يۇننان ولكەلىك ۇكىمەت پارتگرۋپپاسىنىڭ بۇرىنعى مۇشەسى، ورىنباسار ولكە باستىعى جاڭ زۋليننىڭ پارا الۋ دەلوسىنا ءبىرىنشى سوتتا ۇكىم جاريالادى

شينحۋا اگەنتتىگىنىڭ 6 ـ ايدىڭ 26 ـ كۇنى چۇڭچيڭنەن بەرگەن حابارى. 2025 ـ جىلى 6 ـ ايدىڭ 26 ـ كۇنى چۇڭچيڭ قالالىق 1 ـ ورتا دارەجەلى حالىق سوت مەكەمەسى يۇننان ولكەلىك ۇكىمەت پارتگرۋپپاسىنىڭ بۇرىنعى مۇشەسى، ورىنباسار ولكە باستىعى جاڭ زۋليننىڭ پارا الۋ دەلوسىنا اشىق ۇكىم شىعارىپ، پارا الۋ قىلمىسى بويىنشا ايىپكەر جاڭ زۋليندى مەرزىمسىز قاماۋ جازاسىنا ۇكىم ەتىپ، ساياسي ۇقىعىنان ومىرلىك ماحۇرىم ەتتى، وعان قوسا جەكە بارلىق مال ـ مۇلكىن ءمۇسادىرالادى؛ دەلوعا ساياتىن جاڭ زۋليننىڭ پاراعا العان مال - مۇلكى مەن ونىڭ ءوسىمىن قايتارىپ الىپ، زاڭ بويىنشا مەملەكەت قازىناسىنا تاپسىرادى، جەتپەگەن بولەگى جالعاستى قۋزاپ قايتارىپ الىنادى.

تەكسەرۋ ارقىلى مىنالار انىقتالدى: 2001 - جىلدان 2023 - جىلعا دەيىن ايىپكەر جاڭ زۋلين يۇننان ولكەلىك ساپانى تەحنيكالىق باقىلاۋ مەكەمەسى پارتگرۋپپاسىنىڭ شۋجيى، مەكەمە باستىعى، يۇننان ولكەسى ليجياڭ قالالىق پارتكومنىڭ ورىنباسار شۋجيى، قالا باستىعى، كۇنميڭ قالالىق پارتكومنىڭ ورىنباسار شۋجيى، قالا باستىعى، يۇننان ولكەسى يۇيشي قالالىق پارتكومنىڭ شۋجيى، يۇننان ولكەلىك ۇكىمەت پارتگرۋپپاسىنىڭ مۇشەسى، ورىنباسار ولكە باستىعى، يۇننان ولكەلىك ۇكىمەتتىڭ ورىنباسار ولكە دارەجەلى كادرى، اقىلشىسى قاتارلى قىزمەت قولايلىلىعى، سونداي - اق قىزمەت ۇقىعى نەمەسە ورنى قالىپتاستىرعان قولايلى شارت – جاعدايدان پايدالانىپ قاتىستى ورىندار مەن جەكەلەردىڭ قورا - جاي اشۋ، قۇرىلىستى كوتەرمەگە الۋ، پلاندى تەكسەرىپ بەكىتۋ جانە قارجى قۇراۋ، قارىز اقشا بەرۋ سياقتى ىستەرىنە كومەك كورسەتىپ، جوعارىدا ايتىلعان ورىندار مەن جەكەلەردىڭ جيىنى 122 ميلليون يۋاننان استام مال - مۇلكىن قابىلداعان.

چۇڭچيڭ قالالىق 1 - ورتا دارەجەلى حالىق سوت مەكەمەسى بىلاي دەپ قارادى: ايىپكەر جاڭ زۋليننىڭ ارەكەتى پارا الۋ قىلمىسىنا جاتادى، ونى زاڭ بويىنشا جازالاۋ كەرەك. جاڭ زۋليننىڭ پاراعا العان سوماسى ەرەكشە كوپ ءارى مەملەكەت پەن حالىقتىڭ مۇددەسىن ەرەكشە اۋىر زيانعا ۇشىراتتى. جاڭ زۋليننىڭ پارا الۋ قىلمىسىندا جۇزەگە اسپاعان جاعداي بولعاندىقتان، ول دەلوعا كەلگەننەن كەيىن قىلمىسىن قاز - قالپىندا مويىنداپ، باقىلاۋ - تەكسەرۋ ورگانى ءالى يگەرمەگەن كوپ ساندى پارا الۋ فاكتتەرىن ىرىقتىلىقپەن تاپسىرىپ، قىلمىسىن تانىپ، وكىنىپ، زاڭسىز ولجانى بەلسەنە قايتارعاندىقتان، كوپ ساندى زاڭسىز اقشا مەن زاڭسىز مال – مۇلىك جانە ونىڭ ءوسىمى دەلوعا قايتارىلعاندىقتان، ونىڭ ۇستىنە ول باسقالاردىڭ اۋىر قىلمىستىق ارەكەتىن اشكەرەلەپ، تەكسەرۋ ارقىلى شىن ەكەندىگى انىقتالىپ، ەلەۋلى ەڭبەك كورسەتۋ بەينەسى بار بولعاندىقتان زاڭدا بەلگىلەنگەن، جاعدايعا قاراي كەڭشىلىكپەن جازالاۋعا بولادى، وعان زاڭ بويىنشا جەڭىل جازا بەرۋگە بولادى. سوت جوعارىداعى ۇكىمدى شىعاردى.

ۇعىسۋعا قاراعاندا، چۇڭچيڭ قالالىق 1 ـ ورتا دارەجەلى حالىق سوت مەكەمەسى 2025 ـ جىلى 4 – ايدىڭ 10 - كۇنى بۇل دەلونى اشىق سوت اشىپ قاراعان. تەرگەۋ بارىسىندا پروكۋراتۋرا ورگانى قاتىستى دالەل - ىسپاتتاردى كورسەتكەن، ايىپكەر جاڭ زۋلين جانە ونىڭ اقتاۋشىسى دالەل – ىسپاتتاردى كوردى، ايىپتاۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، جاڭ زۋلين ەڭ سوڭعى ءسوزىن سويلەدى ءارى سوت ۇستىندە قىلمىسىن مويىنداپ، وكىنەتىندىگىن ءبىلدىردى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن، اقپارات تىلشىلەرىنەن جانە ءار سالا بۇقاراسىنان 30 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى