شي جينپيڭ ساموانىڭ زۇڭليى فيامەيمەن كەزدەستى

11 - ايدىڭ 26 – كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن ساموانىڭ زۇڭليى فيامەيمەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 11 - ايدىڭ 26 – كۇنى، بەيجيڭ (تىلشىلەر فىڭ شينران، ساۋ جيايۋە). 11 - ايدىڭ 26 – كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن ساموانىڭ زۇڭليى فيامەيمەن كەزدەستى.

شي جينپيڭ بىلاي دەپ اتاپ كورسەتتى: ساموا تىنىق مۇحيتتاعى ارال ەلدەردىڭ ىشىندە تۇڭعىش توپتا جاڭا جۇڭگومەن ديپلوماتيالىق قارىم - قاتىناس ورناتتى. ديپلوماتيالىق قارىم - قاتىناس ورناتقان 50 جىلعا جۋىق ۋاقىتتان بەرى ەكى ەل ءداستۇرلى دوستىقتى ساقتاپ، باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، سەلبەسىپ تەڭ يگىلىككە كەنەلدى. جۇڭگو جاق ەجەلدەن مەملەكەتتەر ۇلكەن - كىشىلىگىنە قاراماستان تۇگەلدەي تەرەزەسى تەڭ، ءبارىنىڭ دەربەس، ءوز - وزىنە قوجايىن بولا وتىرىپ وسىزامانداندىرۋدى جۇزەگە اسىرۋ ۇقىعى بار دەگەندى دارىپتەپ كەلەدى. جۇڭگو جاق ساموا جاقتىڭ ءوزىنىڭ يەلىك ۇقىعى مەن تاۋەلسىزدىگىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس قاراستىرۋىن باتىل قولدايدى، ساموا جاقپەن ءوزارا قۇرمەت ەتۋگە، ءوزارا سەنىم ارتۋعا تاباندى بولىپ، ەل باسقارۋ جانە دامۋ تاجىريبەلەرىن اۋىستىرۋدى كۇشەيتىپ، وڭتۇستىك - وڭتۇستىك سەلبەستىگى جۇلگەسىندە ساموانىڭ ەكونوميكالىق، قوعامدىق دامۋىنا ۇزدىكسىز كومەك كورسەتىپ، ەكونوميكا - ساۋدا، قارجى قوسۋ، اۋىل شارۋاشىلىعى، بالىق شارۋاشىلىعى سياقتى سالالارداعى كومەسكى كۇشتەردى ىشكەرىلەي اشىپ، ءوزارا ءتيىمدى سەلبەستىكتى كەڭەيتىپ، بىرگە دامۋدى جۇزەگە اسىرۋدى قالايدى. ەكى جاق وركەنيەتتەردىڭ ءوزارا ۇلگى الۋىن جەبەپ، وقۋ - اعارتۋ، مادەنيەت، جاستار سياقتى گۋمانيتارلىق سالالارداعى اۋىس - كۇيىستى، سەلبەستىكتى كۇشەيتىپ، جۇڭگو مەن ساموانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ورنىقتى، باياندى دامۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: جۇڭگو تىنىق مۇحيتتاعى ارال ەلدەرىنە ”تورتكە تولىق قۇرمەت ەتۋ“ پرينسيبىن ۇستانىپ، تىنىق مۇحيتتاعى ارال ەلدەرىنە ساياسي شارت قويمايدى، باسقالارعا زورلاپ تاڭبايدى، ”قۇر چەك كەسپەيدى“. جۇڭگونىڭ تىنىق مۇحيتتاعى ارال ەلدەرىنە قاراتقان ساياساتى اشىق، سيىسىمدى، وزىمشىلدىگى جوق، ءۇشىنشى جاققا باعىتتالمايدى، وڭىرلىك تالاس-تارتىسپەن جانە ىقپال كولەمىنە الۋمەن شۇعىلدانبايدى. جۇڭگو تىنىق مۇحيتتاعى ارال ەلدەرىنىڭ كليمات وزگەرىسىنە توتەپ بەرۋ قابىلەتىن جوعارىلاتۋىنا كومەكتەسۋدى الدىمەن سەلبەستىك جاساۋ سالاسى ەتىپ، «بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى جۇلگەلىك شارتىنىڭ» جانە ونىڭ «پاريج كەلىسىمىنىڭ» جاپپاي، ءونىمدى اتقارىلۋىن ىلگەرىلەتىپ، ورتاق، ءبىراق پارىقتى جاۋاپكەرشىلىك پرينسيبىن قورعاپ، ادىلدىك پەن ادىلەتتىلىكتى جانە دۇنيە ءجۇزىنىڭ وڭتۇستىگىنىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.

فيامەي مىنالاردى ءبىلدىردى: ءتوراعا شي جينپيڭنىڭ كورنەكتى باسشىلىعىندا جۇڭگو وراسان زور دامۋ جەتىستىكتەرىنە قول جەتكىزىپ، دۇنيە جۇزىندەگى وڭتۇستىك ەلدەرىنە ۇلگى بولدى، ساموا جاق جۇڭگو ۇلگىسىندەگى وسىزامانداندىرۋ، اسىرەسە، ءتوراعا شي جينپيڭنىڭ كەدەيلەردى ازايتۋ، جاسىل دامۋ سياقتى ەل باسقارۋ تاجىريبەلەرىن ۇيرەنۋدى، اينا ەتۋدى قالايدى. جۇڭگو جاقتىڭ ۇزاق ۋاقىتتان بەرى سامواعا قاستەرلى كومەك كورسەتكەنىنە العىس ايتامىز، ساموا جاق جۇڭگونىڭ باسقا ەلدىڭ ىشكى ىسىنە كيلىكپەۋ پرينسيبىن ۇستانعاندىعىن، تىنىق مۇحيتتاعى ارال ەلدەرگە ەشقانداي ساياسي شارت قويماعاندىعىن، ەجەلدەن ايتقانىن ورىنداپ كەلە جاتقاندىعىن ايرىقشا القايدى. ساموا جاق ءبىر جۇڭگو پرينسيبىنە تاباندى بولىپ، ءتوراعا شي جينپيڭ العا قويعان دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قولدايدى. ساموا جاق جۇڭگونى ماڭىزدى ستراتەگيالىق سەرىك ەتەدى، كەلەر جىلى ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن بىرگە قۇتتىقتاۋدى وراي ەتىپ، ەكى ەل قارىم - قاتىناسىنىڭ ونان ارى دامۋىن ىلگەرىلەتۋدى ءۇمىت ەتەدى.

كەزدەسۋدەن كەيىن ەكى جاق «جۇڭحۋا حالىق رەسپۋبليكاسى مەن ساموا تاۋەلسىز ەلىنىڭ بىرلەسكەن مالىمدەمەسىن» جاريالادى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى