ءبىلدىردى: قازىرگى دۇنيە ءجۇزىن باسقارۋ كەدەرگىگە ۇشىراعان، ونىڭ ۇستىنە تەپە - تەڭدىك ۇنەمى بۇزىلعان جاعدايدا، جۇڭگونىڭ جاڭا وي جەلىسى مەن باستامانى العا قويۋعا كۇش سالۋى دۇرىس، وسىلاي بولعاندا سەلبەستىك كوبىرەك، ۋشىققان جاعداي ازىراق بولادى.

جاۋاپكەرشىلىكتى ادا ەتىپ، كوپ جاقتىلىقتى امالياتتا ايگىلەۋدى باتىل قورعادى

9 – ايدىڭ 23 – كۇنى ەكى كۇنگە جالعاسقان بىرلەسكەن مەملەكەتتەر ۇيىمىنىڭ بولاشاق باسشىلار ءماجىلىسى جابىلدى. ءماجىلىس دۇنيە ءجۇزىنىڭ بولاشاق دامۋ جوباسىن جاساعان «بولاشاق كەلىسىمىن» ماقۇلدادى، مۇنداعى ماقسات − حالىقارالىق باسقارۋ جۇيەسىنە رەفورما جاساپ، كوپ جاقتىلىقتى گۇلدەندىرىپ، دۇنيە ءجۇزى ءدوپ كەلگەن كوپتەگەن سىن - سايىسقا ءتىپتى جاقسى توتەپ بەرۋ.

دۇنيە ءجۇزى سونشاما ۇلكەن، ماسەلە سونشاما كوپ، كوپ جاقتىلىقتى قورعاۋ جانە امالياتتا ايگىلەۋ عانا ماسەلەنى شەشۋدىڭ شىعار جولى. بىرلەسكەن مەملەكەتتەر ۇيىمىن قۇرۋشى مۇشە ەل جانە حاۋىپسىزدىك القالار كەڭەسىنىڭ تۇراقتى القا ەلى رەتىندە جۇڭگو باستان - اياق كوپ جاقتىلىقتى قورعاۋدىڭ ماڭىزدى كۇشى بولىپ كەلەدى. جۇڭگو ۇكىمەتتەر ارا حالىقارالىق ۇيىمدارعا دەرلىك قاتىناسىپ، 600 دەن استام حالىقارالىق شارتقا قاتىناستى، بىرلەسكەن مەملەكەتتەر ۇيىمىنىڭ ۇيىم قاراجاتىن تاپسىرۋداعى جانە بەيبىتشىلىكتى قورعاۋ ءۇشىن اقشا بولۋدەگى ەكىنشى ۇلكەن ەل.

زامبيانىڭ بۇرىنعى سىرتقى ىستەر مينيسترى فۋنون مۋانگا مىنانى ءبىلدىردى: جۇڭحۋا حالىق رەسپۋبليكاسىنىڭ بىرلەسكەن مەملەكەتتەر ۇيىمىنداعى زاڭدى ورنىن قالپىنا كەلتىرۋگە قولداۋ كورسەتۋ زامبيانىڭ بىرلەسكەن مەملەكەتتەر ۇيىمىنداعى تۇراقتى ۋاكىلى بولعان كەزىمدە قاتىناسقان ەڭ ماڭىزدى حالىقارالىق ءىرى ءىس بولدى. تاريح مۇنىڭ توتەنشە دۇرىس شەشىم ەكەندىگىن دالەلدەدى، جۇڭگو حالىقارالىق ساحنادا ماڭىزدى رول اتقارۋدا.

