قۇتقارۋ ماشيناسىمەن ولكە اتتاپ ناۋقاس جوتكەۋ اقىسى 28 مىڭ يۋان بولعانى تۋرالى ۇكىمەت جاق جاۋاپ قايتاردى 

6 – ايدىڭ 18 – كۇنى جياڭشي ولكەلىك دەنساۋلىق ساقتاۋ – سالاماتتىق كوميتەتى ەڭ جاڭا جاعداي جونىندە مالىمەت جاريالادى. مالىمەتتە ايتىلۋىنشا، جۋىردا ءبىر ناۋقاستىڭ وتباسىنداعىلار نانچاڭ گان – ي ەمحاناسىنىڭ شۇعىل قۇتقارۋ ماشيناسىمەن ناۋقاس جوتكەۋدەگى اقىسى جونىندە كۇمان ءبىلدىرىپ، بۇل ءىس جۇرتتىڭ اڭىسىن قوزعاعان. ناۋقاستىڭ ۇقىق – مۇددەسىن قورعاۋ ءۇشىن جياڭشي ولكەلىك، نانچاڭ قالالىق دەنساۋلىق ساقتاۋ – سالاماتتىق ىستەرىن اكىمشىلىك جاقتان باسقارۋ تاراۋلارى دەرەۋ بىرلەسكەن تەكسەرۋ گرۋپپاسىن قۇرىپ، شىندىقتى ءىس جۇزىنەن ىزدەۋ پرينسيبى بويىنشا تەكسەرۋ قىزمەتىن ورىستەتكەن. قازىر وسى جاعداي جونىندە مىناداي ۇقتىرۋ شىعارعان:

تاڭ XX ەسىمدى ناۋقاس بالا 2025 – جىلى 4 – ايدىڭ 4 – كۇنى ساعات 20 دان 26 مينۋت وتكەندە ناۋقاس سەبەبىنەن جياڭشي ولكەلىك بالالار ەمحاناسىنىڭ جۇرەك اۋرۋلارى بولىمىندە سالماقتى ناۋقاستاردى كۇتىمدەۋ بولمەسىندە شۇعىل قۇتقارۋعا الىنعان. ناۋقاسى سالماقتى بولعاندىقتان، 4 – ايدىڭ 8 – كۇنى ساعات 19 دان 20 مينۋت اينالاسىندا وتباسىنداعىلار تۇندەلەتىپ شۇعىل جوتكەپ ەمدەتۋدى ورتاعا قويعان.

ەمحانادا ولكە اتتاپ ناۋقاس جوتكەۋ شارتىنا تولاتىن شۇعىل قۇتقارۋ ماشيناسى بولماعاندىقتان، ناۋقاستىڭ وتباسىنداعىلاردىڭ تالابى بويىنشا، ناۋقاستى ەمدەگەن شيپاگەر گان – ي ەمحاناسىنىڭ شۇعىل قۇتقارۋ اۆتوموبيلىنە حابارلاسقان. شۇعىل قۇتقارۋ ماشيناسىنىڭ شوفەرى ناۋقاستىڭ وتباسىنداعىلارمەن سويلەسكەن سوڭ، جوتكەۋ اقىسى 28 مىڭ يۋان بولادى، ەكى رەتكە ءبولىپ تولەنەدى دەپ كەلىسكەن. جياڭشي ولكەلىك بالالار ەمحاناسى ەكى ەمدەۋ قىزمەتكەرىن اۆتوموبيلمەن بىرگە ناۋقاستى جەتكىزىپ قويۋعا جىبەرگەن ءارى ولار ECMO (دەنە سىرتىنان جارعاق وكپە ارقىلى وكسيگەناتسيالاۋ اسپابى) قاتارلى شۇعىل قۇتقارۋعا قاتىستى اسپاپتار مەن ءدارى – دارمەكتەردى الىپ شىققان. 4 – ايدىڭ 9 – كۇنى ساعات 5 تە، شۇعىل قۇتقارۋ ماشيناسى ناۋقاستىڭ وتباسىنداعىلار بەلگىلەگەن شاڭحايداعى ءمالىم ەمحاناعا جەتكىزىلىپ، شۇعىل قۇتقارۋعا الىنعان، ناۋقاستانعان بالا حاۋىپتەن قۇتقارىلعان.

تەكسەرۋ بارىسىندا شۇعىل قۇتقارۋ ماشيناسىنا يەلىك ەتۋشى نانچاڭ گان – ي ەمحاناسىنىڭ اقى الۋى ۇيلەسىمدى بولماۋ سىندى ماسەلەلەر ساقتالعانى بايقالعان. قازىر دەنساۋلىق ساقتاۋ – سالاماتتىق ىستەرىن اكىمشىلىك جاقتان باسقارۋ تاراۋلارى ەمحانانى ۇيلەسىمسىز العان اقىنى قايتارۋعا ءارى ەمحانانىڭ ناۋقاستى جوتكەۋ قىزمەتىن ۋاقىتشا توقتاتۋعا بۇيىرعان. كەلەسى قادامدا قاتىستى تاراۋلارمەن بىرگە بۇل ءىس تۋرالى ىشكەرىلەي تەكسەرۋ جۇرگىزەدى، ەگەر زاڭ – تۇزىمگە قايشى ماسەلە بايقالسا، انىقتاپ قاتاڭ ءبىر جاقتى ەتەدى، سونىمەن بىرگە، ناۋقاستاردى جوتكەيتىن شۇعىل قۇتقارۋ اۆتوموبيلدەرىن پايدالانۋ تۋرالى باقىلاۋ – باسقارۋدى كۇشەيتىپ، ناۋقاستاردىڭ ۇقىق – مۇددەسىن باتىل قورعايدى.

كەلۋ قاينارى: حالىق تورابى