لي چياڭ 2 - كەزەكتى جۇڭگو حالىقارالىق قامداۋ تىزبەگىن جەبەۋ كورمەسىنە قاتىناسقان كاسىپورىنداردىڭ ۋاكىلدەرىمەن اڭگىمەلەستى

شينحۋا اگەنتتىگى، 11 - ايدىڭ 25 - كۇنى، بەيجيڭ. 11 - ايدىڭ 25 - كۇنى مەملەكەتتىك كەڭەستىڭ زۇڭليى لي چياڭ بەيجيڭدە 2 - كەزەكتى جۇڭگو حالىقارالىق قامداۋ تىزبەگىن جەبەۋ كورمەسىنە قاتىناسقان كاسىپورىنداردىڭ ۋاكىلدەرىمەن اڭگىمەلەستى. سۋميتومو ەلەكتر جابدىقتارى توبى، الما سەرىكتەستىگى، جىڭدا توبى، ليتو توبى، كاڭنيڭ سەرىكتەستىگى، جۇڭگو ونەركاسىپ - ساۋدا بانكەسى، نيڭدى شىداي، ليانشياڭ توبى، TCL عىلىم - تەحنيكا توبى، بايشىڭ جۇڭگو بولىمشەسى، ا ق ش - جۇڭگو ساۋدا مەملەكەتتىك كوميتەتى سياقتى كاسىپورىندار مەن قۇرىلىمداردىڭ جاۋاپتىلارى ماجىلىسكە قاتىناستى.

اڭگىمەلەسۋگە قاتىناسقان كاسىپورىنداردىڭ ۋاكىلدەرى مىنالاردى ءبىلدىردى: جۇڭگو بازارى − دۇنيە ءجۇزىنىڭ ءوندىرۋ، قامداۋ تىزبەگىنىڭ ماڭىزدى قۇرامداس بولىگى، دۇنيە ءجۇزىنىڭ ۇلاستىرۋ - تۇتاستىرۋىنا جانە جاڭالىق اشا دامۋىنا ماڭىزدى ۇلەس قوستى. جۇڭگو جاڭاشا وندىرگىش كۇشتەردى دامىتۋعا كۇش سالىپ، پارمەندى ەكونوميكالىق ساياسات شىعارىپ، ەكونوميكانىڭ ورنىقتى جاقسارۋ جاعدايىن ۇزدىكسىز بەكەمدەپ، جاڭالىق اشۋ ومىرشەڭدىك كۇشىن ۇزدىكسىز تاسقىنداتىپ، ساۋدا ورتاسىن اناعۇرلىم جاقسارتتى. شەتەلدىڭ جۇڭگوداعى كاسىپورىندارى جۇڭگونىڭ قول جەتكىزگەن دامۋ جەتىستىكتەرىنە كۋا بولىپ، جۇڭگو ەكونوميكاسىنا تولىق سەنىم ارتىپ، كومەسكى كۇشى وراسان زور جۇڭگو بازارىنا قىزىعىپ وتىر، جۇڭگودا قارجى قوسۋدى ونان ارى كەڭەيتىپ، جۇڭگودا دامۋدى ىشكەرىلەي كەڭەيتىپ، دۇنيە جۇزىلىك ءوندىرۋ، قامداۋ تىزبەگى سەلبەستىگىن كۇشەيتىپ، ەسىك اشىپ، تەڭ يگىلىككە كەنەلۋدى جۇزەگە اسىرۋدى قالايمىز.

لي چياڭ كوپشىلىكتىڭ ءسوزىن مۇقيات تىڭداعاننان كەيىن مىنالاردى ءبىلدىردى: وتكەن نەشە ون جىلدا ەكونوميكانىڭ جاھاندانۋىنىڭ ىشكەرىلەي دامۋىنا بايلانىستى، دۇنيە جۇزىلىك كاسىپ تىزبەگى مەن قامداۋ تىزبەگى دە بىرتىندەپ زورايىپ، دۇنيە ءجۇزى ەكونوميكاسىنىڭ تەز قارقىنمەن ارتۋىن جەبەپ، ءار جاق يگىلىككە كەنەلدى. بۇل جۇمىس ءبولىسى سەلبەستىگى قوعام دامۋىنىڭ تابيعي تالعامى ەكەندىگىن، ەكونوميكانىڭ جوعارى ءونىمدى اينالىمى فاكتورلاردىڭ اينالىمىنىڭ ىركىلىسسىزدىگىنەن ايرىلا المايتىندىعىن، تۇيىقتالۋدىڭ شىعار جولى جوقتىعىن، ەسىك اشۋ عانا دۇرىس جول ەكەندىگىن تولىق تۇسىندىرەدى. قازىر دۇنيە ءجۇزى ەكونوميكاسىنىڭ ارتۋى دارمەنسىز، كەيبىر قورعانىمپازدىق، جاپپاي حاۋىپسىزدىككە سايدىرۋ ارەكەتتەرى دۇنيە ءجۇزىنىڭ ءوندىرۋ، قامداۋ تىزبەگىنە زيان جەتكىزىپ، كاسىپورىنداردىڭ وزىندىك قۇنىن ونان ارى جوعارىلاتىپ، ەكونوميكالىق ونىمدىلىكتى تومەندەتىپ، بىرگە دامۋعا كەدەرگىلىك جاساۋدا. نەعۇرلىم وسىنداي بولعان سايىن، دۇنيە جۇزىلىك ءوندىرۋ - قامداۋ تىزبەگىنىڭ دۇنيە ءجۇزى ەكونوميكاسىنداعى ماڭىزدى ءمانىن سولعۇرلىم تاني ءتۇسۋ، ءوندىرۋ - قامداۋ تىزبەگى سەلبەستىگىن كۇشەيتۋدىڭ كەڭ كولەمدى ورتاق تانىمىن سولعۇرلىم ۇيىستىرۋ، ءتۇرلى فورماداعى قول ءۇزىپ، تىزبەكتى بۇزۋعا، ”بولەك قازان اسۋعا“ قارسى تۇرۋ، دۇنيە جۇزىلىك ءوندىرۋ - قامداۋ جەلىسىنىڭ ورنىقتى، ىركىلىسسىز بولۋىن باتىل قورعاۋ، ءار جاقتىڭ ورتاق مۇددەسىن قورعاۋ كەرەك.

لي چياڭ بىلاي دەپ اتاپ كورسەتتى: جۇڭگو − دۇنيە جۇزىلىك ءوندىرۋ، قامداۋ تىزبەگىنىڭ شەشۋشى بۋىنى، ءىس جۇزىندىك ارەكەتى ارقىلى دۇنيە جۇزىلىك ءوندىرۋ، قامداۋ تىزبەگىنىڭ ورنىقتى، ىركىلىسسىز بولۋىن قورعاۋعا ۇزدىكسىز كۇش سالادى. بيىل جىل باسىنان بەرى جۇڭگونىڭ ەكونوميكالىق اينالىمى جالپى جاقتان ورنىقتى بولىپ، ورنىقتىلىق بارىسىندا ىلگەرىلەدى، ءبىز كەرى پەريودتى رەتتەۋ تەبىنىن ۇزدىكسىز ارتتىرىپ، جۇڭگو ەكونوميكاسىنىڭ ۇزدىكسىز جاقسارۋىن ىلگەرىلەتىپ، جاڭا قوزعاۋشى كۇشتى ۇزدىكسىز جەتىلدىرىپ، زورايتىپ، جوعارى ساپالى دامۋدى تىڭعىلىقتى ىلگەرىلەتىپ، دۇنيە جۇزىلىك ءوندىرۋ، قامداۋ تىزبەگى سەلبەستىگىن تەرەڭدەتۋگە، دۇنيە ءجۇزى ەكونوميكاسىنىڭ قالپىنا كەلۋىن جەبەۋگە اناعۇرلىم زور كۇش قوسامىز. ءبىز وسىزاماندانعان كاسىپ سالاسى جۇيەسىن جەدەل قۇرىپ، اناعۇرلىم قۋاتتى سايكەستى قابىلەتپە، اناعۇرلىم ورنىقتى ءوندىرىس قۋاتىمەن قامداۋ ارقىلى دۇنيە ءجۇزىنىڭ ءوندىرۋ، قامداۋ تىزبەگىنىڭ جوعارى ءونىمدى اينالىمىنا بەرىك تىرەك ازىرلەيمىز. ءبىز عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ ىشكەرىلەي توعىسۋىن كۇش سالا نىعايتىپ، حالىقارالىق جاڭالىق اشۋ سەلبەستىگىمەن اناعۇرلىم ويداعىداي توعىسىپ، دۇنيە جۇزىلىك ءوندىرۋ، قامداۋ تىزبەگىنىڭ تيپىن وزگەرتىپ، دارەجەسىن جوعارىلاتۋعا ۇزدىكسىز پارمەندى قوزعاۋشى كۇش ازىرلەيمىز. ءبىز جوعارى دەڭگەيدە سىرتقا ەسىك اشۋدى تاباندىلىقپەن ىلگەرىلەتىپ، بازارعا كىرۋ رۇقساتىن ونان ارى كەڭەيتىپ، ءتىپتى دە كوپ شەتەل كاسىپورىندارىنىڭ جۇڭگوعا كەلىپ كاسىپ سالاسى سەلبەستىگىن ورىستەتۋىن قارسى الىپ، دۇنيە جۇزىلىك ءوندىرۋ، قامداۋ تىزبەگى سەلبەستىگىنىڭ كەڭەيۋىنە ۇزدىكسىز كەڭ ءورىس ازىرلەيمىز.

لي چياڭ مىنالاردى ءبىلدىردى: قالىڭ كاسىپورىنداردىڭ دۇنيە جۇزىلىك ءوندىرۋ، قامداۋ تىزبەگىنىڭ باتىل قورعاۋشىسى جانە بەلسەندى قۇرۋشىسى بولىپ، ءداۋىر اعىمىن يگەرىپ، دامۋ اۋقىمىنا سايكەسىپ، ەكونوميكانىڭ جاھاندانۋىن ۇزدىكسىز باتىل قولداپ، حالىقارالىق جۇمىس ءبولىسى سەلبەستىگىن ۇزدىكسىز تەرەڭدەتىپ، ءوندىرۋ، قامداۋ تىزبەگىندە جاڭالىق اشۋ سەلبەستىگى، جاسىل تيپكە بۇرىلىس جاساۋ جاعىندا اناعۇرلىم زور كۇش سالىپ، اناعۇرلىم ومىرشەڭ، سەرپىمدى جانە ءونىمدى دۇنيە جۇزىلىك ءوندىرۋ، قامداۋ جەلىسىن قول ۇستاسا سومداپ، كاسىپورىننىڭ اناعۇرلىم جاقسى دامۋىن جۇزەگە اسىرىپ، ءار ەلدىڭ بىرگە گۇلدەنۋىنە دەم بەرۋىن ءۇمىت ەتەمىن.

ۋ جىڭلۇڭ اڭگىمەلەسۋدە بىرگە بولدى.

كەلۋ قاينارى: حالىق تورابى