2015 - جىلى 9 - ايدا ءتوراعا شي جينپيڭ بىرلەسكەن مەملەكەتتەر ۇيىمىنىڭ 70 - كەزەكتى جينالىسىنىڭ جاي تالقىسىنا قاتىناسقاندا ءارى ماڭىزدى ءسوز سويلەگەندە جۇڭگو - بىرلەسكەن مەملەكەتتەر ۇيىمى بەيبىتشىلىك جانە دامۋ قورىن قۇراتىندىعىن سالتاناتپەن جاريالادى. ”بەيبىتشىلىكتى قورعاۋ قابىلەتى قۇرىلىسى نىسانى“ بويىنشا بەيبىتشىلىكتى قورعاۋ اسكەرلەرى مەن ساقشىلارىنان 3000 نان استام ادام - رەت تاربيەلەندى، ”جىلدام قيمىلداۋ جۇيەسى نىسانى“ بىرلەسكەن مەملەكەتتەر ۇيىمىنىڭ 21 ءتۇرلى تاتۋلاستىرۋ ارەكەتىنە قولداۋ كورسەتتى، ”اۋعانستانداعى جاس، ورەن بوسقىنداردىڭ كۇنەلتۋ قابىلەتى نىسانى“ 2000 نان استام بوسقىندى يگىلىككە كەنەلتتى... قور قۇرىلعاننان بەرى 130 نەشە نىسانعا قولداۋ كورسەتىپ، 100 دەن استام مەملەكەتتى قامتىپ، جۇڭگونىڭ بىرلەسكەن مەملەكەتتەر ۇيىمى ىستەرىن ءىس جۇزىندىك ارەكەتىمەن قولدايتىندىعىن تولىق ايگىلەدى.

بىلتىر جىل سوڭىندا بۇكىل جەر شارى كليماتىن جونگە سالۋدا ماڭىزدى قادام تاستالدى، بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى دۋباي جينالىسى كليمات وزگەرىسىنە توتەپ بەرۋ جونىندەگى «پاريج كەلىسىمى» كۇشكە يە بولعاننان بەرى تۇڭعىش رەت دۇنيە جۇزىلىك اداقتاۋدى ورىندادى. جۇڭگو جاق ءتوراعا ەلمەن جانە ءار جاقپەن تىعىز سايكەسىپ، شەشۋشى ماسەلەلەردى شەشۋ جوباسىن ازىرلەپ، ءار جاقتىڭ ورتاقتىعىن ىلگەرىلەتىپ، ماڭىزدى جەتەكشىلىك رولىن ساۋلەلەندىردى. جينالىسقا باستان - اياق نازار اۋدارىپ وتىرعان اراب بىرىككەن امىرلىگىنىڭ حالىقارالىق ماسەلەلەر مامانى ناگيلا ازارني مىنانى ءبىلدىردى: جۇڭگو اراب بىرىككەن امىرلىگىنىڭ ءتوراعا ەل رولىن ساۋلەلەندىرۋىن قولدادى، ءار جاقپەن تىلدەسۋگە، پىكىرلەسۋگە ءمان بەردى، جينالىستىڭ تابىسقا جەتۋىن ىلگەرىلەتەتىن ماڭىزدى كۇش بولدى.

بىرگە اقىلداسۋعا، بىرگە قۇرۋعا، بىرگە يگىلىكتەنۋگە تاباندى بولعاندا عانا، دۇنيە جۇزىلىك باسقارۋدىڭ ورنىقتى، باياندى بولۋىنا مۇمكىندىك جاساۋعا بولادى. تەرەڭ تەڭىز، ۇيەك ءوڭىرى، سىرتقى كەڭىستىك، تور جانە سيفر، جاساندى زەردە سياقتى دۇنيە جۇزىلىك باسقارۋدىڭ جاڭا ورىسىندە جۇڭگو باستان - اياق كوپ جاقتىلىققا تاباندى بولىپ، ءار جاقتى ەڭ ۇلكەن ورتاق بولگىشتى ۇزدىكسىز قاراستىرۋعا، سەلبەستىك اياسىن كەڭەيتۋگە جەتەكتەپ، اناعۇرلىم جوعارى ءونىمدى دۇنيە جۇزىلىك باسقارۋ ارقىلى ادامزات قوعامىنىڭ دامۋىن، العا باسۋىن جەبەدى.

بىرلەسكەن مەملەكەتتەر ۇيىمىنىڭ باس حاتشىسى گۋتەررەس مىنانى ءبىلدىردى: جۇڭگو − كوپ جاقتىلىقتىڭ ماڭىزدى تىرەگى، كوپ جاقتى قۇرىلىمداردىڭ باتىل قولداۋشىسى، اناعۇرلىم بەيبىت حالىقارالىق ءتارتىپ ورناتۋ جاعىندا ماڭىزدى رول اتقارادى.

اۋقىمعا قاراي ىستەپ، بۇكىل دۇنيە ءجۇزىنىڭ وڭتۇستىگىنىڭ دامۋىن، گۇلدەنۋىن ىلگەرىلەتتى

اۋىل شارۋاشىلىعى ۋگاندانىڭ مەملەكەت جوسپارى مەن حالىق تۇرمىسىندا ماڭىزدى رول اتقارادى، الايدا جەرگىلىكتى شارۋا وتباسىلارى ۇزاق ۋاقىتتان بەرى توپىراقتىڭ توزۋى ماسەلەسىنە تاپ بولىپ كەلەدى. 2020 - جىلى 7 - ايدان باستاپ دۇنيە جۇزىلىك دامۋ مەن وڭتۇستىك - وڭتۇستىك سەلبەستىك قورىنىڭ قولداۋىندا جۇڭگو جاق بىرلەسكەن مەملەكەتتەر ۇيىمىمەن سەلبەسىپ، ۋگاندادا ”توپىراقتى باياندى جونگە سالۋ قابىلەتىن جوعارىلاتۋ“ نىسانىن اتقاردى.

جابدىقتارمەن قامداۋ، جاڭا تەحنيكادان ۇلگى كورسەتۋ، جەلىدە ساباق ءوتۋ، نىسانداردى اشۋ سياقتى كوپ ءتۇرلى شارانى قاتار قولدانىپ، جەرگىلىكتى شارۋالاردىڭ توپىراقتى جونگە سالۋ قابىلەتىن ۇزدىكسىز جوعارىلاتتى. بيىل 9 - ايدا جۇڭگوعا كەلىپ جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار ماجىلىسىنە قاتىناسقان ۋگاندانىڭ اۋىل شارۋاشىلىعى، مال شارۋاشىلىعى جانە بالىق شارۋاشىلىعى مينيسترى فرانك تومۆەباز مىنانى ءبىلدىردى: ”كوپ جىلدىق سەلبەستىك بارىسىندا ءبىز جۇڭگونىڭ ماسەلەنى جوعارى ونىمدىلىكپەن شەشۋ قابىلەتىن اڭعاردىق“.

بۇكىل دۇنيە ءجۇزى وڭتۇستىگىنىڭ كۇدىكسىز ءبىر مۇشەسى رەتىندە جۇڭگو باستان - اياق بۇكىل دۇنيە ءجۇزى وڭتۇستىگىنىڭ دامۋىن، گۇلدەنۋىن ىلگەرىلەتەتىن تىرەكتى كۇش بولىپ كەلەدى. دۇنيە جۇزىلىك باسقارۋ جۇيەسىنىڭ بەتالىسى دۇنيە جۇزىندەگى وڭتۇستىك ەلدەردىڭ دامۋ كەڭىستىگىنە سايادى، جۇڭگو دۇنيە جۇزىندەگى وڭتۇستىك ەلدەردىڭ دۇنيە جۇزىلىك باسقارۋ بارىسىنداعى سويلەۋ ۇقىعى مەن ۋاكىلدىك سيپاتىن كەڭەيتۋدى تاباندىلىقپەن ىلگەرىلەتتى.

سول جەر ۋاقىتى 9 - ايدىڭ 25 - كۇنى ”دۇنيە جۇزىلىك دامۋ باستاماسى دۇنيە ءجۇزىنىڭ وڭتۇستىگىنە قولداۋ كورسەتۋدە −− جۇڭگو ارەكەتكە كىرىستى“ نەگىزگى تاقىرىبىن جاريالاۋ قيمىلى دۇنيە ءجۇزىنىڭ وڭتۇستىگىن قولداۋعا ورتاق تانىم ۇيىستىردى. بىرلەسكەن مەملەكەتتەر ۇيىمى ادامدىق ۇقىق القالار كەڭەسىنىڭ 57 - كەزەكتى ماجىلىسىندە جۇڭگو دۇنيە جۇزىندەگى وڭتۇستىك ەلدەرمەن قول ۇستاسىپ، سىڭار جاقتى جازالاۋعا بىرگە قارسى تۇرىپ، ءادىل، ۇيلەسىمدى حالىقارالىق ادامدىق ۇقىقتى باسقارۋ جۇيەسىن ورناتۋدى ىلگەرىلەتتى. 9 - ايدىڭ ورتا شەنىندە وتكىزىلگەن 11 - كەزەكتى بەيجيڭ شياڭشان تالقى مىنبەرى دۇنيە جۇزىندەگى وڭتۇستىك ەلدەر ءۇشىن ارناۋلى ساحنا ازىرلەدى. 2024 – جىلعى بريكس ەلدەرىنىڭ جاڭا ونەركاسىپ توڭكەرىسى سەرىكتەستىك قارىم - قاتىناسى تالقى مىنبەرى تاياۋدا فۋجياندا وتكىزىلدى، 15 ەل بىرلەسىپ «جاڭاشا ونەركاسىپتەندىرۋ حالىقارالىق سەلبەستىك باستاماسىن» جاريالادى، بريكس سەلبەستىگىنىڭ دۇنيە ءجۇزىنىڭ وڭتۇستىگىنىڭ بىرلەسىپ ءوزىن الۋەتتەندىرۋدەگى جەتەكشىلىك رولى ۇزدىكسىز كورنەكتىلەندى.

تانزانيا - جۇڭگو دوستىقتى جەبەۋ قوعامىنىڭ باس حاتشىسى يوسيف كاحاما بىلاي دەدى: ”بۇكىل دۇنيە ءجۇزى وڭتۇستىگىنىڭ ءبىر مۇشەسى رەتىندە جۇڭگونىڭ كۇشى دۇنيە جۇزىندەگى باسقا وڭتۇستىك ەلدەرىنىڭ ءۇنىنىڭ اناعۇرلىم پارمەندى بولۋىنا مۇمكىندىك جاسادى“.

دۇنيە جۇزىندە 100 جىلدا بولماعان زور وزگەرىس جەدەل قۇبىلۋدا، دۇنيە ءجۇزىنىڭ وڭتۇستىگى − حالىقارالىق ءتارتىپ وزگەرىسىنىڭ شەشۋشى كۇشى. تاريحتىڭ ۇلى اۋقىمىنا سايكەس، جۇڭگو ءار جاقپەن قول ۇستاسىپ، دۇنيە جۇزىلىك باسقارۋدىڭ ”وڭتۇستىك ءساتىن“ ايقىندادى: 2024 - جىلعى جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار ءماجىلىسىن ءساتتى وتكىزدى، جۇڭگو - اراب ەلدەرى سەلبەستىك تالقى مىنبەرىنىڭ 10 - كەزەكتى مينيستر دارەجەلىلەر ءماجىلىسىن وتكىزدى، شاڭحاي سەلبەستىك ۇيىمىنىڭ كەزەكتى ءتوراعا ەلى قىزمەتىن جاپپاي باستاپ، بريكس ەلدەرى سەلبەستىگىنىڭ تاريحي سيپاتتى مۇشە كوبەيتكەننەن كەيىن اناعۇرلىم كۇشەيۋىنە قولداۋ كورسەتتى، برازيليانىڭ، پەرۋدىڭ جەكە - جەكە 20 ەل توبى باسشىلار ءماجىلىسىن، ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ءماجىلىسىن وتكىزۋىنە قولداۋ كورسەتتى…

قىرعىزستاننىڭ جۇڭگودا تۇرعان بۇرىنعى باس ەلشىسى باقىتقۇلوۆا مىنانى ءبىلدىردى: جۇڭگو دۇنيە جۇزىلىك باسقارۋدىڭ ۇزدىكسىز كەمەلدەنۋىن، دۇنيە جۇزىلىك دامۋدىڭ ۇزدىكسىز العا باسۋىن ىلگەرىلەتۋدى قالايدى، قازىر حالىقارالىق قوعامدى دۇنيە ءجۇزىنىڭ بەيبىتشىلىگى، حاۋىپسىزدىگى جانە ورنىقتىلىعى ءۇشىن بىرگە قۇلشىنىپ، ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتۋگە جەتەكتەۋدە.

(تىلشىلەرىمىز شياۋ شينشين، رىن حاۋيۇي، لي چياڭ جازۋعا قاتىناستى)

كەلۋ قاينارى: حالىق تورابى