لي چياڭ ساموانىڭ زۇڭليى فيامەيمەن كەڭەس وتكىزدى

11 – ايدىڭ 26 – كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن ساموانىڭ زۇڭليى فيامەيمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى يۋە يۋەۋەي تۇسىرگەن

شينحۋا اگەنتتىگى، 11 - ايدىڭ 26 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 11 - ايدىڭ 26 - كۇنى تۇستەن بۇرىن بەيجيڭدەگى حالىق سارايىندا جۇڭگوعا رەسمي ساپارمەن كەلگەن ساموانىڭ زۇڭليى فيامەيمەن كەڭەس وتكىزدى.

لي چياڭ مىنالاردى ءبىلدىردى: جۇڭگو مەن ساموا ەلدەرىنىڭ ءداستۇرلى دوستىعى تەرەڭ. ساموا − جاڭا جۇڭگومەن ەڭ ەرتە ديپلوماتيالىق قارى - قاتىناس ورناتقان تىنىق مۇحيتتاعى ارال ەلدەردىڭ ءبىرى. ديپلوماتيالىق قارىم - قاتىناس ورناتقان جارتى عاسىرعا جۋىق ۋاقىتتان بەرى، ەكى ەل قارىم - قاتىناسى باستان - اياق اقاۋسىز، ورنىقتى دامىپ، ەكى جاقتىڭ ەكونوميكا - ساۋدا بارىس - كەلىسى كۇن سايىن جيىلەپ، ءار سالاداعى سەلبەستىكتە سۇبەلى تابىستارعا قول جەتكىزىپ، ەكى ەل حالىقتارىن شىنايى يگىلىككە كەنەلتتى. ءتوراعا شي جينپيڭ زۇڭلي حانىممەن كەڭەس وتكىزىپ، ەكى ەل قارىم - قاتىناسى دامۋىنىڭ جاڭا جوباسىن بىرگە جاسايدى. جۇڭگو جاق ساموا جاقپەن بىرگە ەكى ەل باسشىلارىنىڭ ماڭىزدى ورتاق تانىمىن تياناقتاندىرىپ، ساياسي ءوزارا سەنىمدىلىكتى اناعۇرلىم تەرەڭدەتىپ، ءبىر - ءبىرىنىڭ وزەكتى مۇددەسىن باتىل قولداپ، ءوزارا ءتيىمدى سەلبەستىكتى كۇشەيتىپ، جۇڭگو مەن ساموانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، باستان - اياق ءبىر - بىرىنە سەنەتىن ادال دوس، دامۋدى بىرگە جوسپارلايتىن ماڭىزدى سەرىك بولۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق ساموا جاقپەن دامۋ ستراتەگياسىن ۇشتاستىرۋدى كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى جەتەكشى ەتىپ، ەكونوميكا - ساۋدا سەلبەستىگىنىڭ كولەمىن كەڭەيتىپ، ساۋداعا قارجى قوسۋدىڭ قولايلىلانۋىن ىلگەرىلەتىپ، اۋىل شارۋاشىلىعى، بالىق شارۋاشىلىعى، تازا ەنەرگيا، اپاتتان ساقتانۋ، اپات زيانىن ازايتۋ سياقتى سالالارداعى سەلبەستىكتى كۇشەيتىپ، ءوزارا تيىمدىلىك جەتكىزىپ، تەڭ يگىلىكتەنۋ بارىسىندا بىرگە دامۋدى، گۇلدەنۋدى جەبەۋدى قالايدى. جۇڭگو جاق ساموا جاقتىڭ اناعۇرلىم كوپ ساپالى اۋىل شارۋاشىلىق قوسىمشا ونىمدەرىن يمپورت ەتۋدى قالايدى، ساموا جاقتىڭ يمپورت كورمەسى، گۋاڭجوۋ جارمەڭكەسى سياقتى كورمە تۇعىرلارىنان ۇزدىكسىز ويداعىداي پايدالانۋىن قارسى الادى. ەكى جاق ادامداردىڭ بارىس - كەلىسىنە اناعۇرلىم قولايلىلىق جاساپ، ساياحات، ەمدەۋ، وقۋ - اعارتۋ، جاستار سياقتى گۋمانيتارلىق سالالارداعى سەلبەستىكتى ۇزدىكسىز كەڭەيتىپ، جۇڭگو - ساموا دوستىعىنىڭ ۇرپاقتان - ۇرپاققا جالعاسۋىن ىلگەرىلەتۋى كەرەك. جۇڭگو مەن ساموا ”دۇنيە ءجۇزىنىڭ وڭتۇستىگىنە“ ءتان، جۇڭگو جاق ساموا جاقپەن كوپ جاقتى سالاداعى قارىم - قاتىناستى، سايكەسۋدى كۇشەيتىپ، كليمات وزگەرىسىنىڭ سىن - سايىسىنا بىرگە توتەپ بەرىپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىن جانە ەكونوميكانىڭ جالپىعا ءتيىمدى، سيىسىمدى جاھاندانۋىن ىلگەرىلەتىپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

