حان جىڭ 13 - كەزەكتى دۇنيە جۇزىلىك بەيبىتشىلىك تالقى مىنبەرىنىڭ اشىلۋ سالتىنا قاتىناستى ءارى ارناۋ ءسوز سويلەدى

«حالىق گازەتى»، 7 - ايدىڭ 3 - كۇنى، بەيجيڭ. 7 - ايدىڭ 3 - كۇنى مەملەكەت ءتوراعاسىنىڭ ورىنباسارى حان جىڭ چيڭحۋا داشۋەسىندە 13 - كەزەكتى دۇنيە جۇزىلىك بەيبىتشىلىك تالقى مىنبەرىنىڭ اشىلۋ سالتىنا قاتىناستى ءارى ارناۋ ءسوز سويلەدى.

حان جىڭ مىنالاردى ءبىلدىردى: قازىر دۇنيە ءجۇزىنىڭ 100 جىلدىق وزگەرىس جاعدايى جەدەل قۇبىلىپ، حالىقارالىق جانە وڭىرلىك قولامتالى ماسەلەلەر تولاستامادى، دۇنيە ءجۇزىنىڭ بەيبىتشىلىگى مەن دامۋ ىستەرى قاتاڭ سايىسقا ءدوپ كەلدى. ءتوراعا شي جينپيڭ ادامزاتتىڭ تاعدىرلاس ورتاق تۇلعاسىن قۇرۋ ماڭىزدى ۇستانىمىن جانە دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن العا قويىپ، ادامزاتتىڭ بەيبىتشىلىگى مەن دامۋىنا ساياتىن كەلەلى ماسەلەلەردى شەشۋگە جۇڭگو جوباسىن ازىرلەدى.

حان جىڭ بىلاي دەپ اتاپ كورسەتتى: بيىل − جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسكە جەتكەندىگىنىڭ 80 جىلدىعى، سونداي - اق بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو ءار ەلمەن بىرگە دۇنيە ءجۇزىنىڭ بەيبىتشىلىگى مەن گۇلدەنۋىن جەبەپ، اناعۇرلىم كوركەم دۇنيە ءجۇزىن قول ۇستاسا قۇرۋدى قالايدى.

حان جىڭ مىناداي ءتورت ءتۇرلى ۇسىنىس قويدى. ءبىرىنشى، تاريحتى اينا ەتۋگە تاباندى بولىپ، سوعىستان كەيىنگى حالىقارالىق ءتارتىپتى بىرگە قورعاۋ كەرەك. بىرلەسكەن مەملەكەتتەر ۇيىمىن ۇيىتقى ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى، بىرلەسكەن مەملەكەتتەر ۇيىمى ۋستاۆىنىڭ ماقساتى مەن پرينسيبىن نەگىز ەتكەن حالىقارالىق قاتىناستىڭ نەگىزگى ولشەمىن قورعاۋعا تاباندى بولىپ، حالىقارالىق ادىلدىك پەن ادىلەتتىلىكتى باتىل قورعاۋ كەرەك.

ەكىنشى، ىنتىماقتاسا سەلبەسۋگە تاباندى بولىپ، دۇنيە جۇزىلىك جونگە سالۋدى بىرگە كەمەلدەندىرۋ كەرەك. بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە تاباندى بولىپ، ناعىز كوپ جاقتىلىقتى امالياتتا ايگىلەپ، ءوزارا قۇرمەت ەتۋگە، تەڭ تۇرعىدا كەڭەسۋگە تاباندى بولىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن جەدەل ورناتۋ كەرەك.

ءۇشىنشى، ەسىك اشۋعا، سەلبەسۋگە تاباندى بولىپ، دۇنيە ءجۇزىنىڭ گۇلدەنۋىن، دامۋىن بىرگە جەبەۋ كەرەك. ءبىر - بىرىنە سۇيەنىپ ءومىر ءسۇرۋدى، سەلبەسىپ تەڭ يگىلىككە كەنەلۋدى تەرەڭدەتىپ، كوپ جاقتى ساۋدا ءتۇزىلىسىن، دۇنيە جۇزىلىك كاسىپ سالاسى تىزبەگى مەن قامداۋ تىزبەگىنىڭ ورنىقتى، ىركىلىسسىز بولۋىن جانە اشىق، سەلبەسكەن حالىقارالىق ورتانى بىرگە قورعاپ، دۇنيە ءجۇزى ەكونوميكاسىنىڭ قامتىمدى ارتۋىن ىلگەرىلەتۋ كەرەك.

ءتورتىنشى، تار جول، تايعاق كەشۋلەردەن بىرگە وتۋگە تاباندى بولىپ، وسىزاماندانۋعا بىرگە قادام تاستاۋ كەرەك. ءبىر - بىرىنە قارايلاسۋعا تاباندى بولىپ، دامۋدى حالىقارالىق كۇن ءتارتىپتىڭ وزەكتى ورنىنا قويىپ، وركەندەپ كەلە جاتقان ەلدەردىڭ دامۋدا كوڭىل ءبولىپ وتىرعان ماسەلەلەرىن شىنايى شەشىپ، دۇنيە جۇزىلىك دامۋدىڭ تەڭسىزدىگى، بىركەلكىسىزدىگى ماسەلەسىن شەشۋگە كۇش سالۋ كەرەك.

جاپونيانىڭ بۇرىنعى باس ءۋازىرى جيۋشان يۋجيفۋ، بەلگيانىڭ بۇرىنعى باس ءۋازىرى، ەۆروپا القالار كەڭەسىنىڭ بۇرىنعى ءتوراعاسى ۆان رومپە قاتارلى شەتەلدىڭ بۇرىنعى ساياسي قايراتكەرلەرى، جۇڭگودا تۇراتىن ەلشىلەرى، جۇڭگولىق، شەتەلدىك وقىمىستىلار قاتارلىلار بولىپ 400 دەي ادام ماجىلىسكە قاتىناستى.