فيامەي جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قىزۋ قۇتتىقتاپ، مىنالاردى ءبىلدىردى؛ ساموا جاق جۇڭگونىڭ وسىزامانداندىرۋ قۇرىلىسى مەن ۇلتتىڭ گۇلدەنۋى اياق الىسىن ىلگەرىلەتۋدە قول جەتكىزگەن وراسان زور تابىستارىن ايرىقشا القايدى، جۇڭگونىڭ دامۋى ساموا سياقتى وركەندەپ كەلە جاتقان ەلدەر جونىنەن ماڭىزدى ۇلگىلىك مانگە يە. ساموا جاق ءبىر جۇڭگو پرينسيبىن ۇستانادى، جۇڭگو جاقتىڭ تۇرعىسىن باتىل قولدايدى. جۇڭگو جاقتىڭ ۇزاق ۋاقىتتان بەرى ساموانىڭ ەكونوميكالىق، قوعامدىق دامۋىنا قالتقىسىز كومەك كورسەتكەنىنە العىس ايتادى، ساموا جاق كەلەر جىلى ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، جۇڭگو جاقپەن جوعارى جىكتەگىلەردىڭ بارىس - كەلىسىن جيىلەتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگى جۇلگەسىندە ساۋدا، اۋىل شارۋاشىلىعى، دەنساۋلىق ساقتاۋ، وقۋ - اعارتۋ، ساياحات، نەگىزدىك قۇرىلعى قۇرىلىسى، اپاتتان ساقتانۋ، اپات زيانىن ازايتۋ سياقتى سالالارداعى ءوزارا ءتيىمدى سەلبەستىكتى تەرەڭدەتىپ، گۋمانيتارلىق، جەرگىلىكتى ورىندار اۋىس - كۇيىسىن كۇشەيتۋدى قالايدى. ساموا جاق جۇڭگو جاقتىڭ تىنىق مۇحيتتاعى ارال ەلدەرىنىڭ ”كوك ءتۇستى تىنىق مۇحيت 2050 ستراتەگياسىن“ ۇزدىكسىز قولداۋىن كۇتەدى، جۇڭگومەن قارىم - قاتىناستى، سەلبەستىكتى كۇشەيتىپ، كليمات وزگەرىسى سياقتى دۇنيە جۇزىلىك سىن - سايىسقا قول ۇستاسا توتەپ بەرۋدى قالايدى.

كەڭەستەن كەيىن ەكى ەل زۇڭليلەرى دۇنيە جۇزىلىك دامۋ باستاماسى، ەكونوميكالىق دامۋ، وقۋ - اعارتۋ سياقتى كوپ ءتۇرلى ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

كەڭەستەن بۇرىن لي چياڭ حالىق سارايىنىڭ سولتۇستىك زالىندا فيامەيگە ارناپ قارسى الۋ سالتىن وتكىزدى.

ۋ جىڭلۇڭ جوعارىداعى قيمىلدارعا قاتىناستى.

كەلۋ قاينارى: حالىق تورابى